Gobierno recientemente a dicidi di haci un excepcion pa salario di e CEO di AAA NV, cu Royal Schiphol Group ta presenta. E obstaculo cu mester a tuma ta e ley pa impone norma pa ingreso di empleado top di gobernacion y e entidadnan liga na Pais Aruba. Como persona huridico di propiedad di Pais Aruba, AAA NV ta cay bao di definicion di e ley(Landsverordening Normering Topinkomens; AB 2022 no. 91).

E caso di AAA NV, cu ta argumenta cu pa e suma estableci den e ley, no ta posible atrae un persona cu e experticio necesario, a haya aprobacion di gobierno, loke a conduci na un decreto a base di articulo 12 di e ley menciona, unda e suma pa e salario anual a keda estableci na Afl. 1.089.396. E asunto aki ta yama cierto pregunta y otro pregunta no. E pregunta cu e no ta yama ta si ta dificil pa haya un persona cu e background adecua pa e salario, cu ta basa riba 130% di e salario di promer ministro di Aruba, y cu den e version vigente di e ley ta menciona como Afl. 329.000 pa aña. Ta bien posible cu e suma ey no ta atractivo pa un persona cu mester bin di exterior pa tuma e puesto aki. Pues aki nos no ta bay discuti e punto si ta absolutamente necesario cu ta bin un persona di exterior.

Loke si ta discutible ta pakico e persona ey mester haya un salario cu ta na mesun nivel cu esun di e CEO di Schiphol Group mes, cu tabata pa 2024 na poco mas di 480.000 euro. Dependiendo di e tasa di cambio e suma na florin ta (casi) igual na e salario di e CEO di Schiphol. Pa por averigua si e salario na Aruba ta proporcional, ta razonable haci un comparacion entre e magnitud di e dos operacionnan aki, pa por tin un idea di e responsabilidadnan gerencial, y por lo tanto e remuneracion corespondiente. Segun cifra di Schiphol Group, na 2024 e aeropuerto, un di esunnan mas grandi na Europa, a maneha un cantidad di 66,7 miyon pasahero. E aeropuerto na Aruba lo a maneha alrededor di 1,5 miyon pasahero. Schiphol ta un operacion di 24/7, cu mas di 470.000 vuelo entrante y saliente anualmente. Aeropuerto di Aruba ta un operacion considerable den nos region, pero leu di loke Schiphol ta representa.Esey ta haci cu e responsabilidadnan di e CEO di Schiphol ta mucho mas grandi cu e CEO di AAA, manehando un operacion cu ta por lo menos cuarenta biaha mas grandi cu loke AAA NV ta representa. Lo ta interesante pa haya sa pakico Schiphol Group ta haya cu e puesto na Aruba lo mester ta na mesun nivel di remuneracion cu nan CEO na Hulanda; un pregunta cu realmente gobierno lo mester contesta, ya cu nan sa pakico nan a acepta e argumento(nan) di e empresa.

Nos por a comprende cu Schiphol Group a pone riba mesa nan ‘conditio sine qua non’ loke a haci cu gobierno di Aruba tabata den un ‘straight jacket’ pasobra bisa ‘no’ lo a significa terminacion di e relacion cu Schiphol Group. Y confronta cu e situacion gobierno a haci uso di e posibilidad den e ley di haci excepcion – den articulo 12 – pa facilita e asunto aki.

Pero, kico esaki por tin como consecuencia, pasobra e imposicion di e ley aki no a bay sin protesta. Varios entidad, manera Banco Central, APFA, Stichting Ziekenverpleging Aruba (SZA) y Aruba Tourism Authority (ATA) ta busca pa haya nan caso tambe reconoci y negacion di banda di gobierno riba nan peticionlo resulta den caso den corte. Mientras ta dificil pa predeci con cada caso den corte lo bay cana, ta mas cu obvio cu un argumento gobierno no por usa: esey ta e comparacion di tamaño y escala di operacion cu un director o CEO ta maneha na Aruba, compara cu otro caso den exterior, pasobra aki e abismo den tamaño di operacion den e caso aki lo bay traha na fabor di e entidad cu ta desafia gobierno den corte.Y unavez gobierno perde un caso den corte, ta bira mas facil pa e siguientenan gana tambe, pasobra nan lo por dispone di e hurisprudencia ey. Esaki naturalmente tumando na cuenta e particularidadnan di cada caso, loke no ta garantia pa victoria. Tambe mester tene cuenta cu otro asunto aki, esta cu articulo 12, inciso 2 ta stipula cu den caso di un tal peticion pa excepcion, gobierno mester duna contesta dentro di 12 siman y mester publica esaki den Landscourant. Nos tin entendi cu tin caso di peticion cu nunca a haya contesta di e ministro concerni, un argumento mas di regalo…

Ademas e caso aki ta trece atencion atrobe riba otro caso den gobernacion unda salario no competitivo ta hunga un papel. Por ehemplo, e remuneracion di specialista financiero, cu segun loke nos ta tende pa hopi aña caba, ta obstaculiza e contratacion di e tipo di profesional aki, cu ta clave pa mehoracion di nos administracion financiero gubernamental. Con ta bay keda argumenta cu no por contrata nan pasobra ‘nan kier cobra di mas’?

Henter e suceso aki y loke por bay tuma lugar, den deliberacion cu gobierno, y si no logra, dilanti huez, por significa un berdadero bom bao di e ley cu a keda fabrica den pura den tempo di crisis di Covid y cu no a haya bon recepcion cerca Raad van Advies tampoco. Parce cu e problema apenas a cuminza…