Recientemente den un sentencia, hues a suspende decision di minister di Husticia y a duna ordo pa Andrew Hoo bolbe na su trabao como director di Inmigracion inmediatamente.
Hoo a entama un caso contra e decision di minister di Husticia cu a transferi Hoo na otro departamento pa motibo di desconfiansa.
Den e caso a indica cu e minister a tuma e decision di transferi Hoo pasobra e no a gusta e reaccion di Hoo pa un peticion di e minister pa haya informacion di Radex, entre otro informacion. Hoo a pidi e minister pa ta mas specifico den ki informacion e tabata rekeri, y pa ta mas cauteloso cu informacion sensitivo.
Pero loke a causa disgusto cerca e minister ta e forma con Hoo a expresa su mes tocante e minister den un chat cu coleganan, y a considera cu Hoo no ta respeta su autoridad. Asina a manda Hoo traha den departamento di rijbewijs di Cuerpo Policial.
Sinembargo, hues a considera cu e minister su decision ta contra ley. Hues a bisa cu e minister mester ta mas cauteloso den toma di decision, y hues tampoco tabata di acuerdo cu Hoo a falta respet na e minister.
Den su veredicto. Hues a duna ordo pa suspende e decision di minister y pa Hoo bolbe como director di Inmigracion for di dialuna 15 di december ultimo.
