E bestaansminimum pa un hogar consistiendo di dos (2) adulto y dos (2) mucha (edad 0-15 aña) na November 2025 ta Afl. 5,519, un caida di Afl. 4 compara cu October 2025 (Afl. 5,523). E bestaansminimum pa un hogar di un (1) adulto ta Afl. 2,628, un caida di Afl. 2 compara cu October 2025 (Afl. 2,630).

Kico ta un “Bestaansminimum” y con e ta ser ahusta?

CBS ta defini un bestaansminimum como e nivel minimo di entrada cu ta percibi necesario pa un persona of famia por funciona den sociedad di un manera adecuado y socialmente aceptabel. Ora nos usa e definicion “Bestaansminimum”, en realidad ta referi na un “Sociaal Bestaansminimum” y no na e definicion literal di un “Bestaansminimum,” cu ta referi na “e suma di placa necesario pa cumpra e bienes y servicionan cu ta considera necesario pa biba un bida liber di privacionnan basico” (Nacionnan Uni).

Un indice a ser crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna.

Cada luna ta ahusta e indice aki a base di e prijsnan di alimento, paña, vivienda, transporte y otro articulonan den e canasta.

E bestaansminimum actual ta basa riba e rapport “Bestaansminimum 2010” publica door di CBS na November 2010, y cual ta keda actualisa mensualmente segun e CPI.

E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (di 0 pa 14 aña).

Bestaansminimum na November 2025

E bestaansminimum ta e nivel minimo di entrada cual ta percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta ser yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”.

Escalanan di ekivalencia ta ser usa pa ahusta e nivel minimo di entrada percibi pa hogarnan di diferente tamaño y composicion.

E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña).

E bestaansminimum ta basa riba cifranan di e rapport “Bestaansminimum 2010” y ta actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).

Na November 2025 e bestaansminimum mensual pa un hogar cu ta consisti di dos (2) adulto y dos (2) mucha (edad 0-15 aña) (Afl. 5,519) ta mustra un subida di Afl. 7 compara cu November 2024 (Afl. 5,512) y tabata causa principalmente door di subidanan di Afl. 22 y Afl. 16 den e sectornan di “Vivienda” y “Cuminda y bebida no-alcoholico”. E caida mas grandi na November 2025 tabata registra den e sector di “Paña y sapato” (Afl. -20).

Na November 2025 e bestaansminimum mensual pa un hogar cu ta consisti di un solo adulto ta Afl. 2,628, cual ta representa un deficit di entrada di Afl 642, un subida di Afl. 3 compara cu e deficit observa un aña pasa (Afl. 639). E deficit aki ta e di tres mas halto registra den un periodo di seis (6) aña pa luna di November.