For di luna di maart, Ministerio di Turismo conhuntamente cu demas partner ta monitor e mercado Mericano, specificamente e administracion di Trump. A introduci un tarifa nobo riba importacion cu a premira cu lo por tabatin impacto riba e patronchi di gasta di nos turistanan.
Conhuntamente cu Aruba Tourism Authority, a desaroya un documento cu ta hiba e nomber di “Con pa nabega e efectonan di Trump”. A sigui intensifica e esfuersonan y canalisa nos energianan riba diversificacion y consolidacion. Minister di Turismo conhuntamente cu ATA, AAA tabata presente na Bogota pa busca e oportunidadnan y sigui inverti den e exito di e mercado, di e manera aki demostrando liderazgo.
Diahuebs atardi, Minister di Turismo mr. Wendrick Cicilia tabatin un combersacion cu Ronella Croes di ATA, Tisa LaSorte di AHATA y Jo-Anne Arends di AAA y diabierna mainta tabatin un combersacion cu Zulema Erasmus-Dabian kende ta Minister Plenipotenciario di Merca. E meta tras di e combersacionnan ta pa keda den un dialogo continuo, di e manera aki por comparti inteligencia, informacion y colectivamente monitor e situacion na Merca.
Desde 1 di october, Gobierno Mericano a paralisa (Government Shutdown) pa motibo di un disputa entre e Republicanonan y e Democratanan tocante e presupuesto pa financia e servicionan gubernamental, un presupuesto cu no a conta cu aprobacion. E ‘shutdown’ aki a bira un di esunnan di mas largo pa e historia politico di Merca. Pa motibo di e ‘shutdown’, e empleadonan federal no ta ricibi nan pago mensual. Ayera FAA y Secretario di Transporte a anuncia cu pa garantisa e siguridad di e vuelonan domestico y interno y tambe pa alivia e presion riba e controladonan di trafico aereo, a dicidi pa reduci e vuelonan domestico interno cu 10%.
Na e momentonan aki no tin niun efecto preocupante pa Aruba. Ministerio di Turismo ta keda den contacto cu tur partner mientras ta monitor e situacion na Merca.
