(AFP) – Papa Leo XIV diamars a haci un yamado pa un tregua global riba dia di Pasco, expresando “tristesa enorme” cu “aparentemente Rusia a rechasa un solicitud” pa esaki.
“Mi ta renobando mi solicitud pa tur hende di bon boluntad respeta un dia paz – al menos riba e fiesta di nacemento di nos Salbador,” e Papa a bisa reporteronan na su residencia na Castel Gandolfo cerca di Roma.
Rusia a invadi Ucrania na februari 2022, y ripitidamente a rechasa yamado pa un alto al fuego, bisando cu esaki lo djis duna un bentaha militar na Ucrania.
“Entre e cosnan cu ta causa mi un tristesa grandi ta e hecho cu Rusia aparentemente a rechasa un solicitud pa un tregua,” e Papa a bisa.
Referiendo na conflicto en general, Leo a bisa: “Mi ta spera cu nan ta bay scucha y cu ta bay tin 24 ora di paz na henter mundo.”
Papa Leo a reuni cu presidente Ucraniano, Volodymyr Zelensky anteriormente e luna aki.
Contestando si e lo acepta e invitacion di Zelensky pa bishita Ucrania, Leo a agrega despues, “mi ta spera cu si,” pero a adverti cu no ta posible pa bisa na ki momento un biahe asina lo ta posible.
E tambe a bisa cu busca paz na Ucrania sin participacion diplomatico Europeo ta “irealistico” y a adverti cu e plan di paz proponi pa presidente Mericano, Donald Trump ta risca un “cambio enorme” den e aliansa transatlantico.
