E cuater ministernan di Husticia di Aruba, Corsou, Sint Maarten y Hulanda a reafirma nan compromiso pa combati crimen organisa, mehora cuido forensico, y harmonisa leynan di proteccion di data durante e Justitieel Vierpartijenoverleg (JVO) mas recien, cu a tuma luga dia 11 di september 2025 na Den Haag.

Recientemente Minister di Husticia y Seguridad Hulandes, Foort van Oosten, a entrega un carta na Tweede Kamer den cual e ta informa tocante e puntonan principal di e consulta aki entre e cuater paisnan di Reino.

E carta, cual e mandatario Hulandes a entrega na Tweede Kamer riba 10 di november, ta delinea resultadonan grandi y acuerdonan alcansa durante e reunion. E sesion di e aña aki a ser presidi pa Minister di Husticia, Integracion, Energia y Transporte Publico di Aruba, Arhtur Dowers (AVP), subrayando e naturalesa rotacional y cooperativo di e JVO.

Un di e temanan central di e reunion di september tabata e lucha conhunto contra crimen organisa, un tema cu ta sigui impacta tur parti di Reino. E ministernan a enfatisa un acercamento integral cu ta combina aplicacion di ley cu medidanan administrativo y preventivo.

E carta ta subraya cu, pa prome biaha, Boneiro, Sint Eustatius, y Saba—colectivamente conoci como Hulanda Caribense—ta participa den e grupo di trabao di JVO riba medidanan administrativo contra crimen organisa. Nan inclusion, describi como un “desaroyo logico y valioso,” ta refleha un conscientisacion creciente di vulnerabilidadnan comparti den tur e islanan.

Actualmente e grupo di trabao aki ta evaluando e protocol existente riba e acercamento administrativo pa cu crimen organisa den e partinan Caribense di Reino. E ministernan a bay di acuerdo pa papia tocante e resultadonan di e evaluacion na e siguiente JVO, programa pa januari 2026 na Sint Maarten.

E ministernan tambe a revisa e progreso di e Plataforma Multidisciplinario di Minamento di Region Caribense, un organo cu ta reuni instancianan di aplicacion di ley y di gobierno pa coordina esfuersonan contra criminalidad a traves di liñanan nacional. Sosteni financieramente pa e Ministerio di Husticia y Seguridad di Hulanda, e plataforma ta usa “criminaliteitsbeelden” (profielnan di inteligencia di criminalidad) basa riba dato pa compronde y stroba rednan criminal transnacional miho.

Un mocion cu Parlamento Hulandes a pasa na fin di 2024 a pidi un plan integral pa combati traficacion di droga den Hulanda. Contestando riba esaki, Minister Van Oosten a discuti cu su coleganan Caribense riba e necesidad di un inventarisacion profundo di e cooperacion continuo. E inventario aki lo cubri tanto “upstream” como “downstream disruption” — for di rutanan di produccion y transporte pa mercadonan di destinacion.

A base di e resultadonan, JVO lo determina si e cooperacion actual ta suficiente of mester ser intensifica. Di acuerdo cu minister Van Oosten, e resultado lo forma un strategia concreto y coordina pa frena entrada di droga, cumpliendo cu e mandato parlamentario.

Un preocupacion grandi cu a ser treci dilanti durante e reunion tabata e falta di cuido forensico y facilidadnan di rehabilitacion den e parti Caribense di Reino. E scarsedad di centronan di tratamento specialisa pa ofensornan cu necesidadnan psicologico of psikiatrico ta trece riesgonan di seguridad, e rapport ta adverti, y ta rekeri un contesta coordina urgente.

E ministernan a reafirma nan sosten pa un programa di varios aña riba cuido forensico, TBS (detencion psikiatrico), y P.I.J. (detencion hubenil) cu a inicia na mitar di 2024. E programa tin como meta pa fortalece capacidad di tratamento, comparti experticio, y establece sistemanan sostenibel pa rehabilitacion den henter e islanan.

Pa hiba esaki dilanti, e grupo di trabao di JVO lo nombra un gerente di programa pa coordina entre e cuater hurisdiccionnan. E oficial aki lo desaroya metanan general, un plan di programa integral, y asisti cada pais den traha su propio mapa di caminda den fase. Tambe e programa ta anticipa iniciativanan di training y educacion den henter Reino, beneficiando profesionalnan di husticia den tur teritorio Caribense. Hulanda a priminti sosten financiero pa e proyectonan aki basta nan ta na alinea cu e obhetivonan di e programa.

E ministernan a bay di acuerdo cu cuido forensico lo keda un punto di agenda permanente den reunionnan den futuro, cu e grupo di trabao ta informa progreso den cada sesion.

For di 2019, JVO a promove un iniciativa di profesionalisacion den seno di Openbaar Ministerie Carib (OM Carib), e servicio regional di Ministerio Publico. Un piedra angular di e esfuerso aki ta e programa “Officier in Opleiding” (OIO), un pista di training intensivo, personalisa diseña pa cultiva talento huridico local capaz di sirbi como fiscal den e region di Caribe.

E programa di OIO tin como meta pa reduci dependencia riba fiscal cu sede na Hulanda y garantisa un composicion mas balansa di OM Carib. Den e carta e mandatario Hulandes ta indica cu cuater candidato a completa e training cu exito, y cu e participante final ta spera di gradua pa fin di 2025. E ministernan a aproba caba un ciclo nobo di tres aña di e programa di OIO pa mantene e pipeline di fiscalnan local cualifica.

Otro logro alcansa durante e reunion tabata e revocacion formal di e Protocol di Voogs di 2006 entre Hulanda y ex- Antias Hulandes. E protocol tabata rekeri nombramento di voogdnan temporal pa menornan di edad sin compania cu ta muda for di e parti Caribense di Reino pa Hulanda.

Despues di un decision tuma na juni 2024, e ministernan a firma oficialmente e derogacion despues di e JVO aki. Avancenan den sistemanan di registro digital y e falta di hustificacion legal pa distincionnan geografico a haci e regulacion obsoleto. E movemento a ser aclama como un paso pa simplifica y modernisa proceduranan administrativo den henter Reino.

Minister Van Oosten a describi e cambio como “un ehempel positivo di elimina regulacion innecesario pa medio di dialogo mutuo na nivel ministerial.”

E ministernan tambe a reafirma nan compromiso pa harmonisa legislacion di proteccion di dato den tur cuater pais. E grupo di proyecto conhunto di JVO riba Harmonisacion di Proteccion di Dato ta trahando pa implementacion di e Convension 108+ di Conseho di Europa, un norma mundial pa salvaguardia dato personal den sistemanan automatisa.

Door di alinea nan cuadro legal, e partnernan di Reino tin como meta pa permiti compartimento di dato transfronteriso mas sigur y fortalece proteccionnan di privacidad di ciudadanonan. E siguiente fase di e proyecto aki lo enfoca riba leynan di implementacion nacional y sigura cu tur hurisdiccion ta cumpli cu e rekisitonan pa acceso na Convension 108+.

Fuera di asuntonan di politica, e JVO tambe ta sirbi como un mecanismo di gobernacion cu ta supervisa e plannan anual, presupuesto y rapportnan di varios institucion conhunto. Esaki ta inclui e Recherche Samenwerkingsteam (RST), e Stichting Beheer ICT Rechtshandhaving (SBIR), e Oficina di Fiscal-General, e Conseho pa Aplicacion di Ley, y e Corte Comun di Husticia.

Debi cu e reunion di september 2025 a ser reprograma for di su slot usual di januari, e discusionnan riba e documentonan aki a tuma luga mas laat cu normal. Hulanda a urgi tur partido pa finalisa y aproba rapport y presupuestonan pendiente pronto, enfatisando nan importancia pa funcionamento suave di institutonan di husticia den henter Reino.

Den su palabranan di clausura, Minister Van Oosten a subraya cu cooperacion di husticia ta keda vital pa mantene e estado di derecho y seguridad den henter Reino. “E paisnan dentro di nos Reino ta traha constructivamente y intensivamente hunto pa combati crimen organisa y fortalece nos sistemanan di husticia,” e minister a skirbi. “Mirando Hulanda su responsabilidad pa e cadena di husticia den Hulanda Caribense, e colaboracion estrecho aki cu Aruba, Corsou y Sint Maarten ta esencial.”

E siguiente Justitieel Vierpartijenoverleg lo tuma luga dia 14–16 di januari 2026 na Sint Maarten, caminda ta spera cu ministernan lo revisa e evaluacion di e protocol pa combati crimen y papia tocante progreso riba cuido forensico, proteccion di dato y training di fiscal.

E JVO ta ilustra con retonan comparti ta impulsando un aliniacion di politica mas grandi entre e cuater paisnan. For di e naturalesa transnacional di trafico di droga te na modernisacion di leynan di proteccion di dato, e discusionnan di e ministernan ta enfatisa e necesidad pa tanto autonomia nacional como responsabilidad colectivo den cuadro di Reino.

Pa hurisdiccionnan mas chikito JVO ta sigui sirbi como un luga critico pa comparti recurso y construccion di capacidad, specialmente riba terenonan specialisa manera cuido forensico y seguridad cibernetico. E inclusion di Hulanda Caribense den e grupo di trabao pa combatimento di criminalidad ta cera mas ainda e distanciamento entre e paisnan autonomo y e entidadnan publico, fomentando un ecosistema di husticia Caribense mas integra.