Minister di Finanzas, Asunto Economico y Sector Primario, mr. Geoffrey Wever (Futuro), a anuncia cu awe Aruba a paga un total di 90.1 miyon florin na Hulanda riba e COVID-lening – e prestamo cu Hulanda a pone disponibel durante e periodo critico di pandemia.
E pago ta consisti di 45.8 miyon florin na capital y 44.4 miyon florin na interes, y ta representa e di dos biaha cu Aruba a cumpli cu pago riba capital. Den total, Aruba a paga 91.6 miyon florin na capital, reduciendo asina e debe di 915.5 miyon florin pa algo menos cu 824 miyon florin.
“E pago di awe ta otro paso concreto den nos compromiso pa fortifica e confianza den maneho di finanzas publico y pa demostra cu Aruba ta un pais cu ta cumpli cu su palabra y su obligacion,” Minister Geoffrey Wever a bisa.
Durante pandemia di COVID-19, entrada di sector publico y priva a cay drasticamente, y Hulanda a asisti Aruba cu likides pa sigura cu nos economia por a sigui move. Entre 2020 y 2021, Hulanda a otorga nuebe prestamo, cu posteriormente a consolida den un solo prestamo di 915.5 miyon florin, conoci como e COVID-lening.
Na momento cu e debenan a wordo consolida, a termina e periodo liber di interes y a introduci un tasa di interes di 6.9% pa un periodo di 20 aña, cu por baha te 3%-4% den caso cu aproba un Rijkswet.
“E meta di nos gobierno ta cla: pa gradualmente baha e nivel di debe, cual lo baha e gasto di interes, cu lo fortifica e stabilidad fiscal y crea un base solido pa crecemento economico sostenibel, unda cu lo tin un reparticion husto di e rikesa di nos pais,” minister Wever a bisa den un comunicado di prensa.
