Den colaboracion cu The Toledo Zoo y expertonan; ACF a conduci sondeo di Cascabel usando tecnologia nobo

Den luna di october Aruba Conservation Foundation (ACF) a ricibi un equipo di expertonan di The Toledo Zoo & Aquarium pa un sondeo di e poblacion di Cascabel riba nos isla. E bishita aki tabata unico, como cu pa prome biaha a introduci un metodo nobo pa observa e Cascabel den salvahe, esta usa un ‘thermal drone’ cu lo duna un miho indicacion y comprendemento unda e Cascabel ta biba y con nan ta move rond durante dia.

The Toledo Zoo ta un parke zoologico y fundacion di conservacion basa na Ohio, Merca, cu mas di 125 aña den operacion. E parke tin mas cu 10.000 animal individual for di 720 especie y ta participa den casi 80 programa di sobrevivencia di especie. E colaboracion cu Toledo Zoo y cu e parke Arikok a cuminsa caba den añanan 80, manera e expertonan a splica. E aña aki, ACF y Toledo Zoo ta fortaleciendo nan colaboracion y ta continuando cu e trabao cu a wordo haci caba.

Nick Gordon, Gerente di Herpetologia na The Toledo Zoo tabata entre varios experto—incluyendo Dr. Jeff Goessling, ken tin 15 aña di experencia conduciendo investigacion riba reptielnan di Aruba—cu a haci un bishita pa e sondeo di cascabel. Gordon ta encarga di un coleccion masivo y diverso di reptielnan venenoso, anfibio y animalnan invertebrado, manera cierto insecto y especienan di lama manera secat of cocolishi na The Toledo Zoo. E tambe ta coordinador pa e plan di sobrevivencia pa nos Cascabel. Manera el a splica, durante añanan 2000 a descubri Cascabel pafo di e limite di e parke cu tabata considera di no ta perteneciendo na e area unda a haya nan. A constata cu unda a haya e colebranan aki no tabata un bon habitat pa nan, pues pa preveni cu nan no lo muri, a hiba nan na Toledo unda expertonan por a pone nan den captividad pa por broei nan pa diversidad genetico.

A splica cu tin varios motibo pa esaki. E motibo mas grandi ta pa tin un poblacion di Cascabel cu por funciona como un “safety net” den caso cu si e poblacion di Cascabel na Aruba cay den extincion. Den un caso extremo asina, nan por tecnicamente introduci e Cascabel back riba Aruba, aunke a enfatisa si cu esaki tambe tin su retonan. E metodo di conservacion aki no ta unico pa ACF, como cu e organisacion tambe ta trahando cu otro partnernan na Hulanda pa yuda cu criamento di Lora, algo cu ta parti di e programa di reintroduccion di e parha cu pa un tempo tabata extingui riba e isla. Pa e Cascabel, sinembargo, e meta principal ta pa conserva e poblacion cu tin caba na Aruba. Y esaki tin su beneficionan, manera Dr. Matt Cross, biologo di conservacion na The Toledo Zoo a subraya. Segun Cross, “Accionnan di conservacion lo tin influencia riba tur cos” pues “loke ta bon pa e Cascabel ta bay ta bon pa tur organismo bibando riba e isla.”

E otro parti ta pa provee educacion tocante e Cascabel, sea pa bishitantenan di Aruba como tambe pa biologonan. Manera Park Ranger Roger Solognier—ken ta un ranger di conservacion di biodiversidad terestial na ACF—ainda tin hopi cos cu no ta conoci den ciencia en general, y vooral tocante e Cascabel. Pa haya y chip nan lo yuda expertonan studia e Cascabel continuamente pasobra tur aña e data cu nan colecta por cambia. Cu e proyecto aki, ACF y Toledo Zoo ta studiando e ecologia di e Cascabel. Segun nan ta conta, nan ta animalnan crepuscular, pasobra nan ta mas observable mainta trempan of atardi laat ora solo baha. Otro parti di nan investigacion tocante e colebra endemico aki ta nan habito alimentario, nan movemento durante dia, unda nan ta sconde den temporadanan seco y calor, ki retonan nan ta enfrenta den salvahe, como tambe nan patronchi di broei. Pa esaki, a enfatisa cu e expertonan di The Toledo Zoo lo cuminsa tuma muestra di sanger di e Cascabel pa por observa algun rastro di endogamia (inbreeding), mirando cu tin un poblacion chikito concentra riba un parti chikito riba e isla. Gordon ta splica cu loke nan ta siñando tocante e Cascabel den captividad por ta util pa por implementa den salvahe. Manera a menciona, e meta ta pa mantene e poblacion stabiel.

A conta cu e bishita aki en particular ta unico debi na un metodo nobo cu a ser introduci na Aruba pa sondeo di Cascabel, esta e uso di un drone special pa por yuda detecta e Cascabelnan y nan movemento. Dr. Paul Keenlace di e departamento di biologia na Grand Valley St. University a splica cu ya e tin algun aña ta trahando riba diferente manera con pa utilisa drone pa por studia bida salvahe. E drone cu a ser usa den e sondeo di Cascabel den e ultimo par simannan ta acompaña cu dos diferente camara, un camara normal y otro termico. E camara termico tabata mas efectivo durante curso di dia pasobra ora bira cayente, e cascabel por keda scondi te ora solo baha. E camara termico por detecta nan usando sensor cu por distingui nivelnan di temperatura. Manera Keenlance a splica, hopi biaha e Cascabel lo ta mas friu compara cu e suelo e ora, unda e por aparece riba camara den un color mas cla. Keenlace a pronostica cu e tipo di tecnologia aki lo bira mas y mas comun den e tereno di conservacion.

Aunke tecnologianan nobo por ofrece un bista mas profundo den estudio di nos ecosistema, e expertonan ta subraya cu e parti humano ta keda importante tambe. Manera Cross a bisa, “conservacion ta un asunto di hende. Nos mester influencia nos mesun comportamento y nos a mira cu humano tin un impacto grandi riba conservacion, sea bon of malo.”

P’esey conscientisacion ta keda un mision grandi den e mundo di conservacion pasobra hende mester sa ki tipo di accion nan mester ta tumando, manera Solognier a enfatisa. Y esaki por ta accionnan simple, manera piki bo sushi of y no causa daño na habitatnan. Tambe ta importante pa cambia e narativa di intervencion humano. Ta conoci cu sernan humano por presenta e menasa mas grandi pa naturalesa, pero nan por ta tambe e guardian y defensor mas grandi. Nos mester ta orguyoso y celebra e hecho cu nos tin un especie unico manera e Cascabel riba nos isla, en bes di busca manera pa captura of tuma nan maraca. Aprecia e experencia unico di mira un Cascabel, como cu nan ta hopi incomun, specialmente den areanan pobla. E expertonan ta boga pa aprecia e momentonan aki, y tuma cuido pa no stroba e animal of nan habitat.

Hende tambe por yuda protege e Cascabel y otro animalnan riba nos isla por medio di usa e Wildlife Hotline di ACF. E organisacion ta urgi pa tuma contacto cu nan via e hotline ora mira un cascabel, specialmente den areanan unda no ta conoci pa mira nan. Esakinan tur por ta data util pa mas investigacion.

Por contacta ACF via e hotline na 592-4476. A splica cu e organisacion no ta tuma yamada via Whatsapp pa motibo cu e ranger den contacto por ta ocupa cu tareanan den e parke of kisas no tin conexion den e parke. Den casonan di emergencia, ta conseha pa yama e departamento di ACF directamente.

Potretnan di ACF.