Con sclavitud a impacta e islanan Hulandes den Caribe y kico ta su impacto te ainda den nos sociedadnan. Esey ta locual e catedra comparti (leerstoel) di cuater instituto academico lo investiga. Y recientemente a lansa e proyecto.

The Caribbean Higher Education Council of the Kingdom of the Netherlands, CHECK, ta carga pa cuater institucion academico, Universidad di Corsou, Universidad di St. Maarten, Universidad di Aruba y Instituto Pedagogico. CHECK cu sosten di e Ministerio Hulandes di Educacion, Ciencia y Cultura OCW a institui e catedra comparti riba ‘Sclavitud y Su Consecuencianan.’

E catedra ta un logro den e jornada colectivo pa reconoce y compronde e consecuencianan duradero di sclavitud riba nos islanan. E ta resultado di e dialogo transatlantico riba e impacto duradero di sclavitud den Reino Hulandes cu a tuma luga na 2022 pa 2024. Asina a determina cu cada instituto lo haci investigacion bou capa di e catedra, pero riba temanan specifico, pa asina saca afo for di un perspectiva Caribense con sclavitud y su consecuencianan a y ta manifesta.

Profesornan y investigadonan afilia cu e institucionnan regional lo ehecuta e investigacionnan den cuater pakete di trabou. Esakinan ta Legado di Sclavitud; trauma, Resistencia y Resiliencia; Impacto di Sclavitud riba Educacion, Instruccion y Siñamento; Inmigracion, Identidad y e Condicionnan di Trabao; y tambe Sclavitud riba Isla Chikito.

Autor Mario Kleinmoedig a guia e sesion di introduccion di e catedra, cu a sosode simultaneamente na St. Maarten, Corsou, Hulanda y Aruba, den presencia di diferente dignatario, cu ta inclui e actual Minister di Educacion di Corsou, Sithree van Heydoorn ex Minister President di Corsou Maria Liberia Peters, ademas di Rectornan Stella van Rijn, Sue-Ann Lee y otro di e diferente islanan.

Kleinmoedig a bisa cu e colaboracion entre e institutonan ta innovativo, ya cu cuater instituto lo investiga y analisa no solamente historia pero tambe a realidad socioeconomico y cultural actual cu ta resultado di sclavitud. E cuater paketenan ta interconecta, el a splica. “E trabou ta comparti entre islanan, den e buskeda di berdad, restauracion y igualdad.”

Presidente di Universidad di St. Maarten Dr. Antonio Carmona Baez a bisa cu e catedra aki ta nifica cu institucionnan di educacion superior ta bay duna forma na colaboracion, curashi y determinacion pa “nos region papia cu nos mesun stem riba legado di nos pasado comparti, esta sclavitud y su impacto te awendia.”

Carmona Baez ta hopi agradecido na coleganan di e institucionnan cu “hunto ta no solamente ta forma un red institucional pero ta tambe comunidadnan di conocemento enrikeci pa nos hendenan, cu e responsabilidad pa produci conocemento pa nos sociedadnan.”

Carmona Baez a gradici particularmente esnan cu a realisa e programa di e catedra cu tin un duracion di tres aňa, esta Dr. Luc Alofs, Dr. Paula Kibbelaar, Drs. Raymond Jeserun, y Profesor Dr. Rosemary Allen, kendenan a persisti cu nan trabou pa e logro aki. Mas ainda, e tabata agradecido na Dr. Elisabeth Echteld, kende a coordina e proceso entre e institucionnan y OCW. “Na nomber di CHECK y Universidad di St. Maarten mi kier bisa danki tambe na OCW pa reconoce e importancia di e trabou aki y percura pa e financiamento necesario.”

E academico a bisa cu e momento ta historico ya cu e ta establece un catedra academico cu ta uni Corsou, St. Maarten y Aruba, pero tambe Saba, St. Eustatius y Boneiro. “E ta afirma cu nos di e islanan den Caribe tin e capacidad institucional y intelectual, pa asina interogatorionan y articula nos mesun historianan.”

E catedra Sclavitud y su Consecuencianan no ta un luho academico, e Presidente di Universidad di St. Maarten a sigui bisa, sino un necesidad. “E ta un declaracion cu cualkier estudio serio riba e impacto di sclavitud riba nos sociedadnan mester ta mira for di e condicionnan material cu nos antepasadonan a biba y a muri aden, y unda nos ta awe. E ta e contesta di nos den Caribe, unda nos ta den e dialogo di sclavitud y reparacion, unda e tema di sclavitud transatlantico ta domina pa combersacionnan na Merca y Europa. Nos stem, basa riba nos experiencia Caribense mester ta scucha,” Carmona Baez a bisa den su introduccion. “Nos realidadnan no ta abstraccionnan. Nan ta realidad continuo di sclavitud.”

Como institutonan di educacion superior crea den e region Caribense y cu ta enfoca riba e experiencia Caribense por ilustra cu e resultado y efecto di sclavitud ainda ta un realidad contemporaneo. Segun Dr. Carmona Baez, e cuater area di investigacion of manera a cataloga nan, e paketenan di investigacion como tal ta enfoca riba dimensionnan crucial di e legado di sclavitud. Por ehempel, e pakete di Inmigracion laboral lo explora e condicionnan historico y contemporaneo di forsa laboral di nos islanan y con labor forsa y migracion ta keda determina ken nos ta. E otro cu ta Sclavitud riba Isla Chikito ta un investigacion cu mester ilustra e impacto di sclavitud riba constelacionnan politico y social, y e balansa complica entre autonomia interno y imposicion externo. Sclavitud y con ta educa riba dje ta pa mustra, con a representa, bon y malo, of hasta neglisha den enseñansa, y kico mester pasa pa crea miho comprondemento di nos pasado. Y finalmente, trauma, Resistencia y resiliencia lo duna un stem na e dimension comunitario, psicologico y cultural di sclavitud, unda lo reconoce e dolor y trauma mientras cu ta celebra Resistencia, resiliencia y creatividad. “Hunto, e liñanan aki di investigacion ta corda nos cu sclavitud ta multi-dimensional, den politica, den klas y den sociedad. E ta exigi un respuesta multi-dimensional, multi cultural y multi-regional.”

E proyecto aki a tuma hopi tempo, pasenshi y pa e institucionnan por a bin hunto, cada un for di nan propio perspectiva cultural, pa nabega tradicion academico alabes, reconociendo e prioridad y limitacion di cada un di e institucionnan. “El a rekeri negociacion riba presupuesto y recurso. Pero nos a persisti pasobra nos a compronde cu e recompensa di colabora ta mas grandi cu e comfort di isolacion. Nos ta kere den e forsa di colaboracion Caribense.” E catedra ta ilustra kico por logra si ta sigui inverti esfuerso den colaboracion pa e bien comun di e islanan den region.