(AFP) – Parlamento Venezolano ta programa pa debati un ley diamars cu lo duna castigo largo di prison pa cualkier ciudadano sosteniendo un blokeo contra tanker di petroleo, cu Caracas a yama pirateria.
E pais ya tin leynan similar pa esnan cu sostene sancion contra gobierno di presidente Nicolas Maduro. Washington y decenas di otro capital ta considera su ultimo dos reeleccion como fraude.
Lider di oposicion, Maria Corina Machado, kende su paradero ta desconoci desde cu el a biaha pa Oslo pa ricibi Premio Nobel di Paz, a papia na fabor di sancion y di un despliegue militar Mericano den Caribe, cu Maduro ta teme ta busca pa bah’e.
Partido di Maduro tin mayoria absoluto den Asamblea Nacional, cual dialuna unanimamente a aproba e ley durante un prome audiencia.
E “ley pa garantisa libertad di nabegacion y comercio dilanti pirateria, blokeo y otro acto ilicito internacional,” tabata proponi tiki despues cu forsanan Mericano diasabra a confisca un di dos tanker transportando crudo Venezolano.
Presidente Mericano, Donald Trump dia 16 di december a declara un “blokeo total y completo” di botonan di petroleo sanciona bayendo na y for di Venezuela.
E tabata e salvo mas recien den un enfrentamento cu a cuminsa na september cu un despliegue naval masivo pa loke Washington a yama un operacion anti-narcotica.
Forsanan Mericano desde esey a lansa decenas di atake contra botonan cu Washington ta alega tabata traficando droga, maske no a mustra evidencia. A mata mas di 100 persona – algun di nan piscado, segun nan famia y gobiernonan.
Trump ta bisa cu Caracas bao Maduro ta usando placa di petroleo pa financia “terorismo cu droga, traficacion humano, asesinato y secuestro.”
E ley dilanti parlamento Venezolano ta provee pa terminonan di prison di 15 pa 20 aña pa hende promoviendo of sosteniendo blokeonan asina, of multa di hasta mas di un miyon dollar. Tambe ta propone “proteccion” pa operadornan comercial, incluyendo provision di conseho legal patrocina pa estado.
Venezuela ta bao sancion di Merca riba su petroleo desde 2019. E ta produci alrededor di un miyon bari di crudo pa dia. Ta bende mayoria di esey den mercado preto cu descuento cuantioso.
Maduro a alega cu Washington kier bah’e y bay cu petroleo di Venezuela, cual Trump ta bisa Merca kier “back” despues cu a confisca activonan Mericano despues di un impulso pa nacionalisacion na 2007.
Dialuna, Trump a bisa cu lo ta “sabi” di Maduro pa retira, hasta mientras Rusia a priminti “sosten completo” pa Venezuela.
