(Infobae)—Reino Uni a presenta un strategia nacional pa elimina progresivamente prueba cu animal den investigacionnan biomedico, fihando riba un fecha exacto y estableciendo promocion di e tecnologia innovador.

E plan, anuncia e siman aki pa e ministerio di Ciencia, ta determina cu pruebanan pa kimiconan iritante di cuero riba animal lo stop pa fin di siguiente aña. Pa 2027, e pruebanan di Botox den raton mester ser suspendi y, prome cu 2030, un reduccion significativo ta plania pa experimentonan riba cacho y primate no-humano.

Documentonan strategico di gobierno Britanico ta splica cu eliminacion completo di experimentonan cu animal tin obstaculo regulatorio y tecnico. Aunke metanan claro a ser fiha pa su reduccion, actualmente hopi organisacion internacional ainda ta rekeri prueba riba animal pa autorisa medicamento nobo y aparatonan medico. E situacion aki ta mustra e complehidad di e proceso y e necesidad pa tin alternativanan tecnologico robusto.

E biotecnologia a bira e pilar cu ta haci e politicanan aki posibel. Den e ultimo aña, specialistanan a desaroya sistema yama “organs on chip”, un version miniaturisa di organo humano cu a crece den un aparato chikito di plastico. E modelonan aki ta reproduci composicion celular y funcion elemental di organonan manera higra, tripa, curason, riñon y cerebro.

Actualmente, nan ta ser usa den estudionan riba e efecto di microgravedad den espacio, evaluacion di vacuna y e reaccion di tripa na radiacion. E Food and Drug Administracion (FA) di Merca a usa chipnan di pulmon pa analisa vacuna contra COVID-19, y chipnan intestinal ta util pa studia e impacto di radiacion riba e aparato digestivo.

Hunto cu e aparatonan, tin tambe e ‘organoidonan’—structurana tridimensional genera for di celula humano—cu ta permiti studia desaroyo y funcion di organonan y test medicamento den un manera personalisa. Un par laboratorio a logra crea ‘organoid’ cu ta simula organo fetal, habriendo perspectiva nobo pa investigacion sin dependencia di animalnan bibo.

Riba nivel internacional, e tendencia ta coincidi. Den april, FDA a anuncia un plan pa reemplasa pruebanan riba animal den terapia cu anticurpa ‘monoclonal’ cu modelonan mas efectivo y relevante pa humano.

Similarmente, e Comision Europeo den juni 2024 a cuminsa e desaroyo di un mapa pa laga experimentacion riba animal patras den e evaluacion di seguridad kimico. E medidanan aki ta refleha un presion creciente pa reguladornan acepta metodonan alternativo y acelera un ciencia sin uso di animal.

Sinembargo, e eliminacion total di experimentacion riba animal ta sigui enfrenta obstaculo tecnico y regulatorio importante. E gobierno Britanico, segun MIT Technology Review a reporta, ta reconoce cu hopi organisacion internacional—manera e FDA, e Agencia Europeo pa Medicamento y e Organisacion Mundial di Salud— ta rekeri prueba riba animal pa aproba tratamento y aparatonan nobo.

Ningun di e alternativanan tecnologico desaroya por simula completamente e complehidad di un organismo bibo, loke ta limita nan capacidad pa prediccion exacto di reaccion humano na tratamento y ta pone un serie di desafionan cientifico pendiente.

Experimentacion riba animal a hunga un rol central den historia cientifico y a permiti descubrimentonan clave riba funcionamento di organismo y creacion di medicinanan pa humano y animal.

Aunke e regulacion di paisnan manera Reino Uni y Merca ta rekeri licencia estricto y reglanan riba tratamento di animal di laboratorio, miyones di ehemplar ta sigui ser usa tur aña. Debatenan etico y cientifico ta persisti, specialmente pasobra casi 95% di tratamentonan cu bon resultado den animal nunca ta yega na mercado, loke ta pone den duda e efectividad real di e metodo aki.

A pesar di e limitacion actual, hopi progreso tecnologico manera impulso politico nobo ta sugeri cu un cambio di paradigma den investigacion biomedico ta acercando. Pa MIT Technology Review, e cantidad di innovacionnan den e ultimo añanan ta indica cu experimentacion riba animal den futuro kisas no lo ta esencial mas pa ciencia.