Lider di fraccion AVP, Jennifer Arends-Reyes Cinco aña di retraso den cuentanan publico ta debilita control parlamentario

Fraccion AVP, bao di liderazgo di parlamentario Jennifer Arends-Reyes, ta di opinion cu exploitatierekening di aña 2018 y 2019 ta refleha e estado real di finanzas publico, cu ta fundamental pa transparencia, control y evaluacion di nos maneho fiscal. E realidad, sin embargo, ta cu nan a yega cu retraso di mas cu cinco aña.

Arends-Reyes ta enfatisa cu 2018 y 2019 tabata añanan crucial den nos historia reciente. Tabata añanan pre-pandemia, ora a tuma hopi decision importante cu tin impacto directo riba nos pueblo, nos empleadonan publico y sector priva. E tardansa grandi den entrega ta pone Parlamento den un posicion limita pa evalua y haci control parlamentario efectivo, cu no ta na beneficio di un pais cu tin mester di claridad den su contabilidad publico.

Den un analisis responsabel di e cifranan, AVP ta observa cu 2018 a presenta un aumento continuo den gasto publico, sin cu entrada a sigui e mesun ritmo. E deficit presupuestario a sigui crece, indicando falta di un maneho riguroso. E mesun patronchi a ripiti den 2019: gasto grandi den aparato gubernamental, poco evaluacion di eficiencia y ingreso cu no ta subi proporcionalmente, aunke a nota un mehoracion.

“E exploitatierekeningnan aki ta mustra un les importante: Aruba tin mester di un structura fiscal sostenibel,” segun Arends-Reyes. “Tabatin hopi salida di fondo, y no tabatin un sistema di control interno suficientemente fuerte. Si tin vacatura, mester yena nan. Y nos gobierno mester adopta un cultura cu ta evalua gasto riba su impacto real riba bienestar di nos pueblo.”

Fraccion AVP ta insisti riba implementacion di un cuadro di planificacion fiscal cu ta continuo, husto y orienta riba resultado. Aruba no por sigui haci prestamo pa cubri gasto operacional, mientras nos ciudadano ta sufri austeridad y limitacion den servicionan basico. Planificacion no por ta basa solamente riba optimismo; mester contempla diferente escenario y prepara pa risiconan cu nos por enfrenta.

“Exploitatierekening 2018 y 2019 ta basicamente un check atrasa — pero e aprendisahe aki mester guia nos pa futuro,” ta conclui Arends-Reyes. “Nos ta pidi gobierno pa tuma nota di pasado y continua cu e inhaalslag pa nan yega na tempo. Bienestar di nos comunidad mester keda central den tur decision.”