Riba diadomingo awo dia 16 di november 2025, Sinterklaas y su Pietnan lo yega Aruba den su barco na e terminal di Aruba Ports Authority (A.P.A.).
Gobierno di Aruba y Comision Celebracion Dianan Nacional di Aruba (C.C.D.N.) ta invita tur mayor y mucha pa bin yama Sinterklaas bonbini un biaha mas na Aruba. E portanan di A.P.A. su Cruise Terminal (Gate 5) banda di Welcome Plaza ta habri pa 2:00 PM pa publico por ricibi Sinterklaas acompaña pa mas di 100 Piet.
E barco ta programa pa yega den nos waf pa 3:00 di atardi, y Sinterklaas y su Pietnan lo baha y despues subi e Tram cual lo sali cu ambiente di musica y show di Piet direccion di Plaza La Linda den nos Caya Grandi. E ruta ta for di Welcome Plaza riba e spoor di tram pasa patras di Arubus Weststraat, Havenstraat, Plaza Daniel Leo drenta Caya Grandi.
E caravana di Sinterklaas lo yega na Plaza La Linda pa 4:00 PM caminda lo tin actividad pa tur mucha di entre otro; baile y show, sacamento di potret cu Sinterklaas, e weganan popular pa mucha y tambe un variedad di tent pa cumpra un variedad di cuminda y bebida pa refresca. E programa riba Plaza La Linda ta terminda pa 6:00 PM.
Ta pidi tur mayor pa tene cuenta cu nos muchanan cu entre otro proteccion pa e solo, cos pa refresca e curpa, proteha e oido y ta cauteloso pa e trafico y multitud presente. Diadomingo ta dia di famia, bin cu e muchanan pa disfruta di e yegada di Sinterklaas.
