Diamars ultimo, noticiero Bloomberg a publica un articulo den cual ta indica cu Union Europeo (EU) a propone restriccion riba tres compania cu a provee bandera falso pa tankeronan di petroleo sanciona den flota fantasma di Rusia, segun documentonan cu e noticiero a mira.
E entidadnan en cuestion lo a duna bandera falso di Aruba, Corsou y Sint Maarten na al menos ocho barco sanciona, segun e documentonan en cuestion.
Sinembargo, ta nota cu ningun di e tres teritorio aki ta aparece riba e registro di bandera oficial pa nabegacion, conoci como Registro di Paris, loke ta nifica cu en realidad no por duna e servicio di bandera pa nabegacion.
Hulanda a adverti Organisacion Maritimo Internacional den un circular na mei cu tabatin compania ta dunando “certificado fraudulento” den nomber di Sint Maarten.
E medidanan proponi ta parti di e pakete mas recien di sancion di UE, cual actualmente ta siendo negocia pa e estadonan miembro. EU tin meta pa aumenta presion riba e flota fantasma di Rusia y corta den entrada di petroleo di Moscu.
E pakete tambe ta inclui sancion riba otro 120 barco adicional, treciendo e cantidad total di entidad riba e lista na mas di 560, como tambe restriccion riba varios entidad na paisnan den desaroyo cu ta habilita e comercio di energia di Rusia.
Sancionnan di EU ta rekeri sosten di tur estado miembro prome cu nan adopcion, y e detayenan di e medidanan por cambia prome cu haya e aprobacion.
Algun capital ta aumentando control riba barconan cu ta biaha den proximidad di nan awanan teritorial pa frustra e fluho di petroleo Ruso mas ainda. Francia a bisa cu a stop y investiga un barco siman pasa, pa no duna prueba di su nacionalidad, segun Bloomberg a reporta. Presidente Frances, Emmanuel Macron a bisa despues na un cumbre di EU na Copenhagen cu detene tankeronan di petroleo sospechoso por interumpi e operacionnan di e flota fantasma.
