Gobierno Hulandes a delinea su posicion riba mehoracion di acceso na eleccion di Parlamento Europeo pa votadornan na Corsou, Aruba y Sint Maarten (islanan CAS), despues di preguntanan cu rapporteurs di Union Europeo (EU) a trece dilanti tocante proceduranan di votacion den e partinan Caribense di Reino.

Den un contesta formal manda pa Tweede Kamer dia 19 di december 2025, Minister di Interior y Relacionnan di Reino Frank Rijkaart a atende preocupacionnan relaciona cu distribucion di carchi di votacion, procesonan di registracion, proteccion di privacidad y accesibilidad di votacion pa ciudadanonan cu ta biba den e islanan CAS.

E contesta ta sigui un rapport di rapporteurs di EU riba e conducta di e eleccionnan Europeo, cu a subraya bareranan practico cu votadornan eligibel na islanan CAS ta enfrenta ora di participa den eleccionnan pa Parlamento Europeo. Aunke e teritorionan aki ta forma parti di Reino Hulandes, residentenan no ta haya automaticamente e mesun facilidadnan pa vota cu ciudadanonan Hulandes cu ta biba na Europa of otro partinan di mundo. P’esey e rapporteurs a entrega preguntanan cu e meta pa evalua si e palabracionnan existente ta salvaguardia e derechonan democratico di e votadornan aki adecuadamente.

Un di e temanan central cu a ser treci dilanti tabata regarda e reparticion di papel di votacion. Rapporteurs di EU a puntra si e votadornan den e islanan CAS mester ricibi nan carchi di votacion automaticamente via post of digitalmente, manera ta e caso pa otro ciudadanonan Hulandes cu ta biba den exterior. Nan a cuestiona tambe si dependencia riba puntonan di recaudacion fisico ta crea bareranan innecesario y si servicio pos local por ser usa pa distribui materialnan di votacion mas eficientemente.

Como contesta, e minister a referi na compromisonan anterior haci despues di e evaluacion di e eleccionnan di Parlamento Europeo di juni 2024. Gobierno a anuncia su intencion pa amplia e cantidad di localidadnan di votacion postal, of briefstembureaus, na e islanan CAS. Di acuerdo cu e contesta, e medida aki tin como meta reduci obstaculonan logistico y baha e drempel pa participacion den eleccionnan den futuro. Sinembargo, pa ehecuta e cambio aki ta rekeri un amienda di Ley Electoral Hulandes (Kieswet).

E amienda legislativo proponi actualmente ta parti di un proyecto di ley mas amplio pa revisa e Ley Electoral, cu a habri pa consulta publico augustus di e aña aki. Minister Rijkaart a indica cu, si adopta, ta anticipa cu e cambionan lo drenta na vigor prome cu e eleccionnan di Parlamento Europeo di 2029. Gobierno Hulandes ta mira e liña di tempo aki como realistico mirando e complehidad di legislacion electoral y e necesidad pa preparacion cuidadoso door di autoridadnan di eleccion.

Fuera di cambionan legislativo, e contesta ta subraya consultanan andando cu representantenan di Corsou, Aruba y Sint Maarten. Un reunion exploratorio inicial na nivel di servicio civil a tuma lugar caba, y mas discusion ta plania awor cu e eleccionnan parlamentario Hulandes di october 2025 a conclui. E mandatario a indica cu e experiencianan adkiri durante e eleccionnan nacional ey lo ser tuma na cuenta ora di evalua con por mehora accesibilidad di votacion pa votadornan cu ta biba den Caribe.

Gobierno Hulandes a anuncia tambe cu tin intencion di encarga un estudio mas amplio riba con acceso na eleccionnan pa Camara di Representantenan y Parlamento Europeo por ser mehora mas ainda pa votadornan den islanan CAS. E estudio aki lo analisa varios aspecto di e proceso electoral, incluyendo proceduranan di registracion, comunicacion cu votadornan y distribucion di materialnan di votacion. Minister Rijkaart ta spera di por informa Parlamento di e resultadonan y cualkier medida di politica cu ta resulta pa mitar di 2026.

Otro area di preocupacion cu e rapporteurs di EU a lanta ta relaciona cu registracion di votador. Specificamente, nan a puntra ki pasonan ta tumando pa simplifica inscripcion den e registro electoral permanente y si por mehora acceso digital. Tambe a lanta pregunta riba e comunicacion publico limita rond di e opcion pa inscribi personalmente via oficinanan di representacion Hulandes den Caribe.

Den su contesta, gobierno Hulandes a reconoce e importancia di mehora accesibilidad pero no a anuncia cambionan di procedura inmediato. En bes di esey, e asuntonan aki lo ser incorpora den e proximo estudio riba accesibilidad electoral. Minister Rijkaart a enfatisa cu mester considera registracion, comunicacion y distribucion di documentonan di votacion hunto pa por diseña mehoracionnan efectivo y legalmente sano.

Proteccion di privacidad durante e proceso di registracion y votacion tambe a ser atendi. Bou di e sistema actual, votadornan mester suministra un copia di nan paspoort ora di registra y presenta identificacion ora di vota via post. E rapporteurs a puntra con ta salvaguardia privacidad den e proceso aki y si ta considera alternativanan, manera identificacion digital.

Segun e mandatario, e medidanan existente ta suficiente. E municipio di Den Haag, cu ta administra votacion den exterior pa Hulanda, a establece un declaracion specifico di privacidad caminda ta delinea con datonan personal di votadornan den exterior ta ser procesa y proteha. A base di esaki, gobierno no ta mira actualmente un necesidad pa introduci metodonan di identificacion digital den e proceso di registracion of votacion postal.

Deadline di inscripcion pa votadornan di exterior tabata otro punto di discusion. E deadline Hulandes pa inscripcion prome cu e eleccionnan Europeo di 2024 a keda fiha na 25 di april, cu ta mas trempan cu e deadline cu ta ser usa den algun otro estado miembro di EU, manera Francia. E rapporteurs a puntra si Hulanda lo considera pa harmonisa su deadline cu ehempelnan internacional.

Minister Rijkaart a contesta cu e organisacion di eleccionnan di Parlamento Europeo ta keda un responsabilidad nacional. E deadline di inscripcion Hulandes ta refleha un balansa entre maximisa oportunidadnan pa participacion di votador y garantisa cu autoridadnan di eleccion tin suficiente tempo pa procesa inscripcion y prepara material di votacion. Move e deadline mas cerca di dia di eleccion, el a argumenta, lo aumenta e riesgo di erornan administrativo y mina e ehecucion cuidadoso di e proceso electoral.

Finalmente e rapporteurs a trece dilanti e tema di studiantenan di Corsou, Aruba y Sint Maarten cu ta studiando na Hulanda. Nan a puntra ki cambionan lo ta necesario pa inclui e studiantenan aki automaticamente den e registro electoral permanente, similar na practicanan na Francia. E mandatario a declara cu e Ley Electoral no ta haci distincion entre votadornan a base di nan motibo di residencia na Hulanda, manera enseñansa. Introduci un distincion asina lo rekeri cambionan legislativo y por conduci na trato desigual di votadornan. Pa e motibo aki gobierno Hulandes no ta planea pa cambia e ley pa percura pa inscripcion automatico pa e grupo specifico aki.

E contesta di minister Rijkaart ta enfatisa e tension mas amplio entre garantisa participacion democratico inclusivo den henter Reino y maneha limitacionnan practico y legal di sistemanan electoral nacional. Segun cu discusionnan cu e islanan CAS ta continua y e resultadonan di e estudio plania bira disponibel, ta anticipa cu e tema di acceso na votacion pa votadornan Caribense ta keda riba agenda politico na Den Haag.