Diahuebs 6 di november, den sede di Fundacion Contra Violencia Relacional (FCVR), a tuma lugar un conferencia di prensa den colaboracion cu Soroptimist Aruba, CEDEHM, DAS, Universidad di Aruba y Fundacion Respeta Mi. Durante e evento aki, a presenta e campaña internacional Orange the World & 16 Days of Activism, hunto cu e campaña local di conscientisacion cu lo inicia na Aruba dia 25 di november.

E campaña ‘Orange the World’ ta parti di un movecion mundial dedica na preveni y combati violencia basa riba genero. Durante diesseis dia, for di 25 di november (Dia Internacional contra Violencia contra hende muhe) te 10 di december (Dia Internacional di Derecho Humano), comunidadnan rond di mundo ta bira activo pa stimula reflexion, educacion y accion. E color oraño ta sirbi como un simbolo di speransa y claridad: un yamada pa protege dignidad y derechonan humano.

Pa Aruba y e organisacionnan participante, e campaña tin un significacion special. Violencia domestico y violencia den relacion ta sigui un reto social cu hopi biaha ta keda tapa pa motibo di berguensa of silencio. Door di traha hunto, e organisacionnan kier habri e dialogo, stimula un cultura di respet mutuo y reafirma cu cada hende merece siguransa y balor. E campaña ta pone enfasis riba importancia di prevencion: reconoce señal, busca informacion y ofrece sosten, ta pasonan fundamental pa crea cambio real den comunidad.

Durante conferencia di prensa a presenta un kalender di eventonan, cu ta contene tur actividad cu e organisacionnan lo organisa durante e 16 dia di activismo. E programa ta amplio y inclusivo, y ta inclui: presentacion informativo, un campaña tocante violencia digital riba rednan social, tayer y sesionnan di dialogo, seminario y congreso, un ‘film screening’ cu ‘panel discussion’, media training y varios otro actividad interesante na diferente lugar.

Cu esaki, e organisacionnan kier no solamente conscientisa, pero tambe fortifica conexion den comunidad. Meta final ta pa mas hende sa unda por haya yudansa, con por reconoce violencia, y con nos por traha hunto pa un Aruba mas sigur, husto y humano.

Mas informacion tocante e kalender y eventonan lo sigui ser comparti via media tradicional, rednan social como tambe via e diferente plataformanan di e organisacionnan colaborado.

Hunto nos ta kleur Aruba oraño. Hunto nos ta scoge pa seguridad, dignidad y igualdad.