(AP) — Famia y amigo di e sospechoso di 22 aña, acusa di tira mata activista conservador Charlie Kirk, a describi su politicanan como inclinando pa iskierda den añanan recien, mientras el a pasa cantidad di tempo den e “skinanan scur di internet,” segun gobernador di Utah, Spencer Cox a bisa ayera.
Ingestigacionnan ainda ta hincando informacion tocante e sospechoso den otro, segun Tyler Robinson, y ainda no ta cla pa discuti un posible motibo. Pero Cox a nota cu Robinson, kende no ta cooperando cu ley, no tabata gusta Kirk y por a keda “radicalisa” online.
“Claramente tabatin ideologia iskierdista,” Cox a bisa riba “Meet the Press” di NBC, citando entrevista cu famia y conocir di Robinson. “Amigonan a confirma cu tabatin e sorto di internet profundo, scur, cultura di Reddit y e otro lugarnan scur aki di internet unda e persona aki tabata bayendo profundo.”
El a punta riba referencianan haya graba riba e municionnan usa pa mata Kirk, cu a inclui lenguahe anti-facista y di cultura meme. Registronan di corte a mustra cu un huls tabatin e mensahe, “Hey, facista! Catch!”
Un Republicano cu a haci yamado pa tur partisano baha nan retorica despues di e atake, e gobernador a agrega: “Ami no tin realmente un banda den e pelea aki. Si esaki tabata un persona radicalisa di MAGA, mi lo ta bisando esey tambe.”
Cox a insisti durante varios show di noticia ayera cu investigadornan ainda ta purbando di compronde e motibo di e atake contra Kirk, un tata di dos yiu chikito y persona di confiansa di presidente Trump, cu a keda asesina diaranson durante un di su tournan emblematico papiando na universidadnan, na Utah Valley University. E gobernador a bisa cu mas informacion por bin dilanti unabes cu Robinson presenta den corte diamars.
Cox a bisa cu pareha di e sospechoso tabata transgenero, cual algun politico a punta como un señal cu Robinson a ataca Kirk, fundador di Turning Points USA, pa su opinion anti-trans. Pero autoridadnan no a bisa si esey ta relevante mientras nan ta investiga motibo di Robinson.
“E compañero di camber tabata un pareha romantico, un homber transicionando pa muhe,” Cox a bisa. “Mi por bisa cu e ta increiblemente cooperativo, e pareha ta hopi cooperativo, e no tabatin idea cu esaki tabata sucediendo.”
Investigadornan a papia cu famia di Robinson y a haci un inval na cas di su famia na Washington, como 390km sur di Utah Valley University, unda e tiramento a tuma lugar.
Registronan estatal ta mustra cu Robinson ta registra pa vota pero no ta afilia cu un partido politico y ta lista como inactivo, loke ta nifica cu e no a vota den e dos eleccion general mas reciente. Su mayornan ta registra como Republicano.
Un studiante di honor den scol secundario cu a haya cijfer den di 99 percentil nacionalmente den test standarisa, el a haya admision den Utah State University na 2022 cu un beca academico prestigioso, segun un video di dje lesando su carta di aceptacion publica riba e cuenta di rednan social di un miembro di su famia.
Pero segun e universidad, el a asisti apenas un semester. Actualmente e ta registra como studiante di di tres aña den programa di stage pa electricista na Dixie Technical College na St. George.
Mientras tanto, a recorda Kirk cu diferente evento diadomingo.
Na Dream City Church na Phoenix, unda Kirk a tene un di su reunionnan “Freedom Night in America,” esnan presente a mira clip di e activista conservador discutiendo su deseo pa ser “recorda pa curashi pa mi fe.”
Durante un sesion di pregunta y contesta, un pastor di iglesia, Angel Barnett a haci un yamado pa e multitud honra Kirk door di transmiti su mensahe.
“Iskierda ta nervioso,” Barnett a bisa. “Y nan ta preocupa pasobra nan a perde control. Charlie a cuminsa esey, y nos ta bay continu’e.”
Panelista Brandon Tatum a agrega: “E cobardenan aki a kere cu nan lo por caba of elimina e movemento. Nan a djis hacie mas grandi. Nan a djis hacie mas fuerte.”
