Durante 2025 Pais Aruba tin e deber di paga 294 miyon florin na interes riba prestamonan existente. Minister di Finanzas, Geoffrey Wever (Futuro) ta informa cu conforme articulo 11 di LAft e cambio di presupuesto 2025 aproba a wordo manda pa CAft. Banda di paga 294 miyon florin na interes, lo paga tambe un total di 595 miyon florin como “aflossing” riba debenan, local y internacional den 2025.
Segun e ley di supervision, e debe como parti di e producto interno bruto mester ta 50 porciento den 2040. Pa 2025 ta proyecto cu esaki lo yega un nivel di 67 porciento. Pa por cumpli cu e pagonan na interes y riba debenan, e presupuesto ta e instrumento y cu aprobacion di parlamento pa realisa esaki.
E necesidad financiero of “financieringsbehoefte” ta loke Aruba mester fia riba mercado local y of internacional pa paga debe. E surplus di 1% segun ley y e suma cu mester paga na debe ta determina e necesidad financiero di gobierno. Den e prome cambio di presupuesto 2025 aproba, cu un surplus proyecta di 87.5 miyon florin y un total di 595 miyon florin “aflossing” riba debenan, local y internacional den 2025, gobierno su necesidad financiero ta 508 miyon florin proyecta pa 2025. Di esaki, un suma di 165 miyon a wordo fia riba mercado local caba na principio di e aña aki. Pa Aruba por fia riba mercado internacional, Rijksministerraad mester aproba e peticion pa Aruba por subi mercado internacional. Den luna di juli Aruba a ricibi aprobacion pa por fia maximo USD 150 miyon riba mercado internacional.
Como cu Aruba no a logra entrega e concepto di Rijkswet manera palabra cu Hulanda prome cu 1 di mei 2025, Aruba mester paga un interes di 6.9 porciento en bes di 5.1 porciento riba e “Covid-lening” cu ta nifica Afl. 7 miyon extra tur aña.
E cuadro legal di supervision financiero existente no ta duna Aruba e oportunidad pa presta via Hulanda na un interes mas abao. Segun e presupuesto di Hulanda 2026 , e interes mas halto cu Corsou y Sint Maarten ta paga ta respectivamente 3.1 y 3.0 porciento. Aruba ta pagando entre otro 6.9 porciento riba e “Covid-lening” y tin cu fia riba mercado local y internacional na un interes determina pa mercado. Pa refinancia debenan existente, mercado local y internacional ta determinante pa e tasa di interes cu Aruba lo haya. Desaroyonan geopolitico, guera y e posibel impacto di e trade war riba economia Mericano ta factornan cu lo por hisa e interes cu e consecuencia cu e suma cu Aruba mester paga na interes ta bira mas grandi. Esaki ta un riesgo existente cu por afecta e finanzas publico di Aruba. Como isla chikito nos no tin influencia riba esaki.
Ta un realidad cu supervision financiero ta garantiza disciplina presupuestario pero e no ta facilita pa Aruba por fia na un interes mas abao na Hulanda na e momento aki, manera ta conta pa Corsou y Sint Maarten si. Pero ta un realidad tambe cu si logra haya fia na Hulanda na un interes mas abao y crea mas espacio financiero riba e presupuesto, cu por wordo inverti bek den desaroyo di Aruba y di nos hendenan. Supervision financiero t’ey y nos mester logra haya mas beneficio pa por financia y implementa nos propio maneho, maneho cu como isla nos mes ta determina, segun minister Geoffrey Wever.
