Oranjestad, 8 december 2025 – Minister di Finanzas, Asunto Economico y Sector Primario, mr. Geoffrey Wever, den calidad di representante di Land Aruba como unico accionista di Free Zone Aruba N.V. (FZA), ta anuncia cu señor Walter E. Mosher a keda nombra oficialmente como director nobo di FZA, cu fecha di inicio 1 februari 2026.

E nombramento aki ta representa un paso importante den fortalecemento institucional y modernisacion operacional di un entidad cu tin un rol strategico den diversificacion economico di Aruba.

“Mi ta sumamente contento cu Sr. Walter Mosher a haci su mes disponible pa lidera Freezone den e era nobo y mi tin tur confianza den su profesionalismo y experticio. Sr. Mosher ta un profesional Arubiano cu hopi experiencia local y internacional y ta hopi bon prepara pa e tarea aki. Mi ta contento cu un Arubiano, cu pa hopi ana tawata biba den exterior, awo ta bin back cas pa traha pa Aruba”, segun Minister Geoffrey Wever.

Señor Mosher ta un ehecutivo cu un trayectoria amplio y multidisciplinario tanto na Aruba como na Europa. Mosher a inicia su carera como Economista na Banco Central di Aruba, sigui pa ocupa diferente posicion clave na AIB Bank N.V., incluyendo Vice Presidente di Corporate Finance. Ademas, Mosher a fungi como Managing Director di Aruba Aloe, un rol den cual e a fortalece su capacidad di liderazgo y maneho operacional.

Despues di su etapa profesional na Aruba, señor Mosher a amplia su preparacion internacional cu estudio avansa, incluyendo un Executive MBA for di ESADE Business School, agrega na tres Master’s den international business, economics y digital business. Su experencia internacional ta inclui cargonan senior na Ernst & Young na Dublin—caminda e a guia proyecto y conseho na gobierno y empresa priva riba tereno di infraestructura—y na ESB, e empresa nacional di energia na Irlanda, unda Mosher a traha riba desaroyo y ehecucion di proyecto den energia renobabel.

E combinacion di experencia regulatorio, bancario, retail, infraestructura y energia ta pone señor Mosher den un posicion excepcional pa contribui na fortifica y crecemento duradero di Free Zone Aruba N.V.

E nombramento di señor Mosher ta resultado di un proceso riguroso cu a wordo implementa pa e Hunta di Comisario di FZA y un HR-consultant externo. Durante e proceso di solicitacion publico un grupo di candidato prometedor a wordo evalua, incluyendo consulta profesional for di un HR-consultant externo. Despues di intercambio repetitivo, evaluacion tecnico y consulta interno cu Minister Wever, cu e Hunta di Comisario y señor Mosher a logra un acuerdo riba tur condicion contractual.

Minister Wever a expresa su reconocemento na e Hunta di Comisario pa guia FZA den un periodo di transicion cu tabata tin su retonan. E restructuracion di FZA, incluyendo e implementacion di un plan di maneho y un roadmap strategico, asina como e instalacion di un Hunta di Comisario nobo, a crea e base pa un direccion mas solido y transparente. Den su papel di accionista y minister responsabel, Minister Wever a enfatisa cu e nombramento di un director nobo ta un elemento esencial den continuacion di esfuersonan pa fortalece maneho, operacionalisa reformanan y prepara FZA pa un rol mas competitivo den mercado internacional.

Segun Minister Wever, Free Zone Aruba tin potencial pa bira un motor di crecemento y innovacion, specificamente den un epoca unda Aruba ta busca pa diversifica e base economico riba manera duradero. E nombramento di señor Mosher, cu su experiencia tecnico, financiero, regulatorio y internacional, ta fortalece e capacidad di FZA pa atrae actividadnan nobo, crea oportunidad pa exportacion y posiciona Aruba den un mercado global mas competitivo.

Pronto e lista di actividadnan nobo cu por wordo haci for di Freezone lo wordo anuncia, un paso cu lo habri porta pa companianan y proyectonan innovador den e ecosistema economico di Aruba.

Minister Wever ta finalisa expresando su gradicimento profundo na e Hunta di Comisario, e team operacional di FZA y tur instancia gubernamental y consultant tecnico cu a contribui na e proceso di seleccion. E nombramento di señor Mosher ta marca oficialmente un era nobo pa Free Zone Aruba.