(AP) — Cas Blanco a bisa dialuna cu un almirante di Marina a actua “dentro di su autoridad y di ley” na momento cu el a duna ordo pa un di dos atake di siguimento contra un supuesto boto di droga den Lama Caribe den un operacion militar Mericano na september, cu a cay bao scrutinio bipartisano.
Secretario di Prensa di Cas Blanco, Karoline Leavitt a ofrece e hustificacion pa e atake dia 2 di september despues cu legisladornan di ambos partido diadomingo a anuncia sosten pa revisionnan congresional di atakenan di ehercito Mericano contra botonan sospecha di contrabanda di droga den Caribe y oriente di Ocean Pacifico. E legisladornan a cita un rapport publica cu Secretario di Guera, Pete Hegseth a emiti un ordo pa un di dos atake cu a mata sobrevivientenan abordo di e boto den e incidente na september.
Den su comentarionan na reporteronan, Leavitt no a disputa un reportahe di Washington Post cu tabatin sobrevivientenan di e atake inicial den e incidente. Su splicacion a yega despues cu un dia prome, presidente Donald Trump a bisa cu e “no lo tabata kier esey – no un di dos atake” ora a puntr’e tocante e incidente.
“Secretario Hegseth a autorisa almirante Bradley to haci e atake kinetico aki,” Leavitt a bisa, referiendo na vice-almirante di Marina Mericano, Frank Bradley, kende e tempo ey tabata comandante di Comando di Operacion Special Conhunto. “Almirante Bradley a traha bon dentro di su autoridad y di ley, dirigiendo e acercamento pa sigura cu e boto a keda destrui y cu a elimina e menasa contra Merca.”
E legisladornan a bisa cu nan no sa si e reportahe den e Post siman pasa tabata berdad, y algun Republicano tabata skeptico. Toch nan a bisa cu reportahenan di ataca sobreviviente di un atake inicial cu misil ta presenta preocupacion legal serio y ta hustifica mas scrutinio.
Cas Blanco a duna comentario despues cu Trump diadomingo a defende Hegseth vigorosamente. “Pete a bisa cu e no a duna ordo pa morto di e dos homber ey,” Trump a bisa, y a agrega, “y ami ta ker’e.”
Leavitt a bisa cu Hegseth a papia cu miembronan di Congreso kende por a expresa algun preocupacion tocante e reportahenan durante weekend.
Gen. Dan Caine, cabesante di Joint Chiefs of Staff, tambe a papia durante weekend cu e cuatro legislador bipartisano liderando e Comitenan di Servicio Arma den Senado y Congreso. El a reitera su “confiansa den e comandantenan experiencia na cada echelon,” oficina di Caine a bisa den un declaracion.
E declaracion a agrega cu e yamado a enfoca riba “atende e intencion y legalidad di misionnan pa interumpi rednan di trafico ilicito cu ta menasa e seguridad y stabilidad di Hemisferio Occidental.”
Venezuela ta reacciona
Trump a reuni dialuna cu su team di seguridad nacional pa discuti e operacionnan andando y e potencial proximo stapnan contra Venezuela.
E administracion Mericano ta bisa cu e atakenan ta dirigi contra cartelnan di droga, algun di cual ta bisa ta controla pa presidente Venezolano, Nicolas Maduro. Trump tambe ta evaluando si ta bay ehecuta atake contra Venezuela continental.
Diadomingo, Trump a confirma cu el a papia recientemente riba telefon cu Maduro, pero a nenga di duna detaye di e combersacion.
Papiando cu sostenedornan na Caracas dialuna, Maduro a bisa cu presion di Merca a “test” e pais, pero Venezolanonan ta cla “pa defend’e y lider’e na e caminda pa paz.”
“Nos a biba den 22 siman di agresion cu por keda describi solamente como terorismo psicologico,” Maduro a bisa.
E atake na september tabata un den un serie ehecuta pa ehercito Mericano den Lama Caribe y oriente di Ocean Pacifico mientras Trump a duna ordo pa un despliegue di un flota di barco di guera cerca di Venezuela, incluyendo e carrier di avion mas grandi di Merca.
Mas cu 80 persona a muri den e atakenan contra boto chikito cu administracion di Trump ta alega ta contrabandiando narcotico pa cartelnan di droga.
Asamblea Nacional di Venezuela a anuncia e lansamento di un investigacion tocante e atakenan letal ehecuta pa Merca.
E anuncio diadomingo di presidente di e Asamblea, Jorge Rodriguez, a marca e prome biaha cu un oficial di gobierno di Maduro explicitamente a reconoce cu Venezolanonan a ser mata den e operacion militar Mericano.
Rodriguez, e negociador principal di Maduro, a bisa cu un grupo di legislador ta bay bin hunto pa investiga “e eventonan serio cu a conduci na e asesinato di Venezolanonan den awa di Lama Caribe.”
