Recientemente comunidad di Aruba a ser sacudi pa un cantidad di accidente di trafico, caminda dos tabatin un resultado fatal. Riba diadomingo so tabatin tres accidente di trafico. Riba rednan social comunidad a expresa su preocupacion y haci un yamado na tur ciudadano pa core responsabel y ta consciente na momento di subi tras di stuur.

Te cu aworaki aña 2025 a conoce siete victima fatal di accidente di trafico. E accidente fatal mas recien a sucede diadomingo anochi. Den e caso aki pa mas o menos 10:30 di anochi, central di polis ta ser notifica di un accidente na altura di Cayena Mall entre un auto y un brommer. Mesora a despacha polis di biaha na e sitio di e sucedido como tambe ambulance.

Na yegada polis a constata cu e chauffeur di e brommer no tabata reaccionando. Personal di ambulance cu a yega na e sitio a brinda prome auxilio pero lamentablemente no por a haci nada mas pa e chauffeur.

Dokter forensico a presenta na e sitio y a constata morto di e chauffeur di e brommer, Denny Enmanuel Leoni Davila naci na Venezuela 24 november 2003 di apenas 21 aña edad.

Mientras cu autoridadnan tabata tende cu e accidente fatal cu a cobra bida di e hoben di 21 aña, otro accidente sucede na Saliña Cerca. Chauffeur di un RAV-4, aparentemente a perde control y a bolter y e auto a dal varios buelta.

Segun informacion e personanan den auto (tres hoben) a keda pega pa motibo di e estado di e vehiculo despues di a bolter. Materiaalwagen di Brandweer mester a yega na e sitio pa asina corta e auto pa por a libera nan. Segun informacion e heridanan cu e personanan den auto a ricibi tabata grave y a ser transporta pa hospital cu maximo urgencia.

Diadomingo tambe a drenta informa di otro accidente di trafico na Savaneta. E biaha aki tabata trata di un hoben cu tabata riba su quadracer y aparentemente lo a perde control y a bay dal den un cura di cas.

Segun informacion e persona tabata den estado critico y a ser transporta pa hospital cu maximo urgencia.

Dialuna 29 september 2025 pa 9:30 di mainta otro accidente a ser raporta. Central di polis a ser notifica di un accidente entre un auto y un step. Na yegada a pidi ambulance pa e victima, un hende homber, cu tabata core e step.

Na prome instante ora cu ambulance a presenta na e sitio a brinda asistencia medico y a logra stabilisa e victima pa asina transporte pa hospital. Despues Central di Polis a ser notifica cu e victima su situacion ta critico.

Algun dia despues lamentablemente e victima, Jorge Enrique Lora Diaz naci 1 april 1969 (56 aña) na Colombia, a fayece y a bira e di seis morto den trafico pa e aña aki.

E cantidad di accidentenan den un periodo di tempo asina cortico a lanta un preocupacion enorme den comunidad. Ciudadanonan a haci yamado pa tur automobilista core cu cautela riba caminda.

Pa ta un isla chikito, e cantidad di accidente di trafico cu ta ser raporta ta alarmante. Segun cifra disponible riba e pagina traficosigur.aw te cu aworaki Aruba a registra un total di 6.694 accidente di trafico pa aña 2025, siete di nan cu resultado fatal.

Den hopi caso e motibo di accidente ta chauffeur cu ta core bao influencia, of cu velocidad halto, falta di atencion riba caminda. Na Aruba e castigo pa core bao influencia ta depende di e cantidad di alcohol di e sistema, e gravedad di e accidente, y si ta prome biaha of mas biaha cu a ocasiona accidente mientras ta core bao influencia.

E castigonan ta varia desde un boet, suspension di rijbewijs, den algun caso detencion y si ta trata di accidente fatal, e castigo por ta prizon. Pero mester remarca cu aunke yega na castigo di prizon, esaki normalmente no ta halto. Hopi ciudadano ta sali for di punto di bista cu pa motibo cu e castigonan pa core bao di influencia na Aruba no ta severo suficiente, hende ta sigui hacie.

Compara cu algun otro pais rond mundo, Aruba tin castigonan basta suave. E castigonan pa core bao di influencia di alcohol of droga na Europa ta varia significantemente pa pais, pero comunmente ta inclui boetnan pisa, perdida di punto riba e rijbewijs, suspension of hasta revocacion di e rijbewijs, y den casonan serio of ripiti, castigo di prizon.

Den aña 2024, Aruba a registra 8,554 accidente di trafico, cu un total di 15.300 vehiculo envolvi, un promedio di casi dos vehiculo pa cada accidente. E cifra ta mustra un aumento cla pa fin di aña, cu november (784) y december (755) como e lunanan cu mas accidente. E luna cu menos incidente tabata september (665) y februari (670), indicando un aumento pa fin di aña cu por ta relaciona cu mas transito y actividad di fiesta.