E discusion riba e Ley di Reino HOFA ta continua. Mientras cu Gabinete AVP-FUTURO ta indica cu nan a firma un Ley di Reino cu den su mayoria tabata traha pa e gabinete anterior, ex-prome minister Evelyn Wever-Croes (MEP) ta sigura cu e Ley di Reino HOFA no ta di Gabinete Wever-Croes. Awor pa elimina tur duda, e ex-prome mandatario a reta e prome minister actual, Mike Eman, pa un debate.
Riba su pagina oficial di Facebook, diasabra ultimo ex-prome minister y actual parlamentario Evelyn Wever-Croes a publica un video den cual e ta publicamente reta prome minister Mike Eman pa un debate entre nan dos pa por mira ken a firma kico y ken a traha e Ley di Reino HOFA.
Wever-Croes a indica cu Gobierno di AVP-FUTURO ta bisa cu e Ley di Reino HOFA cu nan a firma ta 90% di Gabinete Wever-Croes y 10% di Gabinete AVP-FUTURO. El a sigura cu e, como prome minister e tempo ey, a firma un bestuurlijk akkoord di tres pagina, mientras cu Gabinete AVP-FUTURO a firma un Ley di Reino di 46 pagina, cual segun el a splica, si saca e som, e argumento no ta cuadra.
“Ban coy 90% di 46 ta 41. Ami a firma algo di 3 pagina no 41. Esey ta mustra bo caba cu nan argumento no ta corecto p’esey mi ta reta Mike Eman, di awe pa un luna, awe ta 20 di september pa 20 di october, un debate ami cu bo so Mike Eman y e ora nos ta bay debati ken a firma kico. Bin cu bo pruebanan y ami ta bin cu diminan pa Aruba once and for all haya sa ken a firma e Ley di Reino Hofa,” el a enfatisa.
E argumento riba e Ley di Reino tin hopi tempo andando, pero esaki a intensifica despues cu Gobierno di Aruba a presenta un concepto di e Ley di Reino HOFA na Conseho di Minister di Reino, cual a ser aproba, sin consulta cu Parlamento di Aruba prome.
Fraccionnan di oposicion a expresa nan disgusto inmenso pa esaki, mientras cu fraccionnan di coalicion a sostene gobierno.
