Aruba a bira famoso rond mundo como un di e miho “beach destination” nan den Caribe. Pero na un distancia hopi cortico di nos beachnan, un centro di ciudad “nobo” a cuminsa haya forma. Un colectivo di inversionista priva hunto cu Gobierno di Aruba ta enfocando riba e desaroyo urbano di nos capital, ta trahando hopi duro pa transforma centro di Oranjestad den un luga yena cu: cultura, gastronomia, bida urbano. Un downtown area cu ta safe, ta stimula sintido di comunidad y tin un vibra unico cu nos ta sinti y experiencia diariamente.

Recientemente, OIG a participa den un workshop bao di guia di un urbanista Hulandes, Henk Jagersma. E sesion organisa pa Gobierno di Aruba tabata hopi productivo y agradabel, cu discusion riba desafionan urgente di Oranjestad, manera limpieza di caya, fluho di trafico, parking, maneho di espacionan publico, problema social (adicto), y inclinacion grandi den direccion di concepto di “Sleepovers,” manera boutique hotel, studentenflats, residencia special pa adulto mayor, apartamento pa young professionals, y short-term stays.

Banda di tur cos cu a keda discuti, OIG a identifica un punto cardinal cu den nos opinion ta fundamental pa rebiba Oranjestad su centro:

Desaroyo urbano ta cuminsa cu bida diario. Y bida diario ta cuminsa ora nos lanta mainta y cuminsa nos dia den centro di ciudad.

Pa OIG, “Sleepover City” no ta un bishita di un rato so— e ta centro di ciudad cu bida constante.
E ta ora:

E hende cuminsa nan dia den Oranjestad;

Cu cana bay un café y dal un desayuno;

Cu ta cana bay haci uso di negoshi den bisindario;

Cu ta haci uso di plaza publico pa encuentro social;

Cu haci uso di centro di ciudad pa haci ehercicio diario;

Un economia di 24 ora cu ta cuminsa mainta y ta caba te den oranan laat di anochi.

Ehempel den region cu a inspira nos y nos a siña di nan

Otro centronan historico den Caribe y Latino America cu a restaura nan centro di ciudad cu exito y a transforma nan centro di ciudad door di bin cu un concepto di mix-use manera residencia pa diferente grupo den comunidad, conservacion di herencia cultural, turismo (short term rentals y hotel) y hospitalidad pa bishitante pero tambe pa e local.

— Casco Viejo Panama City, a revitalisa edificio historico transforma nan den hotel y vivienda moderno, crea un comunidad unda hende ta lanta, come, haci ehercicio y ta haci uso di centro di ciudad tur dia, manteniendo cultura y economia den balansa.

— Willemstad, Curaçao centro di ciudad a adopta un strategia di “Living World Heritage”, cu ta combina preservacion di patrimonio, inclusion social, cultura, economia diversifica retail plus residencia, y turismo.

Un boom economico tabata e resultado ora a restaura y transforma e centro di ciudad nan aki y introduci e concepto mix-use “sleepover” manera nos ta yam’e, importante ta pa crea un bon mix mantene balansa entre e bishitante y residente local.

Tocante OIG

OIG a cuminsa na 2022, ora un grupo di inversionista activo den Wilhelminastraat—manera e famia Harms y Koeman, AIB, y Atlas Risk Solutions —a uni forsa pa mehora e caya. Loke a cuminsa cu mehoracionnan practico manera iluminacion, limpiesa, mantencion, y mas union entre negoshinan a evoluciona den un colaboracion mas amplio.

Debi na e envolvimento creciente di otro doñonan di propiedad cu tabata den mesun liña cu e plan cu gobierno nobo ta desaroyando a tuma e decision pa amplia e enfoke pa henter Oranjestad. Dentro di e colaboracion aki, a cera un acuerdo riba algun punto di emergencia manera infrastructura, embeyecemento, limpiesa, seguridad y plantamento di mas mata. E decision pa hancra e colaboracion aki den un fundacion oficial yama OBIZ lo percura pa transparencia, un structura di maneho solido, y e oportunidad pa tur stakeholder dentro di e Zona di Inversion di Oranjestad uni y conhuntamente contribui na e futuro di Oranjestad.