E siman aki e topico di Agri-Innovation Park (AIP) a haya atencion publico atrobe despues cu a surgi critica di agricultornan pa loke a ser considera desinformacion di parti di gobierno pa cu e percepcion di agricultornan riba AIP. Bon Dia Aruba a publica un relato diaranson tocante e preocupacionnan di varios miembro di United Farmers Association (UFA) cu a surgi riba red social, y diabierna a logra tene un combersacion cu representantenan Sr. Emile Kelkboom y presidente Sr. Diego Acevedo, pa aclara kico e percepcion di UFA ta pa cu e proyecto AIP.

Manera a reporta anteriormente, den un comunicado manda pa gabinete AVP-FUTURO tocante un reunion recien entre UFA y minister di Sector Primario Geoffrey Wever, a afirma cu UFA a mustra interes den e concepto di Agri-Innovation Park (AIP). Sinembargo, varios agricultor a denuncia e declaracion aki, expresando nan frustracion cu e comunicado a manipula loke en berdad a ser expresa pa UFA. Segun presidente di UFA, Sr. Acevedo, a aclara cu UFA no tin opinion riba e proyecto di Agri-Innovation Park. E motibo principal pa esaki ta cu e no ta forma parti di e prioridadnan di e organisacion.

United Farmers Association (UFA) ta un plataforma unda miembronan agricultor por reuni pa pone atencion riba cierto punto importante pa nan operacion diario. Esaki ta inclui entre otro, tereno, awa y materialnan necesario pa cultivacion. E asociacion tin miembronan di diferente tipo di agricultura, por ehempel hydroponics, syntropics, cultivacion tradicional, micro greens etc.

Den e ultimo añanan UFA ta organisa reunionnan mensual cu miembronan, y su directiva tambe sa reuni regularmente pa por mira con por sigui traha riba e prioridadnan di agricultornan. UFA tin aproximadamente 40 miembro y tur por duna nan opinion pa cualkier asunto.

Manera a splica, tin un lista di preocupacion cu a comparti cu no solamente e gobierno aki, pero tambe cu otro gobiernonan den e ultimo 20 aña. Aunke por a mira algun mehoracion den e sector di Agricultura, specialmente pa loke ta trata suministro di awa pa cunukeronan, a conta cu e lista di prioridad a keda relativamente mescos pasobra te ainda no a mira gran progreso. Acevedo ta splica cu UFA ta sigui e actualisacionnan riba progreso cu ta tumando luga y kier sa kico ta e plan di gobierno. Y esey ta pakico a reuni cu minister Wever y otro ministernan relevante. Acevedo ta enfatisa cu UFA t’ey pa atende cu e preocupacionnan di agricultornan y cu nan kier pa e sector sigui bay dilanti.

Sinembargo, ainda ta existi un buraco den maneho di e sector.

Por ehempel, pa loke ta suministro di awa, ta berdad cu a mira algun mehoracion unda awor agricultornan ta paga apenas 5,50 pa cubico meter riba prijs di aansluitmeter. Na e otro banda, agricultornan ta haya awa limpi—demasiado limpi—cual ta causa cu agricultornan lo mester aloca casi 25 florin extra pa cada cubico meter pa asina pone fertilisacion den e awa pa e matanan por crece, manera Sr. Kelkboom a splica. “Nos no ta ciego riba e suma cu ta haya,” pero mester ta consciente di e otro retonan cu ta bin cune. Tambe a enfatisa cu ainda falta mehoracion den loke ta maneho di damnan.

Pues pa loke ta awa, e ta un stap, pero tin hopi mas pa haci, Acevedo ta afirma.

Algo otro cu a propone ta pa instala un interministrieele werkgroup cu e ministerio di Sector Primario y Infrastructura pa traha riba e prioridadnan di agricultornan, specialmente pa loke ta trata obtencion di tereno.

E presidente di UFA ta splica cu actualmente no tin suficiente personal na DIP pa otorga tereno, pues agricultornan ta keda warda pa añas sin haya contesta pasobra no tin hende pa trata nan necesidad. Segun e ta bisa, no tin ni hende pa traha un ‘invoice’ pa haci e extension di huurgrond.

Esaki ta causa cu cunukeronan ta sigui inverti asina mes den e tereno, pero ta keda incierto si gobierno lo bin kit’e. Aki ta trata di terenonan publico cu agricultornan ta usa pa plantamento, y no sa unda mas pa bay pa logra haya un extension. Pues esaki ta kico UFA ta haya importante y loke ta cay bao di nan prioridad. Pa nan, loke ta importante ta pa sigui duna informacion riba kico e necesidadnan ta di e agricultornan den e sector di un manera husto.

Otro cosnan (manera e proyecto AIP) ta extra. Ta p’esey UFA no tin opinion riba e proyecto aki.

Sr. Acevedo a expresa cu e ta hay’e jammer cu den media e asunto sa cambia di enfoke ora ta bin cu proyectonan grandi manera e AIP. UFA ta enfatisa cu aunke AIP por ta beneficioso, e ta den fase di estudio ainda, y nan kier sigui traha y boga pa asina e prioridadnan cu a trece dilanti pa añas caba no keda atras. Cu esaki nan ta subraya e parti di inversion husto. Por ehempel, e glasshouses den e vision di AIP lo traha cu sistema di hydroponics, cual ya a menciona diaranson no ta adecua pa tur tipo di trabao agricola. UFA kier pa tur agricultor haya nan pida di e bolo.

Loke nan ta ripara si ta cu pa atende e prioridadnan, mester acerca no solamente minister di Sector Primario, pero sino tur otro cu ta encarga cu carteranan relevante. Manera Kelkboom ta enfatisa, “Tur mester ta riba un liña.”

A pesar di a tende sentimentonan similar di gobierno y fraccionnan den parlamento pa loke ta e necesidad pa mehora cierto sector relevante, ainda no ta mirando accion concreto. “Y esaki ta e parti tristo,” Acevedo a bisa.

E organisacion ta enfatisa cu e ta haya ta importante pa tin accion y pa por tin mas transparencia. Nan ta boga pa actualisacion regular tocante e progreso cu ta tumando luga. Y esaki ta kico e organisacion tabata kiermen ora a expresa nan “interes” den AIP. Manera Acevedo a aclara, “Mustra interes no kiermen nos kier, mustra interes kiermen nos kier sa [mas].” Banda di esey, ta enfatisa atrobe cu no tin opinion riba e proyecto y no tin prioridad pa ta envolvi den esaki.

Den perspectiva di UFA, e proyecto di AIP por ta un bon idea pa cunukeronan, pero e no ta abordando directamente e prioridadnan cu agricultornan ta pushando p’e pa añas. Aunke si a mira cambio den cosnan chikito y unda por, ainda falta hopi trabao.

Manera e presidente a subraya, hende cu ta traha den Agricultura ta hende balente, y e trabao no ta facil. P’esey ta importante pa keda bringa pa e sector. Tambe ta importante pa keda pusha pa educacion, specialmente ora enfrenta retonan global (manera un pandemia) of regional (conflicto geopolitico). Manera Kelkboom a splica, mester busca pa tin tanto porciento di sostenibilidad den e sector pa ora enfrenta retonan, e sector por keda fuerte y Aruba por confia cu seguridad alimentario.