E CPI pa luna di September 2025 ta 109.17, cual ta representa un subida leve di 0.02% compara cu e indice di Augustus 2025 (109.14). E cambio di e CPI pa e ultimo diesdos (12) lunanan (September 2024 te cu September 2025) ta -0.4%, un caida di 1.9 punto di porcentahe (ppt) compara cu e periodo corespondiente di aña pasa (1.5%).

E promedio anual (ultimo 24 luna) di e tasa di inflacion pa e periodonan di September 2022 te cu September 2023 y September 2024 te cu September 2025 ta 0.2%, un caida di 1.8ppt compara cu e 2.0% registra den e periodonan di September 2021 te cu September 2022 y September 2023 te cu September 2024.

Durante e luna aki, cinco (5) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a ser registra pa e sectornan di “Restaurant y hotel” (3.0%) y “Mobilario” (0.8%), causando un efecto di respectivamente, 0.15 y 0.07 ppt. E subidanan den e sectornan restante a contribui cu un efecto di 0.08 ppt riba e CPI di September 2025.

E subidanan aki a ser contraresta parcialmente door di principalmente un caida den e indice di e sector di “Recreacion y cultura” (-2.0%) cu a contribui cu un efecto di -0.17 ppt riba e CPI di September 2025. E caidanan den e sectornan restante a contribui cu un efecto di -0.11 ppt riba e CPI di September 2025.

E subida den e sector di “Restaurant y hotel” a ser causa principalmente door di un subida di 159.6% den e categoria “Servicio di alohamento”, causando un efecto di 0.12 ppt. E subida den e sector di “Mobilario” a ser causa principalmente door di un subida den e categoria “Aparato pa uso domestico” (4.3%), causando un efecto di 0.08 ppt.

E caida den e sector di “Recreacion y cultura” a ser causa principalmente door di caida den e categorianan “Vacacion” (-4.3%) y “Otro articulo y ekipo pa recreacion, hardin y animal domestico” (-2.4%), causando un efecto di respectivamente, -0.09 y -0.06 ppt.

Canasta di consumo

E canasta di consumo di e CPI ta consisti di 408 bienes y servicionan. Compara cu Augustus 2025, 45.1% di e bienes y servicionan aki a conoce un aumento di prijs causando un efecto di 0.74 ppt, mientras cu 38.7% ta mustra un caida di prijs, cu a contribui cu un efecto di -0.71 ppt y pa e restante 16.2% no tabatin cambio den prijs.

Compara cu Augustus 2025, prijsnan di bienes (-0.2%) a conoce un caida y a causa un efecto di -0.11 ppt, mientras cu prijsnan di servicionan (0.3%) a registra un subida y a contribui cu un efecto di 0.13 ppt riba e CPI di September 2025.

Core inflation

E CPIC (core inflation) of e inflacion basico ta un porcion di e inflacion unda cierto articulonan cu tin movimientonan di prijsnan volatil ta wordo exclui, manera productonan alimenticio y energetico. Na momento cu e inflacion basico ser calcula, e componentenan mas volatil ta wordo eliminadi e inflacion total. E indice di e inflacion basico ta sirbi pa evalua e tendencia riba medio y largo plazo di e nivel general di prijsnan. Pa ahusta maneho monetario, hopi economista ta enfoca riba e tasa di e inflacion basico, como cu esaki ta permiti un evaluacion mas profundo di e procesonan di inflacion reciente den e economia.

Ta calcula CPIC door di compara e indice promedio di e periodo di e 12 lunanan mas reciente cu e promedio di e periodo di 12 lunanan anterior (Promedio anual).

Elaboracion di un CPI tin tres meta principal:

1. Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering.

2. Como un mecanismo pa ahusta componentenan di e producto domestico bruto (GDP) di termino nominal pa termino real den Cuentanan Nacional. (Por ehempel door di elimina e efectonan di cambionan di prijs di e balor di consumo).

3. Como un medio pa gobiernonan y/of banconan central fiha obhetivonan inflacionario.

E CPIC (core inflation) – CPI excluyendo e efecto di energia y cuminda – a registra na September 2025 un subida di 1.2%. E indice di energia – cu ta consisti di e productonan: electricidad, awa, gasolin y diesel – a registra un caida di 4.2%. E indice di cuminda a registra un subida di 0.8%.

Kico ta un “Bestaansminimum” y con ta ahusta esaki?

CBS ta defini un bestaansminimum como e nivel minimo di entrada cu ta wordo percibi necesario pa un persona of famia por funciona den sociedad di un manera adecuado y socialmente aceptabel.

Ora nos usa e definicion “Bestaansminimum”, en realidad ta referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta wordo considera necesario pa biba un bida liber di privacionnan basico” (Nacionnan Uni). Un indice a keda crea pa “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta wordo ahusta, a base di e prijsnan di alimento, paña, vivienda, transporte y otro articulonan den e canasta.

E bestaansminimum actual ta wordo basa riba e rapport “Bestaansminimum 2010” publica door di CBS na September 2010, y cual ta actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (di 0 pa 14 aña).

Bestaansminimum pa un hogar consistiendo di dos (2) adulto y dos (2) mucha (edad 0-15 aña) na September 2025 ta Afl. 5,521, un subida di Afl. 2 compara cu Augustus 2025 (Afl. 5,519). E

bestaansminimum pa un hogar di un (1) adulto ta Afl. 2,629, un subida di Afl. 1 compara cu Augustus 2025 (Afl. 2,628).