Ayera tardi, diferente area na Aruba a confronta un interupcion den suministro di coriente. For di Pos Abao, Tanki Leendert y Eagle, te mas anochi na Santa Cruz, usuarionan a keha riba rednan social di e molester cu e interupcion di coriente a ocasiona.
Den un post riba nan pagina di Facebook, pa alrededor di 5pm, ELMAR a indica cu e interupcion tabata ocasiona na planta di WEB. “Varios area a perde suministro di coriente. Asina cu WEB soluciona e problema, nos tecniconan ta cla pa cuminsa suministra coriente den e areanan afecta,” segun e post.
ELMAR a indica cu e areanan afecta tabata Pos Abao y vecindario, y Tanki Leendert y vecindario.
Entre 5:06pm y 6:26pm, ELMAR a reestablece distribucion di coriente, consecutivamente, na Sero Blanco, centro di Oranjestad, Low Rise Hotel y finalmente area di Eagle.
Sinembargo, como un ora despues, ELMAR a informa tocante un interupcion di coriente den area di Santa Cruz. WEB a informa cu e interupcion na e area aki “ta na ELMAR.”
Usuarionan di rednan social den area di Santa Cruz tabata expresa nan frustracion, pa motibo cu esaki ta varios biaha recientemente cu tin interupcion di coriente den e area. “Santa-Cruz atrobe N.V. ELMAR. Dos siman pasa, ayera nochi y awe atrobe. Con por ta posibel? Kico ta e problema na Santa-Cruz pa cu electricidad?” usuario K.M.M a comenta.
Usuarionan di otro barionan a comenta cu nan tambe a keda sin coriente, manera Sabanilla Abou, Shiribana, y Sero Pita, entre otro.
Sinembargo, te ciere di e edicion aki, no tabatin update di ELMAR pa e situacion na Santa Cruz.
