(NLTimes) – Hulanda y Uganda a firma un memorandum di intencion pa establece un centro di regreso na Uganda pa solicitantenan di asilo rechasa, Minister demisionario pa Asuntonan di Asilo, David van Weel (VVD) a confirma diahuebs. E acuerdo a ser firma hunto cu e minister relevante di Uganda durante un reunion di Nacionnan Uni na New York.

E centro lo aloha principalmente personanan di region di Uganda cu ta na Hulanda ilegalmente. E iniciativa ta ser describi manera un “piloto na escala chikito” cu ta dirigi riba un cantidad limita di individuonan cu ta kedando ilegalmente na Hulanda despues cu nan peticionnan di asilo a keda rechasa. E plan tin como meta pa garantisa cumplimento cu ley nacional, Europeo y internacional.

Esnan cu nenga di sali boluntariamente lo enfrenta regreso forsa. Sinembargo Ministerio Hulandes di Asilo y Migracion ta constata cu deportacion hopi biaha ta dificil si e pais di origen no ta coopera.

E plan a haya critica di varios banda. Amnesty International a expresa preocupacion tocante e acuerdo, bisando cu e ta “leu di ta positivo.” Un vocero a señala, “Prome, e acuerdo probablemente lo resulta den hendenan cu ta ser deteni arbitrariamente of devolvi na paisnan caminda nan ta enfrenta peliger. Di dos, Uganda tin algun di e leynan anti-LGBTQIA+ mas estricto na mundo.”

VluchtelingenWerk, un organisacion di refugiado Hulandes, a tilda e plan como “prematuro,” subrayando cu e cuadro legal ta bou di negociacion ainda. “E plan ta encera detene personanan cu no tin derecho di asilo pero cu no por bolbe cas pa falta di documento di biahe, den un pais unda nan no ta di dje y nunca a biba,” e grupo a bisa. Tambe el a cita preocupacionnan di derechonan humano, incluyendo e leynan LGBTQIA+ “draconiano” di Uganda, y a boga pa “solucionnan real” manera inversionnan den programanan di regreso boluntario y acuerdonan sigur cu paisnan no-Europeo.

Minister demisionario Van Weel a enfatisa cu e legalidad di e acuerdo finalmente lo ser revisa door di un hues. “Nos ta kere cu esaki por ser haci denter di tratado y regulacionnan existente,” el a bisa. Tambe el a confirma consultanan cu e Organisacion Internacional pa Migracion (IOM) y e Alto Comisario di Nacionnan Uni pa Refugiadonan pa garantisa cu e obligacionnan di derechonan humano ta ser cumpli.

Hulanda no ta e prome pais Europeo pa purba un centro di regreso na Uganda. Esfuersonan anterior di Reino Uni a fracasa.

Apart di esaki, autoridadnan di Uganda a retira un caso rond di e desaparicion di e studiante di medicina Hulandes Sophia Koetsier na 2015, segun e sitio di noticia di Uganda Monitor. Koetsier, e tempo ey di 21 aña cu diagnostico bipolar, a desaparece mientras e tabata riba un safari cu dos compañero dirigi pa e guia di turismo Michael Kijjambu. Ta ser alega cu Sophia tabata pasando den un episodio maniaco mientras e tabata riba safari.

E caso contra Kijjambu a alega cu el a ignora advertencia pa busca cuido medico pa Koetsier y a fungi como guia sin autorisacion apropia. E cuidador di mondi Stephen Nyadru a testigua na comienso di e aña aki cu el a adverti Kijjambu pa hiba Koetsier un hospital, señalando cu e tabata comporta su mes iregularmente, a purba di cende yerba na candela, y a purba di bula for di un vehiculo den movecion. Koetsier su mama, Marije Slijkerman, a bisa den corte cu e ta culpa e guia pa ignora advertencia ripiti.

Solamente algun articulo personal di Koetsier a ser recupera, incluyendo su paña interior cu a ser haya colga den un palo. Su desaparicion ta keda sin ser soluciona, y ainda no ta conoci kico a pasa cune.