(AP) – Feroz Ahmed no ta sali for di cas pa su caminata di tur mainta sin un palo den man. Awo cu 60 aña, e ta cauteloso cu cachonan di caya cu ta biba cerca, net pafo di Srinagar cu ta den Kasmir, controla pa India.
“Mi ta sali cu un palo pa proteha mi mes for di e cachonan,” e ta splica.
Mientras cu Ahmed nunca a ser ataca pa cachonan di caya, otronan si.
Un cacho di caya a morde Rehmat Ashraf, di 6 aña, na su cara pafo di su cas na Srinagar. Cirugia te awo no tabata exitoso den yud’e drecha su cicatriz. Fazi, un residente di 60 aña di e pueblo Surasar a ser ataca pa cachonan di caya cerca di su cas. El a sobrevivi pero a haya varios herida na su nek, brasa, pia y abdomen.
Varios ciudad grandi na India ta lidiando cu e problema aki. Calculacionnan ta pone e cantidad na e capital, New Delhi, entre 500,000 y 1 miyon. Un encuesta municipal den 2023 a haya e ciudad di Bengaluru, conoci pa su industria di tecnologia, parke y bida nocturno, tin 279,335 cacho.
India su corte top a ordena luna pasa pa cachonan di caya na New Delhi keda captura, sterilisa y poni den shelter pa purba controla nan poblacion y limita e atakenan di esaki. Despues di manifestacion for di activistanan di bienestar di cacho, e corte a revisa su orden y a pidi e autoridadnan municipal libera e cachonan den e mesun sitio unda a gara nan.
“Cachonan riba caya por duna hopi cariño si nan ser trata bon, pero hopi hende ta hopi violento cu nan. Ora cu puppies keda acosa, e mamanan por demostra agresion. Mayoria di e mordi ta bini for di mamanan cu puppy recien naci,” Dawood Mohammad, ken ta opera un centro di rescate na Srinagar cu su casa ta bisa, splicando cu e cachonan no ta e menasa cu ta pensa cu nan ta.
