E siman aki, Corte Comun di Husticia a duna su veredicto den e caso di e compania Natura Development N.V. contra e fundacion Aruba Birdlife Conservation. E caso ta bay tocante e construccion di un beach dilanti hotel Embassy Suites.

Natura tabata representa pa R.A. Wix, G.F. Croes y L.J. Pieters, mientras cu ABC tabata representa pa G.W. Rep.

Natura a cuminsa e construccion y desaroyo di un proyecto di hotel di luho na 2018, consistiendo di un hotel di 330 suite cu pool y amenidadnan extenso, un tunnel bao tera pa haya acceso sigur na u beach otro banda di caminda, y e provision di facilidadnan standard pa beach na huespednan di e hotel, entre otro. E hotel actualmente ta operacional.

E caso

Mediante un decreto ministerial di 16 di juni 2023, a obtene un permiso di construccion pa eleva y/of nivela e suelo di lama en conexion cu realisacion di un beach. ABC tabata busca, entre otro, pa Corte prohibi Natura di ehecuta actividadnan relaciona cu e creacion di e beach en cuestion. Segun ABC, lo elimina yerba di lama protegi for di e sitio, y no por haci esaki sin un exoneracion bao Articulo 8 di Ordenansa di Proteccion di Naturalesa.

Corte na prome instancia a otorga ABC su peticion. Corte di Apelacion a duna un veredicto interino, den cual a sostene cu den bista di entre otro un veredicto di ley administrativo den e apelacion mas halto, no tin un veredicto existente mas den e proceduranan sumario den e caso aki. Corte a haya cu e partidonan ainda tin un interes den un veredicto, y pa e motibo aki ta procede pa dicidi e caso den apelacion (hoger beroep).

Den su veredicto interino, corte a considera lo siguiente:

ABC a entrega un obhecion contra e permiso di construccion. A apela e decision den su obhecion, y tambe a solicita un mandato preliminar. A trata e apelacion y e solicitud pa alivio provisional simultaneamente. Corte (di prome instancia) a duna un veredicto dia 15 di november 2023 (AUA202303735) den e caso di ABC contra minister di Asunto General, cu Natura como partido interesa. Corte a sostene cu e apelacion di ABC tabata bon fundamenta, a anula e decision di permiso di construccion, a revoca e aplicacion di permiso di Natura, a rechasa e solicitud di Natura pa permiso di construccion, y a declara e apelacion contra e rechaso como inadmisible.

Den e apelacion di Natura (hoge beroep), Corte di Prome Instancia a duna un veredicto dia 15 di november 2023. Corte di Prome Instancia a duna veredicto tocante e apelacion di ABC dia 31 di juli 2024 (AUA2023H00197 y AUA2023H0025). Corte di Apelacion pa e motibo aki a asumi cu e veredicto di Corte di Prome Instancia di dia 15 di november 2023 ta final pa loke ta trata e “Beach.”

Corte a nota, entre otro, cu e rechaso di e aplicacion di permiso di dia 18 di januari 2023 pa e “Beach” ta hustifica, pasobra e designacion di zonificacion ta “Beach.”
Corte ademas a considera cu mester anula e permiso di construccion pasobra no a completa e trabao dentro di seis luna desde cu a duna e permiso. Natura ta bay tin cu bolbe aplica pa un permiso pa cualkier actividad nobo di construccion, y Corte lo mester tene cuenta cu e decision tocante e solicitud di permiso ey den e proceduranan actual, segun e veredicto di Corte di 31 di juli 2024.

Corte di Prome Instancia a duna veredicto cu e permiso di construccion existente di Natura a caduca pasobra no a completa e trabao dentro di seis luna cu a ricibi e permiso. Segun Natura, esaki ta inhusto, pero Corte a haya cu Natura no por trata e procedura di exoneracion como suficiente pa mas actividad. Manera Corte di Apelacion ya a considera den su veredicto di 31 di juli 2024, e realisacion di un beach riba un tereno designa como “Beach” ta rekeri tanto un exoneracion como un permiso di construccion. Natura no a aplica pa ningun permiso di construccion (nobo), y e procedura a finalisa.

Bao di e circunstancianan aki, den cual Natura tin acceso na recurso legal administrativo salvaguardia adecuadamente, incluyendo e posibilidad di solicita alivio provisional, no tin espacio pa un hues civil emiti un remedio provisional den e caso aki. Pues Natura no tin ningun interes mas den un evaluacion den hoge beroep.

E argumento cu Natura ta kere cu tin interes den un veredicto civil sumario pa motibo di e dwangsom imponi, no a keda acepta. Esaki pasobra Natura incorectamente ta asumi cu obtene solamente un permiso di exoneracion ta suficiente pa continua actividad. Manera Corte a considera den su veredicto di 31 di juli 2024, pa e realisacion di un beach riba un tereno designa como “Beach,” ainda ta rekeri tanto un exoneracion como un permiso di construccion.

E conclusion ta cu Natura ya no tin interes den e apelacion. E apelacion pues ta keda rechasa. Ta duna ordo pa Natura paga e costo di e proceduranan aki, como e partido cu no tabata exitoso.

Decision
 Den hoger beroep, Corte ta confirma e veredicto di cual a trece e apelacion, te unda ainda ta relevante; y ta duna ordo na Natura pa paga e costonan procedural di ABC, cual Corte a pone na siete mil florin di costo di abogado.

Historia

E caso aki tin un historia ya di varios aña. E ta centra riba e deseo di Natura NV, desaroyador di Embassy Suites, pa construi un beach dilanti nan hotel. Natura NV a ricibi un permiso di construccion pa haci esaki, sinembargo, no a ricibi un exoneracion (ontheffing) di ministerio di Naturalesa, cu ta un rekisito pa por procede cu e construccion.
Entre tanto, den e area cu tabata destina pa construccion di e beach, tin un tipo di yerba di lama cu na Aruba ta protegi pa ley, loke a haci cu no por kita esaki sin mas, ya cu lo ta un daño grandi pa naturalesa. Esaki ta e base di e bataya legal cu tin varios aña andando, y cu durante su saga largo, a involucra gobierno di Aruba y fundacion ABC.

Di su banda, Natura NV a keda insisti cu tin permiso pa construccion di e beach y cu esaki tabata valido. Pero pa ambientalistanan – y den pasado, ministerio di Naturalesa, e escogencia di e beach tabata problematico, pasobra segun Decreto pa Proteccion di Flora y Fauna indigena, ta prohibi pa elimina of haci daño na especienan nativo protegi, completa- of parcialmente, sin un ontheffing di ministerio di Naturalesa. Tambe mester preserva e vegetacion existente (mangel y fofoti) riba e beach, y ta estrictamente prohibi pa retira nan. Esaki a pone cu e exoneracion a bira un punto clave y necesario pa por continua cu e construccion.

Maart ultimo, ex-minister di Naturalesa, Ursell Arends (Raiz) a informa Natura Development N.V y nan team di abogado cu tanto nan obhecion, como nan peticion pa exoneracion adapta, a keda rechasa.

Den un comunicado di prensa, Arends a bisa cu na final di su periodo como minister, el a keda confronta cu un decision crucial: Natura Development N.V. a presenta un peticion pa desaroya un beach den un area identifica cu e potencial di ta un santuario marino dilanti di Embassy Suites. Un zona fragil, rico den biodiversidad y hogar pa yerba marino, coral y animalnan marino proteha.

Dia 26 di februari 2025 hues a ordena cu Minister mester tuma un decision nobo dentro di tres luna teniendo na cuenta cu loke hues a bisa den su decision. Despues di un analisis cuidadoso di hues su uitspraak, informacion cientifico, diferente rapport ecologico y expertonan, incluyendo esnan di Aruba Conservation Foundation y Directie Natuur en Milieu, a keda demostra cu otorga e exoneracion (ontheffing) lo trece daño permanente na un ecosistema di gran balor.

E zona den cuestion ta forma parti di un habitat fragil cu tin varios especie nativo proteha, manera Yerba di caña (Thalassia testudinum), Fofoti (Conocarpus erectus), Cadushi (Stenocereus griseus), y tambe animalnan marino manera coral, calco, kreef, y turtuga di lama (Hawksbill Turtle).

Segun un publicacion riba su pagina di Facebook, en bes di dobla pa presion di inversionistanan, a opta pa defende naturalesa.
Un di e rapport mas fuerte, prepara pa Aruba Conservation Foundation, ta bisa claramente:

“E area marino dilanti di Hilton Embassy Suites ta probablemente e ultimo seccion sin disturbio di costa west di Aruba. Cualkier desaroyo aki lo elimina tur biodiversidad den e zona.”

Den su carta Arends ta referi tambe na un area alternativo cu ta yama Juanita Beach, cu Natura Development N.V. ya ta usando pa ofrece facilidadnan di beach sin pone presion riba un habitat sensitivo.