Recientemente a surgi un declaracion den cual CEO di Armstrong International, Bill Armstrong, a expresa cu ainda tin interes pa explora y produci petroleo den Aruba su awanan teritorial. E declaracion a bin un aña despues cu Armstrong a informa cu a identifica 3 campo di gas den parti nordeste di Aruba.

Armstrong su interes den explotacion di petroleo rond Aruba tabata conoci for di 2023 caba, unda el a entrega un peticion na gobierno e tempo ey pa explora e posibilidad di gas y petroleo. E tempo ey, e compania a enfatisa cu e posibilidad ta grandi, a base di loke a resulta di nan mesun investigacion.

Armstrong Oil & Gas,un subsidiario di Armstrong International,ta conoci pa su excavacionnan riesgoso cu su grupo “wildcatter”, di cual nan exito tabata mas notable den e caso di Pikka, un exploracion den e North Slope di Alaska cu—a pesar di datonan anterior afirmando cu no tabatin deposito di petroleo—a resulta den un hayazgo di 2,5 biyon bari. E hayazgo aki a lansa Armstrong na fama y awor e magnata kier tuma un chance den nos cura.

Aña pasa gobierno di ex-prome minister Evelyn Wever-Croes mediante e Compania Arubano di Petroleo (CAP) a firma un contrato cu Andicuri Oil & Gas Exploration VBA (AOGX), un subsidiario local di Armstrong International pa e exploracion, desaroyo y produccion di hidrocarburo den e area maritimo di Aruba. E tempo ey a informa cu pa e siguiente 18 lunanan ta bay busca mas datos, mas informacion, y cuminsa bora pa wak si por haya algo den e awanan teritorial di Aruba. Si logra haya, nan lo bay over na explora y saca e gas y petroleo, pa asina nan cuminsa proces’e y bende—tur esaki bao gasto di Armstrong International mes, unda AOGX lo paga belasting y un suma anual di 375 mil dollar na CAP.

Manera a splica e tempo ey, e acuerdo aki lo marca un stap importante den diversificacion di Aruba su economia, y si logra haya petroleo, Aruba por beneficia di un entrada grandi.

Sinembargo, mester enfatisa cu a pesar cu e investigacionnan di Armstrong ta mustra prometedor, no por grita victoria ainda. E industria di petroleo ta uno extremamente complica y probabilidad di fracaso ta halto.

Den pasado a mira un exploracion di petroleo den Aruba su awanan teritorial caba, unda compania Spaño Repsol a conduci nan mesun investigacion incluyendo ‘proof drilling’ y a descubri cu no tin ningun deposito di petroleo den nos awanan. Repsol ta un compania internacional cu ta haci su mesun exploracion y extraccion di crudo (upstream), ta refina esaki y ta encarga di fabricacion y mercadeo di productonan di petroleo. Un compania grandi asina cu recursonan mas cu adecua pa exploracion di petroleo ya a indica cu Aruba no tin ningun rastro di crudo. Armstrong, sinembargo, ta desafiando e resultadonan di Repsol, señalando cu si tin petroleo, pero cu no a conduci un investigacion na e sitionan corecto. Awor den un intento pa replica su exito na Alaska, Armstrong lo purba su suerte na Aruba a base di datonan di un compania local.

Ora un compania di petroleo logra descubri un deposito den tereno di un pais, en general tin dos manera cu e pais propietario por beneficia di e hayazgo aki. E prome ta pa e pais propietario tuma e crudo pa nan mes refin’e. Esaki ta rekeri un inversion enorme den transportacion di crudo como tambe recursonan adecua pa por refina e petroleo—algo cu pa islanan chikito manera Aruba no ta realistico. E di dos manera cu un pais propietario por beneficia ta pa tuma ‘royalties’ di e hayazgo, esta beneficio monetario, cual gobierno di Aruba lo probablemente haci.

E interes di un compania Mericano pa explora den awanan teritorial di Aruba ta un acontecimento unico y ta laga un punto interesa pa considera: Pakico awo?

Merca ta e productor di petroleo mas grandi na mundo, despues di Rusia y Saudi Arabia. Sinembargo, segun Forbes ta reporta, pronosticonan ta señalando un caida pa 2026 aña caba, principalmente stimula pa e crisis economico global y Trump su politicanan estricto riba tarifanan di importacion. Como consecuencia, prijsnan ta bahando y actividad den produccion di shale oil ta parando. Manera Forbes a reporta na mei, crudo di West Texas Intermediate ta na benta pa casi 60 dollar pa bari, algo cu expertonan a yama insostenible pa crecemento economico den e sector di petroleo.

E caida den e industria petrolero di Merca tambe por ta conecta na e relacionnan tenso entre Merca su productornan mas grandi di crudo pisa, esta Canada y Latino America, specialmente despues cu Trump a cuminsa aplica su tarifanan masivo contra su bisiña den norte.

Canada ya tin tempo ta dirigiendo su crudo na otro parti di mundo, expandiendo su comercio cu paisnan Oriente manera China y Hapon cu e Transmountain pipeline den e ocean pacifico. Manera Reuters a reporta na mei, exportacion di crudo Canades pa China via carga a surpasa esun di Merca, unda na april China a ricibi 299,000 bari pa dia, y Merca 286,000 pa dia—un caida drastico compara cu cifranan record di september 2024 (431.000 pa dia).

Y Trump su sancion riba petroleo Venezolano tambe ta reduciendo e cantidad di crudo pisa pa rafinadornan Mericano. Ademas, tension geopolitico entre e pais norte Americano y Venezuela tocante e movecionnan militar di Merca den Caribe abordando trafico di droga saliendo for di Venezuela por empeora e situacion di crudo.

E cifranan aki por ta indicativo cu Merca su industria petrolero ta cayendo, cual por stimula e pais pa busca otro fuente di crudo. Den september a sali na cla un acuerdo nobo entre Merca y Pakistan unda Washington lo yuda e pais den Medio Oriente pa explota su reservanan di crudo, manera Associated Press a reporta.

Den Caribe, tin par productor nobo manera na Guyana, di cual su produccion di crudo a surpasa 650 miyon bari desde su prome explotacion den december 2019, mustrando un crecemento rapido pa e pais Caribense den e industria petrolero. Trinidad y Tobago tambe ta historicamente un productor grandi di crudo den Caribe desde añanan 1990. E pais ta lider den produccion di gas natural den e region.

Ta keda na tempo pa mustra kico lo resulta for di e exploracion petrolero di Armstrong den nos awanan teritorial, y si descubri algo, kico e por nifica pa Aruba.