Dialuna di 10 di november, Corte Superior di Husticia e condena e dama J.R.G pa instiga e asesinato di Sergio Maduro cu a tuma luga 24 di december 2023 na Matidiviri. Anteriormente, hues den Prome Instancia a conden’e pa 18 aña den prison, cual e condenado a apela.
E sentencia aki a bin despues di a procesa e caso dia 21 di october. Manera Abogado-General Sra. Kardol a splica, e caso aki tabata trata e tema di instigacion. A splica cu esaki ta un termino huridico den cual ta compronde cu un persona a comete un acto y ta culpable. Sinembargo, e abogado-general tambe ta splica cu instigacion por consisti tambe di un persona cu ta instiga otro pa comete e acto criminal. Den e caso aki, corte a yega na e conclusion cu J.R.G tabata culpable di instiga e homber B.E.J.M. di comete e asesinato di Sergio Maduro.
Segun e abogado a conta, B.E.J.M a testigua cu en berdad el a haya pago pa comete e asesinato, pero cu e mes tabatin asina hopi rabia cu el a comete e asesinato. Corte mester a investiga si e asesinato a bin for di instigacion of di e rabia personal di B.E.J.M.
Ministerio Publico a conclui cu e declaracionnan di B.E.J.M. a surgi demasiado laat den e proceso y no ta pas cu tur e otro evidencianan cu ta punta na instigacion.
E caso
Diadomingo 24 di december den oranan di anochi cu pa mas o menos 7or central di polis a haya e notificacion cu lo tabatin un hende homber benta abao band’i caminda. Polis a informa cu nan a despacha un patruya na e sitio y tambe a notifica ambulance.
Na yegada di e patruya ta bin topa cu ken a identifica mas despues como Sergio Maduro di 44 aña di edad cu no tabata duna señal di bida. Ambulance tambe a presenta pero no por a haci nada mas. Pa 8:35 Dr. Texier a constata morto y autoridadnan a cuminsa mesora cu investigacion.
Dia 7 di februari 2024 a detene B.E.J.M. naci na Aruba di 37 aña di edad e tempo ey den relacion cu e asesinato. Par dia despues a detene e dama di inicial J.R.G. naci na Aruba di 39 aña di edad e tempo ey.
