(AP) – Un aristocrata Britanico y su pareha a ricibi condena 14 aña den prison dialuna pa e asesinato di nan yiu muhe recien naci mientras cu nan tabata huy for di autoridadnan.
Constance Marten, di 38 aña y su pareha Mark Gordon di 51 aña, un ofensor sexual condena, a ricibi sentencia dialuna despues di a ser declara culpable di asesinato pa negligencia grave na Londres su Central Criminal Court den juli. Anteriormente nan a ser condena di stroba e curso di husticia, sconde e nacemento di un mucha y crueldad di mucha. Gordon lo cumpli un sentencia di 4 aña bao licencia extendi.
Polis a lansa un buskeda nacional despues cu oficialnan a haya placenta dia 5 di januari 2023, den un vehiculo kima cu ta pertenece na Marten y Gordon cerca di Bolton na Inglatera.
E pareha a biaha den henter Inglatera y a sali for di e red, gastando centenares den taxi pa hiba nan rond, y evitando uso di credit card of cualkier cos cu por identifica nan. Nan a drumi den tent na South Downs, un rango di sero na parti Sur di Inglatera, unda nan baby Victoria a fayece.
E curpa di e baby a ser haya pa polis den un saco bao di un sushi na Brighton den 2023, cabando e buskeda di 7 siman largo.
Durante sentencia, e hues a declara cu e baby a fayece a causa di hypothermia despues cu el a ser exponi na “stress causa pa frio significante,” rechasando e pareha su declaracion cu e baby a fayece den un “accidente terible.”
“E ta cla cu durante e periodo aki ningun di boso dos a duna e baby amor ni cuido,” Hues Mark Lucraft a bisa e acusadonan. Marten a duna luz na Victoria secretamente despues cu e pareha su otro 4 yiu a ser kita for di nan den corte pa motibo cu nan tabata den riesgo di sufri daño.
Despues di nan detencion na Brighton dia 27 di februari, e pareha a nenga bisa unda e baby tabata.
Mientras cu nan tabata huy, Victoria a ser mira brevemente pa camaranan di vigilancia na Londres bisti cu e mesun paña den cual a hay’e mas despues.
Detective Superintendente Lewis Basford a bisa den un declaracion despues di e sentencia cu e pareha tabata sa cu e oficialnan ta buscando nan y tabatin suficiente oportunidad “pa haci loke ta corecto.”
