Siman pasa presidente di Stichting Parkietenbos, Sr. Aldrich Croes, a trece dilanti e preocupacion di e fundacion tocante e continuo contaminacion di holor den bario di Simeon Antonio y otronan den e area. Cu esaki, e fundacion atrobe ta haci yamado na gobierno pa aborda e situacion cu cada bes ta poniendo salud di e comunidad na riesgo.
E topico di contaminacion di holor a surgi den un entrevista entre e fundacion y un otro medio noticiero, unda e presidente di Stichting Parkietenbos a adverti di e consecuencianan cu esaki tin pa e comunidad den bisindario. Segun e presidente ta splica den e entrevista, e bario di Simeon Antonio ta keda e area mas afecta pa contaminacion di holor. Gran parti di e habitantenan di e bario aki ta consisti di adultonan mayor y personanan cu ta sufri di entre otro cancer y asma, manera Sr. Croes a agrega.
Den e ultimo dianan, e area a nota un cambio den biento debi na e temporada di mal tempo causa pa e tormenta tropical Melissa cu ta pasando den Caribe. E cambio aki den biento, segun Sr. Croes ta splica, ta trece cune contaminacion di aire di varios fuente. Segun a enfatisa, actualmente e biento ta bin di pazuid y pabao, cual ta trece aire di lama ademas di aire di desperdicio cu ta bin for di e dump na Parkietenbos. Pero Sr. Croes ta splica cu cualkier direccion di biento ta trece aire contamina, debi na e tres fuente den e area cu segun e ta bisa ta contribuyendo na e contaminacion.
Ademas di e dump di Parkietenbos, Sr. Croes ta splica cu e comunidad tambe ta biba den aire contamina cu ta bin for di e sector industrial na Barcadera, como tambe di e sitio di desperdicio na Ser’i Teishi. Den un visualisacion, Sr. Croes ta mustra con e aire contamina ta biaha y ta dal net den direccion di e comunidad bibando den cercania.
Bon Dia Aruba a publica varios articulo tocante e topico aki, y e fundacion tin varios aña ta haci yamado na gobierno pa atende cu e situacion y provee un solucion rapidamente pa bienestar di comunidad. Sr. Croes ta agrega cu e tambe ta preocupa pa e famianan nobo cu ta bin biba den bisindario, esta den e bario nobo di Buena Vista. Aki ta trata di muchanan y parehanan hoben cu ta bin crea un bida den e comunidad, pero cu tambe ta “condena…na no tin aire limpi pa hala rosea.”
Manera a conta, varios aña pasa e fundacion a boga fuertemente pa trece un solucion, te hiba e caso na corte, unda al fin un empresa Mericano a evalua un resolucion y a priminti na comunidad un “sero berde cu un hardin riba dje,” Sr. Croes a conta. Sinembargo, no a mira ningun esfuerso for di gobierno anterior, y e fundacion atrobe ta haci yamado na gobierno nobo pa reuni y bin cu un solucion pa e problema dañino aki.
Na Ser’i Teishi, e fundacion ta pidi pa stop cu deramento di desperdicio mas pronto posible pasobra e ta crea pa e comunidad un aire contamina di mainta trempan caba. Den gran parti di mundo, deramento di desperdicio los no ta permiti, debi na e consecuencianan peligroso cu esaki por trece na salud humano y medio ambiente.
E sitio di procesamento na Ser’i Teishi ta consisti di un deposito di loke ta yama ‘envirobales’, cual ta un metodo nobo y—segun investigacionnan publica mundialmente—mas sostenible pa procesa desperdicionan reciclable. Segun informacion tocante envirobales, den e proceso aki desperdicio ta ser compacta den forma di cubiconan y ta wordo empaketa den saconan grandi pa por ser hiba na sitionan di deposito. Segun informacion di empresanan Mericano, envirobales ta diseña pa maximalisa productividad sin costo extra, y alabes elimina holor of riesgo di plamamento di sushi, cual ta comun den e metodo tradicional di compacta sushi. E metodo aki ta ser usa mayormente pa desperdicio di carton y papel; plastic; aluminio y metal, y otro tipo di desperdicio seco. Segun empresa local EcoTech, na Aruba e desperdicionan aki ta wordo separa na man y cualkier rastro di desperdicio kimico ta ser manda na SERLIMAR pa ser procesa segun nan instruccion. E envirobales despues ta ser hiba na e sitio di deposito designa pa gobierno di Aruba.
Den un comunicado manda diadomingo atardi, e empresa local a splica cu a haci varios analisis independiente riba e calidad di aire na diferente sitio rond Ser’i Teishi, y segun nan ta afirma, resultadonan ta mustra cu no tin ningun rastro di contaminacion ambiental den e aire relaciona cu e operacion di envirobales na Ser’i Teishi. Ademas, segun e empresa ta splica, frecuentemente e ta laga laboratorionan independiente na Merca analisa cualkier instancia di contaminacion den e envirobales mes, cada bes ta resulta tambe cu no tin ningun rastro toxico cu ta tumando luga cu e metodo aki.
Asina mes e problema di contaminacion ta keda predominante den e bisindario, debi na e sero di sushi cu ta keda exponi na Parkietenbos. Reportera di Bon Dia Aruba no por a haya estadisticonan local riba salud di pueblo cu ta enfoca riba contaminacion di aire, pero segun e Organisacion Mundial di Salud ta splica, contaminacion di aire a largo plazo por aumenta riesgo di malesa, manera infeccionnan respiratorio, problema cu curason, stroke y cancer di pulmon pa hende cu ta malo caba. Ademas, contaminacion di aire por aumenta riesgo di mortalidad na nacemento, perdida di bariga y condicionnan neurologico manera discapacidad cognitivo y demencia.
Sr. Croes di Stichting Parkietenbos a urgi den su entrevista pa e minister encarga sinta cu nan pa por trece un solucion na e problema continuo aki, y cu di nan parti nan ta cla pa comparti nan proposicion con pa aborda e situacion.
