Durante un conferencia di prensa ayera mainta, miembro di fraccion di Futuro, parlamentario Gino Goeloe a expresa su preocupacion profundo tocante e situacion di salud general den comunidad Arubano.
El a splica cu segun den e ultimo investigacion di STEPS cu a ser haci pa DVG a sali na cla cu 78% di e poblacion ta sobrepeso/obeso. El a remarca cu mundialmente cientificonan ta indica den diferente rapport cu sobrepeso ta hiba na malesanan cronico, malesa manera diabetes, presion halto, problema cu pulmon, problema cu wowo, etc.
“Mi ta un parlamentario hopi preocupa y den mi ex funcion como director di Wit Gele Kruis mi a bin cu diferente programa di radio y television pa educa nos comunidad. Mi ta kere esey mester bin back,” el a subraya.
Parlamentario Goeloe a sigui splica cu DVG mester, y tin e deber, pone mas atencion na informa comunidad tocante biba un bida saludabel. El a agrega cu di otro banda, gobierno tambe tin cu yuda DVG yega na e fondonan pa nan por pone programanan na television, na radio, como tambe propagandanan riba billboards pa ciudadanonan por wak y ser informa.
“Mi ta kere cu nos tin cu bay pone mas enfasis riba nos salud y manera mi a menciona salud di comunidad no ta bon, e ta malo, hopi hende malo na Aruba y esey ta algo cu nos tin cu bay traha riba dje,” el a enfatisa.
El a splica cu un manera pa logra esaki ta door di bin cu programanan pa educa comunidad pa biba un bida saludabel y tambe bin cu mas scol saludable. El a sigui splica cu actualmente tin 16 scol saludable na Aruba, cuminsando di kleuter school te na basis school. El a indica cu tin hopi scol basico na Aruba, y como parlamentario e ta boga pa tur scol bira un scol saludabel, na unda e muchanan ta siña desde kleuter school caba con pa come, haci movecion y tocante cuminda saludable.
“No ta un secreto cu na Aruba hende gusta come hopi vet, sucu y salo. Esey ta algo cu nos Rubianonan gusta. Pero esey ta hiba nos na casonan di por ehempel diabetes. Aki na Aruba e diabetes su cifra alarmantemente halto,” el a señala.
Parlamentario Goeloe a splica cu recientemente el a atende un conferencia di cuido di herida (wonden poli) y a haya sa cu 16% di comunidad Arubano ta sufri di diabetes, cual el a subraya ta algo alarmante.
El a sigui splica cu den e caso di diabetes, si esaki no tin e control debido e por causa problema cu wowo, problema cu ader, cu riñon, y hasta cu e nervionan. “Den e caso aki problema so bo ta haya,” el a remarca.
Alabes el a enfatisa cu algo cu tin caba cu ta hopi bon ta e praktijkondersteuners na e oficinanan di dokternan di cas. Praktijkondersteuners ta nursenan cu diploma HBO cu ta guia e pashentnan cu tin malesa cronico manera diabetes, problema di pulmon, di presion halto, cardiovascular, y problema cu adultonan mayor.
El a indica cu hopi biaha e grandinan ta sufri di e enfermedadnan aki y e praktijkondersteuners ta yuda hopi. Di otro banda, el a agrega, te ainda tin hopi di e pashentnan cu ta bay cerca e praktijkondersteuner y ta sinta cu nan pero toch nan no ta tuma nan remedi, loke ta haci cu e problema di salud ta bira pio. El a enfatisa cu p’esey ta importante cu tin follow up cu e pashentnan, algo cu el a subraya e praktijkondersteuners ta haci un bon trabou den dje.
Goeloe a splica cu actualmente tin 28 praktijkondersteuners y dos siman pasa 14 a cuminsa cu un curso nobo di 18 luna cu e ora nan caba cu e curso lo tin 42 praktijkondersteuners na e oficinanan di dokternan di cas cu ta yuda e pashentnan cu nan problemanan di salud,
“Mi ta kere cu nos ta den bon caminda den e caso aki, pero ainda mi ta haya falta di e parti di programanan di television y tambe na radio tocante salud, kico ta bon, kico ta malo. Esey mi ta haya falta di dje y esey mi ta kere cu nos mester pone fondo disponibel pa cu DVG den e caso aki,” el a enfatisa.
E parlamentario a indica cu ta bay tin combersacionnan entre Minister di Deporte y Minister di Salud tocante expande e scolnan saludable aki na Aruba. “Eynan no mester cuminsa. Na muchanan di cinco, seis aña cu di chikito cu nan ta, ta siña nan cu fast food tur siman no ta bon, cu juice y refresco no ta bon. Cu mester bebe awa, mester haci movecion. Eynan nos mester ta,” el a subraya.
El a ratifica cu biniendo cu e programanan na television y tur medio di comunicacion, ta bay stimula e hendenan pa biba un bida saludabel.
Por ultimo, el a menciona cu recientemente el a asisti na un charla organisa pa Fundacion ABO, Wilhelmina Kankerfonds, Mary Joan Foundation y Fundacion di Cancer di Prostaat, y a keda hopi sorprendi di tende e cifranan di cancer na Aruba y tambe e mortalidad pa motibo di e enfermedad aki.
“Nos tin cu inverti den nos hendenan pa biba un bida saludabel,” el a enfatisa.
