Periodicamente gobierno di Aruba conhuntamente cu Ministerio di Asuntonan Exterior di Reino Hulandes ta sigui di cerca e desaroyonan na e paisnan den nos region. E situacion na Venezuela y Haiti ta sigui ta un punto di preocupacion y anteriormente Departamento di Relacionnan Exterior a informa cu e areanan alarmante ta marca cu codigo cora y oranje.

Awendia nos ta informa cu full e mapa di tanto Venezuela como Haiti ta marca cu codigo cora. Un region marca cu codigo cora ta significa cu ta desconseha pa biaha pa e area. Den caso cu un persona dicidi di biaha pa e area aki y haya su mes den un problema, embahada Hulandes na e pais den e caso aki lo no por brinda ayudo.

Cada conseho di biahe tin un color, cual por ta berde, geel, oraño of cora. Den algun caso ta posible pa tin diferente color riba un solo pais. Por ehempel, cierto parti di un pais ta safe pa bishita mientras cu otro partinan no ta safe.

E conseho general ta pa semper biaha solamente na paisnan of areanan cu tin color berde of geel. Claramente semper ta tene na cuenta cu e situacion por cambia den tur pais y area, cual ta haci importante pa keda pendiente di e conseho di biahe hasta si ya caba ta den e pais concerni caba.

Pa loke ta trata Venezuela, entre e motibonan pa e conseho ta nombra detencionnan arbitrario. E conseho ta splica cu desde e eleccion presidencial di aña pasa, tin inkietud den henter Venezuela. E situacion ta uno cu no por plania p’e y stranheronan na Venezuela ta core un riesgo halto di ser deteni sin algun motibo cla. Recientemente, varios ciudadano di paisnan occidental a ser deteni sin un motibo cla. Ciudadanonan Hulandes tambe ta core e riesgo aki.

E detencionnan tambe ta tuma luga den awa y ta suciediendo cerca di awanan di Guyana, cual Venezuela ta bisa ta pertenec’e.

E chens di ricibi un huicio husto tambe ta bastante chikito, y e splicacion ta alerta cu e gobierno Hulandes posiblemente no por yuda, y si por haci esaki por ta di un manera sumamente limita.

Tambe ta alerta pa no nabega pa motibonan recreacional den awanan teritorial di Venezuela, e zona cerca di e awanan teritorial, Venezuela su zona economico exclusivo y e awanan cu ta nort di e region Essequibo di Guyana.

E conseho ta alerta tambe cu na Venezuela tin e riesgo di manifestacionnan cu por bira violento. Di tal manera, cu te hasta transport publico y servicio di banco of gubernamental por ricibi estorbo of ser para. Ademas, ta haci mencion na e peligronan di seguridad pa loke ta trata robonan y agresion.

Entre otro, e conseho ta menciona tambe corupcion den agentenan policial, obligacion di identificacion, prohibicion di saca potret di cierto edificio y te hasta un advertencia pa personanan cu ta parti di e comunidad LGBTQ. E ta detaya cu aunke relacionnan sexual entre personanan di mesun sexo no ta prohibi pa ley den Venezuela, ta core e riesgo di cay victima di agresion y discriminacion a causa di esaki, te hasta mencionando cu esnan transgenero ta cay victima di violencia di polis.

Den caso di Haiti, e conseho ta menciona e violencia andando den henter e pais. E ta detaya cu gruponan arma a ataka, entre otro, Haiti su prison mas grandi y e aeropuerto internacional. Varios area di e pais ta bao control caba di e gangnan arma. E violencia amplio y aleatorio aki ta contra e ciudadanonan y bishitantenan tambe, cu secuestronan tumando luga cu frecuencia.

E situacion di siguridad na Haiti ta instabil y no por anticipa esaki tampoco. Di tal manera cu actualmente tin un estado di emergencia activo den henter e pais.

Ademas di esaki, ta menciona cu trafico aereo internacional tin desde maart di 2024 para. E aeropuerto na Port-au-Prince a ser ataca varios biaha pa e gruponan arma aki, y solamente aerolineanan chikito regional ta opera un cantidad chikito di vulelo for di e aeropuerto Cap-Haitien.

A causa di e situacion precario di seguridad den e pais, operacionnan di alivio y sosten humanitario ta den riesgo. Varios ciudadano di e pais ta depende riba e sosten aki, sinembargo a causa di un falta di petroleo y costonan den aumento, escasez di cuminda ta empeorando.

Tambe a menciona e hecho cu Haiti ta na e frontera cu Republica Dominicana y cu esaki actualmente ta cera y no ta cla si por crusa e frontera di Haiti pa drenta Republica Dominicana cu un paspoort Hulandes.

Di mesun manera cu Venezuela, e conseho pa Haiti tambe ta haci mencion di e hecho cu henter Haiti ta inkieto actualmente, cu manifestacionnan tumando luga frecuentemente. Esaki hopi biaha ta involucra violencia y por resulta di ta fatal.

E conseho ta pidi pa evita aglomeracion di hende y manifestacionnan. Ademas di esaki, tambe a menciona lo mas mira di e pais cu ta e criminalidad. Di esaki, ta splica cu actualmente tin hopi crimen violento relaciona cu droga den e pais. Robo, blokeo di caya, violacion, secuestro y asesinato ta sucede diariamente den henter e pais. Gangnan ta sumamente arma y ta specialmente peligroso algun bario di e capital, Port-au-Prince.

Tambe a menciona e tormentanan y horcannan, teremoto y demas situacionnan cu por surgi den naturalesa, cual tambe ta contribui na e codigo di e pais y advertencia pa e personanan cu ta forma parti di e comunidad LGBTQ, mencionando e mesun splicacion di posible discriminacion y agresion a base di e persona su sexualidad.

Ministerio di Asuntonan Exterior di Reino Hulandes ta alerta tur persona di nacionalidad Hulandes y tur esnan residencia legalmente na Aruba pa bou di ningun circunstancia biaha pa un zona marca cu codigo cora, den e caso aki Haiti y Venezuela. E Departamento di Relacionnan Exterior a ricibi informacion tocante varios suceso cu turista y entre esnan mas afecta ta turistanan cu ta bay bishita familiarnan.

Personanan di nacionalidad Hulandes y/of cu ta residencia legalmente na Aruba cu tin pensa di biaha of ta haya nan mes caba na Venezuela of Haiti of un pais cu tin un region marca cu codigo cora por registra nan mes via e servicio di informacion. Di e forma aki Reino Hulandes por tin un bista di e cantidad di persona cu ta na e pais pa asina por mantene tur na altura di cualkier desaroyo y por duna nan conseho.

Conseho di biahe:

Den caso cu dicidi di biaha toch pa region marca cu codigo cora of oranje, embahada di Reino Hulandes ta enfatisa cu den caso di un incidente no por garantisa asistencia y cu ayudo consular ta hopi limita. Alabes ta informa cu seguronan di biahe ta adverti pa no biaha pa Venezuela of un pais unda cu tin guera of conflicto andando. Tin un chens grandi cu biaheronan no ta sigura den paisnan cu codigo cora.

Den caso cu ya caba ta den Venezuela, e conseho ta bisa pa sali for di e pais si bo por haci esaki di manera safe. Tambe ta bisa cu mester mantene den consideracion cu tin tambe evaluacionnan y detencionnan na e frontera. Den caso cu ya caba ta na Haiti, tambe ta conseha pa sali for di e pais di manera safe si por, y contacta e embahada concerni pa por ricibi asistencia.

Pa mas informacion encuanto conseho di biahe por acudi na e link di e website di Ministerio di Asuntonan Exterior di Reino Hulandes: https://www.nederlandwereldwijd.nl/reisadvies.

Potretnan di The Associated Press.