Na aña 1981, Marcos Bislip cu apenas 14 aña a drenta e mundo di radio pa prome biaha. E radio emisora tabata Radio Antilliana 1270 AM, y bao guia di dos persona fundamental—Morgan Arrindell y Tuyo Prins, director e tempo ey—un combinacion di disciplina y inspiracion a habri caminda pa un pasion cu lo dura mas cu cuater decada.
Radio Antilliana no ta existi mas awendia, y recordando e temponan ey Marcos ta haya nostalgia pa e tempo ora AM tabata reina na Aruba. El a conta con e tempo ey tabata, cu un sistema di zonido cu, na su opinion, por a keda bibo ya cu na paisnan manera Merca y Venezuela, AM stereo ainda ta briya, cu un calidad di zonido hopi stabiel y limpi.
Drenta den e mundo di radio cu 14 aña pa Marcos e tabata nifica traha duro for di prome momento. El a conta cu e tempo ey prome cu un persona por a pensa di bay den aire, tabatin un proceso di preparacion di tres luna estricto y mas intensivo di loke por mira awendia. El a sigui conta cu tur cos tabata cuminsa cu un test di voz. Sr. Tuyo Prins tabata scucha, analisa y yega na un decision si e persona por sigui of si radio simplemente no tabata den su destino. Pasa e test tabata manera un medaya di orguyo, un prome afirmacion cu un persona por a carga confiansa di un pueblo cu simplemente su voz.
Marcos a splica cu despues cu pasa e test tabata cuminsa e periodo di training intensivo cu tabata inclui grabamento tur dia, lesa corant na Spaña, Hulandes, Ingles y Papiamento, practica articulacion, ritmo, con pa hala rosea, y tambe principionan di etica periodistico.
El a sigui splica cu despues di cuminsa su trayectoria den radio, el a cuminsa duna e noticiero di 5or di atardi—un noticiero patrocina pa Lago Oil and Transport Company e tempo ey, cual tabata un gran honor, pasobra Lago tabata un di e compania mas grandi di Aruba. E experiencia ey a habri su wowo pa mundo di noticianan internacional, un area cu eventualmente lo bira un di su pasionnan mas grandi.
Na 1982, apenas un aña despues cu el a drenta radio, el a conta, el experiencia algo inolvidabel. Radio Antilliana tabatin un coresponsal na Argentina, Sr. Suarez, cu tabata yama entre 5or y 6or atardi pa duna update di guera di Malvinas. E hunto cu Roberto, den feliz memoria, tabata pone e yamada aki den aire pa pueblo tende directo loke tabata pasando.
Den su añanan como locutor di radio, Marcos a traha na diferente radio emisora, Radio Carina FM 98.9, Canal 90 FM, Voz di Aruba 1320 AM, GFM 99.9 Galactica y Top Fm 95.1. Durante su tempo na Canal 90 FM e tabata conecta cu cadenanan grandi manera CNN y e por a cubri noticianan internacional cu mas profundidad, incluso conflictonan na Kuwait y Irak. A base di esey, el a forma su estilo: claro, informativo y semper na altura di loke ta pasa na mundo. Awendia, e ta sigui e mesun trabao, trece noticianan satelital cu hopi hende ta spera pa tende, specialmente esnan cu tin hopi interes den noticia di Venezuela y Merca.
Pa Marcos un frase cu su mentor Tuyo Prins a bis’e e prome dia cu el a bay na aire a keda den su curason: “Bo ta e voz, wowo y horea di pueblo. Como prensa bo ta representa y defende e pueblo y saca e berdad.” Mas cu cuarenta aña despues, e ta keda firme na e principio ey. E rol di prensa, e ta bisa, ta pa bisa pueblo loke ta berdad, cu respet, integridad y balentia.
Pa Marcos, radio tambe a duna lugar pa su creatividad. Entretenimento y informacion tabata bao di un dak. Y den añanan nobenta, su interes creciente den astronomia a bira parti di su programa, y asina Astronews a nace—un programa popular cu tur diamars anochi ainda ta stima.
Durante su carera, el a pasa pa hopi emisora, y awendia e ta transmiti via su mesun emisora digital, Sunrise Radio, cu ta funciona completamente moderno for di San Nicolas, conecta cu studio di Top FM, cu un calidad di zonido hopi bon, un prueba di con tecnologia a avansa. P’e, sigui modernisa ta natural—radio ta evoluciona, y e ta sigui evoluciona tambe.
Su interes den e aspecto tecnico tambe yud’e keda den e rumbo. El a siña mescla musica, traha mix di cancionnan, y ta asina el a reconoce cu un bon oido ta importante y ta parti di famia tambe. Prome cu el a drenta e mundo di radio profesional, e tabata den CB, amateur radio y tabata scucha scanner, un mundo cu a capta su atencion desde chikito.
El a conta cu su bisawelo tabata drecha radio, y mirando den añanan atras, e ta kere cu for di dje el a haya e mesun pasion. Pa Marcos radio no tabata simplemente un profesion; e tabata su destino. For di CB den añanan setenta te na noticianan satelital di awendia, su bida semper a keda conecta na comunicacion. Mas cu cuarenta aña despues di e prome test di voz, e ta keda den aire cu e mesun entrega, mesun respet y mesun proposito. Tecnologia por cambia, radio emisoranan por cera, pero e alma di radio—voz di un hende cu ta conecta comunidad—no ta muri nunca.
