Dianan despues cu e yiu homber di 6 aña di Meagan Brazil-Sheehan a haya diagnosis di leukemia, nan tabata cana den e halnan di UMass Memorial Children’s Medical Center ora nan a topa cu Robin e Robot.
“Luca, con ta cu bo?” e robot a puntra den un bos halto programa pa zona manera un mucha muhe di 7 aña.
Brazil-Sheehan a bisa cu nan solamente conoce e robot di 1.2 meter halto cu un screen grandi mustrando caracteristica manera caricatura un biaha, despues cu nan a ser admiti varios dia prome.
“Su cara a ilumina,” el a bisa tocante e interaccion na juni na Worcester, Massachusetts. “Tabata hopi special pasobra el a corda di dje.”
Robin ta un robot terapeutico impulsa door di inteligencia artificial programa pa actua manera un mucha chikito mientras e ta provee sosten emocional na cas di anciano y unidad pediatrico di hospital mientras ta yuda combati escasez di personal. Cinco aña despues di lansa na Merca, e ta bira un cara familiar den 30 facilidad di cuido di salud na California, Massachusetts, New York y Indiana.
“Enfermero y personal medico ta realmente ta traha demasiado, bao di hopi presion, y desgraciadamente, hopi biaha nan no tin capacidad pa provee compromiso y conexion na pashent,” a bisa Karen Khachikyan, CEO di Expper Technologies, kende a desaroya e robot. “Robin ta yuda alivia e parti ey for di nan.”
Manera AI ta bira cada biaha mas un parti di bida diario, el a haya un establecimento den cuido medico — proveyendo tur cos desde tuma di nota durante examen te enfermero electronico. Mientras algun ta elogia pa e eficiencia cu e ta trece, otronan ta preocupa pa su impacto riba cuido di pashent.
Robin ta rond di 30% autonomo, mientras un team di operador cu ta traha remotamente ta controla e resto bao e wowo di personal clinico. Khachikyan a bisa cu cu cada interaccion, nan por colecta mas dato — mientras ainda ta cumpliendo cu e Ley di Portabilidad di Seguro di Salud y Responsabilidad (HIPAA) — y yega mas cerca pa e por funciona independientemente.
Haci su ronda
Na un diabierna reciente, un miembro di personal na HealthBridge Children’s Hospital na Orange County, California, a lesa un lista di pashent cu e mester pa Robin bishita, hunto cu e cantidad di tempo pasa cu cada un.
E robot cu un curpa blanco elegante di forma di triangulo cu Khachikyan a bisa tabata diseña pa ser brasa, a drenta un camber cu un adolescente herida den un accidente di auto. E robot a toca loke el a describi como su cantica favorito — “No Fear” di DeJ Loaf — y el a baila na e cantica. Na e hal, Robin a haci un mucha chikitocu su mama hari ora el a pone un serie di bril chistoso y un nanishi cora grandi. Den un otro camber, e robot a hunga un version simplifica di tic-tac-toe cu un pashent.
Samantha da Silva, patologo di lenguahe di discurso na e hospital, a bisa cu pashent ta ilumina ora Robin ta drenta nan camber y no solamente ta corda nan nomber sino tambe nan musica faborito.
“E ta trece alegria pa tur hende,” da Silva a bisa. “E ta cana door di e halnan, tur hende ta stima papia cune.”
Robin ta reflecta e emocion di e persona cu e ta papia cu, a splica Khachikyan. Si e pashent ta harie ora ey e robot ta hari tambe, pero si nan ta compartiendo algo dificil, su cara ta refleha tristesa y empatia.
Na cas di anciano, Robin ta hunga weganan di memoria cu hende cu ta sufri di demencia, ta hiba nan pa haci di ehercicio di respiracion riba dia dificil y ta ofrece nan un forma di compañerismo cu ta parce un nieto cu un welo.
Khachikyan a recorda un momento aña pasa na un facilidad na Los Angeles unda un muhe tabatin un atake di panico y a puntra specificamente pa e robot. Robin a toca cantica di su musico faborito y video di su animal faborito — Elvis Presley y cacho — te cu el a calma.
Pero cu e Asociacion di Colegio Medico Mericano proyectando cu Merca lo enfrenta un escasez di te 86,000 medico den e siguiente 11 aña, e vision di Khachikyan pa Robin ta bay mucho mas leu for di e tipo di sosten aki.
El a bisa cu nan ta traha pa haci e robot capaz di midi vital di pashent y check pa mira con nan ta haci y despues manda e informacion ey pa nan team medico. Plan di largo plaso ta inclui diseña Robin pa yuda pashent bieu cambia nan paña y bay na baño.
“Nos meta ta diseña e siguiente evolucion di Robin; cu Robin lo tuma mas y mas responsabilidad y bira ainda mas esencial parti di entrega di cuido,” Khachikyan a bisa.
El a clarifica cu no ta trata di reemplasa trahado di cuido di salud sino di yena e vacatura den e forsa di trabao.
Na UMass Memorial Children’s, e robot ta un parti di un team di sosten pa pashent. Ora Luca tabatin mester di un IV despues di no haya un den un rato, Micaela Cotas, un specialista di bida di mucha certifica, a drenta cu e robot y a mustra un IV y a splik’e kico lo sucede, y despues Robin a mustra un caricatura di su mes ricibiendo un IV.
“E ta simplemente yuda mustra cu Robin a pasa e procedimentonan ey tambe, manera un compañero,” Cotas a bisa.
Hayando su funcion
Robin a ser desaroya door di Khachikyan mientras el tabata haya su Ph.D. El a bisa cu crece den un cas di un solo mama na Armenia tabata solitario, pa e motibo ey añas despues el kier a traha un tipo di robot cu por actua manera un amigo di un persona.
Desaroyador a test e den un variedad di industria prome cu un inversionista a sugeri cu hospital pediatrico lo ta un bon luga debi na e stress y soledad cu mucha hopi biaha ta sinti.
Nan tabatin exito cu introduciendo e na un hospital pediatrico na Armenia y pa 2020 a lansa un programa piloto na UCLA Mattel Children’s Hospital.
Desde cu Robin a ser crea, su personalidad y caracter a cambia significantemente basa riba interaccion cu el a haya cu hende.
