(AFP)—Un corte na Rusia a condena activista ultra-isquierdista Sergei Udaltsov pa seis aña di prison despues di hay’e ta culpable di un cargo di “hustifica terorismo”, segun medio local a reporta diahuebs.
Udaltsov, cu ta den detencion preventivo desde januari 2024, a anuncia cu lo apela e veredicto y cu e lo cuminsa un welga di hamber, segun agencia di noticia Interfax a informa.
“Udaltsov ta condena pa seis aña di prison,” segun e hues na Corte Militar di Segundo Distrito Occidental di Moscu a declara, conforme Interfax.
E activista di 48 aña lo cumpli su sentencia den un colonia penal di maximo seguridad.
Moscu a intensifica enormemente su represion contra oposicion y libertad di expresion desde cu a lansa su ofensiva den Ucrania na 2022, y regularmente ta acusa cualkier persona cu no ta sigui e linea oficial di “hustifica terorismo”.
Fiscalia a pidi un sentencia di siete aña di prison, mientras equipo di defensa di Udaltsov a argumenta cu e mester ser absolvi.
E acusacionnan exacto den e caso di Udaltsov ta clasifica como secreto, pero el a bisa durante un audiencia anterior cu e ta ser eacusa di expresa sosten online pa activistanan Marxista cu a ser acusa di organisa un grupo “terorista” den ciudad central Ruso di Ufa.
E tabata un di e lidernan di oposicion cu a papia durante e protesta masivo contra reeleccion di presidente Vladimir Putin na 2012. El a ser encarcela na 2014 pa organisa “motinnan masivo” y a pasa tres aña den prison.
Sinembargo, Udaltsov a expresa sosten publico pa ofensiva di Moscu den Ucrania y a bisa cu su oposicion contra Putin ta for di un postura patriotico.
Udaltsov ta un admirador fuerte di e dictador Sovietico Joseph Stalin y a pidi pa restaura Union Sovietico. El a bisa canal di television independiente TV Rain na 2012 cu “Stalin no tabata un criminal” y a ser aresta y a haya multa varios biaha pa tene ceremonianan di conmemoracion riba dia cu Stalin ta haci aña.
