(AFP) – Oscars lo ta disponible pa mira exclusivamente riba YouTube cuminsando 2029, Academy of Motion Picture Arts and Sciences a anuncia diaranson.
E acuerdo di varios aña ta nifica cu lo por mira Hollywood su ceremonia mas prestigioso solamente via streaming pa prome biaha, cabando un relacion di varios decada cu canal Mericano ABC.
“Nos ta hopi emociona pa drenta un partnership global mutlifacetico cu YouTube birando e cas futuro di Oscars y nos programa anual di Academy,” CEO Bill Kramer y Presidente Lynette Howell Taylor a bisa den un declaracion.
E premiacion anual, cual ta celebra e logronan mas grandi den e aña den mundo di pelicula y ta conta cu presencia di e streanan mas grandi den teatro di Hollywood, ta regularmente mira pa alrededor di 20 miyon Mericano y miyones mas globalmente.
ABC su contract mas recien cu e programa mester a caba den 2028, cu e di 100 ceremonia. E canal di Disney channel lo sigui cu Oscars te cu e aña aki.
Sinembargo e acuerdo nobo cu YouTube ta representa un direccion radical nobo pa e programa, y un industria cu for di hopi tempo ta dudoso cu e impacto di streamer riba cinema. Hollywood a pasa door di contraccion dificil den añanan reciente, lidiando cu cambionan den habito di generacionnan mas hoben.
E Oscars mas reciente a ser mira pa 19.69 persona, un cifra impulsa pa e hecho cu e ceremonia tabata disponible pa mira riba Disney su streamer Hulu conhuntamente cu ABC pa prome biaha.
Disney a bisa cu esaki tabata e Oscars mas mira den 5 aña, aunke e stream di Hulu tabatin algun fayo tecnico cu a laga algun sin por mira e premionan final.
Durante e pandemia di coronavirus, e rating di Oscars a cay na te hasta 10.4 miyon, mientras cu tipicamente un decada atras e tabata conta cu un audiencia di 40 miyon regularmente.
