Diamars 7 di october algun bisindario den area di playa a experiencia interupcion di coriente mas cu un biaha den e mesun dia. Esaki a causa disgusto entre habitantenan cu a expresa nan frustracion y malcontento cu N.V. ELMAR su servicio.
Desde dialuna anochi habitantenan di algun bisindario den area di playa a cuminsa experiencia interupcion di coriente. Dialuna pa 8:30 di anochi areanan Ierlandstraat, Belgiestraat, Lucianitastraat, Caya Frere Caspar y bisindario. A keda sin coriente. Segun NV ELMAR e causa di e interupcion ta un kabel subteraneo di distribucion cu a sufri daño. Pa 10or di anochi a reestablece suministro di coriente den tur area.
Diamars mainta pa 10:14 di mainta Dominicannesenstraat y bisindario a keda sin coriente. E causa tabata un kabel bou tera cu e sufri daño. Pa 11:10 di mainta tur area tabatin coriente back.
Diamars anochi un biaha mas varios area den playa a bolbe keda sin coriente. E areanan afecta tabata Schelpstraat, Venezuelastraat y bisindario. Y ya pa 9:10 di anochi tur area afecta tabatin coriente atrobe.
Esaki a causa un disgusto entre habitantenan cu a cuestiona con ta posibel cu coriente ta bay tanto biaha. Tambe tin e ciudadanonan disgusta cu ta puntra si pa motibo di e interupcionnan di coriente nan aparatonan daña, si N.V. ELMAR lo para responsabel pa esakinan.
Den e ultimo simannan N.V. ELMAR a confronta cu diferente reto pa loke ta trata nan servicionan. Anteriormente, den luna di september, e compania estatal a confronta tambe un atake cibernetico cu a afecta e servicio di nan aplicacion y sistemanan.
