Anteriormente nos a trece dilanti e hecho cu e atakenan aereo di Merca den Caribe no ta legal segun ley internacional, sinembargo mientras cu esaki ta un banda di e impacto di e atakenan aki. Tambe tin e otro banda cu mester considera, cual ta e contaminacion di e bida marino unda e bomnan aki ta cay.

Conflicto arma ta e acto di guera genera pa dos of mas grupo gubernamental, gruponan no gubernamental of estadonan internacional cu generalmente ta involucra un combinacion di accion militar activo—den e caso aki, agresion aereo, operacionnan cu barco naval of forsanan riba tera. Esaki ta loke nos ta mirando den region Caribe ultimo temponan, un conflicto arma contra botonan sospecha di trafico di droga, pero den e caso aki, di un solo banda. Hopi biaha, ecosistemanan natural tin e termino di “tereno” den terminologia militar y e ecosistema marino no ta un excepcion mirando cu hopi biaha den conflicto arma, atakenan aereo por tuma luga riba lama tambe, cual ta e caso cu nos ta mirando den Caribe.

Mientras cu tin tiki investigacion riba e impacto ambiental di atakenan cu ta tumando luga den Lama Caribense, e efectonan general di actividad militar riba ambientenan marino ta inclui daño significante causa pa energia acustico of shockwave. Ademas di esaki, tin e destruccion di habitat bao awa y contaminacion kimico.

E impactonan aki ta posee un menasa grandi na e region cu ecosistema y bida marino cu ya caba tin tempo sensitivo y vulnerable, manera e coral y poblacion di mamifero marino.

E detonacion di municion y atakenan aereo cu bom den of cera di awa ta genera loke ta yama ‘shockwave’ poderoso y un energia acustico intenso cu por causa herida severo of te hasta morto na bida marino. Esaki ta inclui pisca, turtuga y mamifero marino, kendenan ta depende mayormente riba zonido pa comunicacion y nabegacion. E animalnan marino aki ta extra vulnerable na e tipo di impacto aki, pa motibo cu nan tin un sensitividad eleva na e shockwavenan.

Destruccion di habitat ta otro punto di peso, pa motibo cu golpi directo di municion por fisicamente destrui habitatnan marino critico, incluyendo coral sensitivo y loke ta yama ‘seagrass’, cual ta un punto esencial pa e reproduccion di cierto especie, ademas di su uso como un sitio safe pa por come of cria nan baby. E daño fisico aki tambe ta stroba un balans delicado di e ecosistema marino y por tin un efecto cu ta duradero.

Contaminacion kimico tambe ta algo riba cual mester pone atencion. Actividadnan militar ta inclui e potencial di botonan cu ta hundi y e uso di explosivonan, cual por libera y emiti un gran cantidad di substancia toxico den e ambiente marino. Esaki por ta resto di material explosivo, metalnan pisa y te hasta derame di azeta of petroleo. Tur esaki ta contene kimiconan cu por envenena e bida marino, por acumula den e cadena alimenticio y degrada e calidad di awa, impactando ambos bida marino y posiblemente te hasta salud humano si no atende esaki.

E estorbo general di ecosistema causa pa actividad militar, incluyendo trafico marino aumenta y e introduccion di materialnan cu usualmente no ta den e areanan aki, por causa stress tambe riba e poblacion marino. Matanan marino y bestia tambe por sufri di esaki a causa di cambio den e condicion di nan habitat. Na su turno, esaki por causa cambio den nan comportamento y facilita tambe e introduccion di especienan invasivo.

E lama di Caribe ta cas di un cantidad sumamente diverso di ecosistema marino, cual ya caba ta enfrenta presionnan existente for di cambio di clima, contaminacion marino general y sobrepesca. E stress agrega di atakenan aereo y otro accion militar ta empeora e vulnerabilidadnan agrega aki, posiblemente pushando e especienan y habitatnan ya caba menasa den un caida ireversible.