E topico di Ley di Reino ta uno cu ta keda di suma importancia tanto pa gobierno, parlamento y comunidad. Manera ya ta conoci Hulanda ta haciendo consulta riba internet relaciona cu e Ley di Reino y tur persona por reacciona riba dje. Te na e momento, tin un total di seis reaccion y un di nan ta di ex-parlamentario Miguel Mansur.

Den su reaccion Mansur ta splica cu contrario na e Lei di Reino, e ordenansa nacional cu ta compaña esaki no ta inclui sancionnan pa falta di duna informacion. El a cuestiona dicon y con ta posibel cu datonan riba e sector colectivo no ta disponibel for di comienso.

El a sigui splica cu e proyectonan PPP ta existi pa mas di dies aña caba, y CAft a propone ripitidamente pa inclui esakinan den e cuentanan nacional. El a indica cu ningun gobierno di Aruba a evalua e condicionnan, y a cuestiona si esaki ta un intento pa schuif responsabilidad pa e proximo gobierno y Minister di Finanzas, ya cu inclusion como debe y recalibracion di e normanan lo sucede solamente tres aña despues cu e Ley di Reino aki drenta na vigor.

Mansur a señala cu mescos ta conta pa otro partinan di e sector colectivo, manera AZV (Algemene Gezondheidsverzekering) y SVb (Banco di Seguro Social). El a remarca cu un biaha mas ta dificil pa djis kere cu dato no ta existi pa asina e tamaño di e sector colectivo por ser inclui for di comienso.

El a remarca cu Aruba ta luchando cu dobel embehecemento di e poblacion, y CAft a indica cu lo mester 600 miyon florin adicional anualmente dentro di dies aña pa mantene e nivel di beneficio actual. El a enfatisa cu enfoca solamente riba e gobierno central ta move e peso pa e siguiente gobierno unabes cu henter e sector publico ta inclui, loke ta bay contra di e spirito di supervision.

Mansur a splica cu pa motibo di dinamica politico, Parlamento di Aruba no a logra percura pa finanzas publico sano. El a señala cu presupuesto no a ser entrega na tempo pa 15 aña consecutivo, y e ultimo cuentanan anual aproba ta data di 2019. “P’esey, e pregunta ta surgi si ta sabi pa duna nan supervision riba inversionnan publico sin norma. Como cu entrada di interes por ser usa pa inversionnan, lo no ta mas sabi pa inclui normanan manera e multiplicador fiscal, posiblemente evalua pa CAft y despues Camara di Presupuesto,” el a cuestiona.

Por ultimo Mansur a puntra pakico Hulanda solamente ta dispuesto pa refinancia un parti di Aruba su debe den exterior si prestamonan domestico generalmente tin interesnan mas halto, pues lo no tin mas sentido pa refinancia e fiansanan ey prome. Alabes el a puntra si siendo cu no tin consecuencianan negativo pa Reino, pakico Hulanda no ta refinancia tur debe y ofrece e mesun facilidadnan cu Curaçao y Sint Maarten.

Otro reaccion riba e Ley di Reino ta bin di e persona S.A. Dumfries di Aruba. Den e reaccion aki e persona ta indica cu e Ley di Reino HOFA ta pone enfasis riba disciplina presupuestario, cu e saldo primario y e ratio di debe como su fundeshi (Articulo 3), complementa pa mecanismonan manera e seccion di convergencia y e reservanan di riesgo (Articulo 4). Asina, Dumfries a indica, por promove stabilidad y confiansa, pero alabes el a remarca cu ta crucial cu e cuadro aki ta bira mas cu supervision externo y en cambio ta desaroya den un palanca pa Aruba su autonomia sostenibel.

Dumfries a sigui splica den su reaccion cu Aruba a haci pasonan den transparencia e ultimo añanan, manera inclusion di seccionnan di riesgo den presupuestonan. Sinembargo, el a agrega, esakinan ta keda descriptivo y ta varia den profundidad.

Alabes el a indica cu pa un economia chikito y habri, vulnerabel pa fluctuacionnan di turismo, riesgonan di clima y tasanan di interes internacional, un Declaracion di Riesgo Fiscal structural ta esencial. El a remarca cu door di inclui e exigencia pa un analisis di riesgo anual den articulo 11, e practica Arubano ta ser hancra y fortifica.

Dumfries a splica cu articulo 5 tambe por ser desaroya mas aleu. El a subraya cu banda di orden y responsabilisacion, Aruba merece un Seccion di Reforma obligatorio: un splicacion anual di cumplimento di impuesto, diversificacion economico, y e evaluacion di inversionnan publico a base di balor social. Esaki, el a señala, ta duna e presupuesto un perspectiva cualitativo cu ta demostra con reformanan ta contribui na sostenibilidad financiero.

El a sigui splica cu acceso na facilidadnan di fiansa Hulandes (articulonan 10, 39, y 40) ta un bentaha, pero resilencia di berdad tambe ta rekeri su propio buffernan. El a enfatisa cu pa e motibo ey, e Ley di Reino mester permiti un Fondo di Stabilisacion y Resiliencia, financia pa impuestonan di turismo y dividendonan di gobierno cu ta crea reservanan contra shocknan externo y ta forma un fundeshi pa inversionnan den resiliencia.

Pa loke ta e “sunset clausule”, Dumfries a indica cu esaki por ser haci mas concreto a traves di un Plan di Transicion obligatorio cu logronan: e establecimento di un organo nacional di supervision, implementacion di normanan internacional, y mehoracionnan cu por ser midi den entradanan di impuesto. Esaki ta haci e caminda pa privatisacion visibel y predecible.

Por ultimo, el a indica cu e evaluacion tambe merece di ser fortifica: no solamente cada cinco aña, pero anualmente y independientemente, pa asina Estadonan y sociedad tin bista continuo riba progreso. “Door di enrikece e Ley di Reino cu analisisnan di riesgo, un seccion di reforma, un fondo di stabilisacion, un plan di transicion, y revision anual, e ta bira un trampolin pa finanzas sostenibel, renobacion economico, y un Aruba autonomo mas fuerte dentro di Reino,” el a finalisa.

Otro reaccion roba e Ley di Reino a bin di un ciudadano cu a scoge pa keda anonimo. E persona aki ta trece dilanti cu e proposicion di Ley di Reino aki ta huridicamente y cuidadosamente hinca den e Carta y ta internacionalmente hustifica pa medio di IMF, pero su factibilidad practico y e balansa entre interesnan di Reino y autonomia di Aruba lo ta crucial.

Segun e persona aki e facilidad di prestamo ta brinda Aruba un “wortel” cla, pero e “palo” di mecanismonan corectivo y indicacionnan potencial ta keda firmemente na su luga. El a enfatisa cu exito lo depende primordialmente di e boluntad politico y e rapidez cu cual Aruba realmente ta fortifica su maneho financiero.

Otro ciudadano, cu tambe a scoge pa keda anonimo den su reaccion, a trece dilanti diferente pregunta relacion cu e Ley di Reino nobo. E ciudadano a puntra dicon no a inclui e protocol di 1993, conclui entre e gobiernonan di Aruba y Hulanda na momento di eliminacion di e fecha di independencia for di e Statuut, den e memorandum di splicacion di e Ley di Reino. El a indica cu e protocol aki no a ser desaroya completamente ainda y tambe ta contene normanan financiero.

E persona aki ta puntra tambe dicon no a inclui articulo 52 di e Statuut como base pa e Ley di Reino di Consenso aki mirando cu den e caso aki, e co-legislador Arubano a otorga gobierno di Reino e autoridad pa establece e cuadro di supervision y normanan financiero door di Ley di Reino di Consenso, cu su ehecucion den un regulacion nacional.

E ciudadano aki ta indica cu e proposito di e Ley di Reino aki ta multianual, mientras cu Aruba, limita den tamaño fisico, ta confronta vulnerabilidadnan economico, y tambe mester nabega den un ambiente geopolitico volatil, locual ta limita severamente e habilidad pa cumpli structuralmente cu e normanan pa aplica e “sunset clausule”. El a puntra si Aruba por ser stroba ripitidamente door di factornan geopolitico y global fuera di su control, con e riesgo aki ta ser maneha door di gobierno di Reino.

Por ultimo e ciudadano aki a puntra kico ta e maneho di Reino pa loke ta trata finanzas publico sostenibel. El a cuestiona si creando buffernan financiero pa fia fondonan adicional temporalmente ora ta necesario, ta ser sigui pa medidanan di austeridad ya cu Hulanda, como parti di Reino, a aplica e maneho aki durante e pandemia di COVID-19.