Mientras e tension entre Merca y Venezuela ta continua den sur di Caribe, varios biahero ta treciendo dilanti nan preocupacion si companianan di crucero lo sigui cu nan cronograma den Caribe. E siman cu a pasa ya a mira un barco cu a cancela su yegada na Corsou pa via di e tension y recien a reporta cu tin preocupacion tambe pa barconan crucero pasando Aruba y Trinidad, cual ta situa aun mas cerca di e costa Venezolano.

Siman pasa a drenta un reportahe cu e compania di crucero Norwegian Cruise Line a cambia e ruta di dos barco crucero cu ta pasando den Caribe, esta e Norwegian Epic y Norwegian Sky. Segun a reporta riba website di thetravel.com, Norwegian Epic a cambia ruta pa un motibo desconoci, y pa precaucion e compania a anuncia un otro cancelacion pa januari.

E Norwegian Epic tabatin den su cronograma pa pasa Aruba, Curaçao, St. Lucia, y St. Kitts. Sinembargo, saliendo for di Aruba pa bay Corsou, e barco a cambia su ruta probablemente debi na ehercicio naval cu tabata tumando luga cerca di e isla. En bes di pasa Corsou, e barco a pasa Bahamas.

E compania a haci un otro cancelacion pa un ruta planea den januari, tambe pasando Corsou. Manera e compania a declara, “Debi na un actualisacion riba disponibilidad di waf, nos no lo ta bishitando Willemstad, Corsou mas.” E barco si lo pasa Aruba y Boneiro.

E compania no a duna un splicacion explicito pa e cambio den ruta, pero segun a reporta, si a nota cu Corsou ta apenas 72 kilometer for di e costa Venezolano, señalando indirectamente cu e motibo lo ta relaciona cu e ehercicionan naval den e area.

Mirando e tension creciente entre Merca y Venezuela, hopi a keda preocupa tocante e posible consecuencianan pa islanan den Caribe, specialmente esnan situa cerca di Venezuela manera Aruba. Desde e cancelacion di Norwegian Epic y Sky pa Corsou, hopi biahero a cuestiona si mas compania di crucero lo tuma medidanan similar y si e cambio y cancelacionnan lo por tin efecto riba e ruta pa Aruba.

November, december y januari ta temporadanan druk di crucero riba Aruba, unda casi tur dia a y lo mira un of mas barco staciona na waf y un entrada enorme di turista den e area di Oranjestad. Aunke no a mira ningun desviacion di crucero pa Aruba—al menos no pa motibo relaciona cu ehercicionan naval—algun biahero a subi red social pa cuestiona si e cancelacionnan recien lo na dado momento afecta nan cronograma pa bishita varios isla den sur di Caribe, incluyendo Aruba.

Manera un usuario a bisa riba reddit, “Mi a book un crucero pa Aruba y Corsou den 3 siman y e no ta mustra mucho bon…Nos ta djis spera pa un anuncio pronto pa asina nos por ahusta nos plannan. E biahe aki di 8 dia ya tin hopi dia riba lama, y mi ta prefera no bay mas si nan reemplasa 2 dia mas (riba tera) cu dia riba lama. Tambe mi ta prefera di no bay Nassau of Conzumel.”

Otronan ta cuestiona si e lo ta safe ainda pa biaha via crucero den e region aki di Caribe. Un usuario a comenta, “[mi] ta hopi preocupa cu e caos cu ta pasando y si e ta safe mes. Algun di e islanan manera Aruba y Corsou ta hopi cerca.”

Otro ta bisa, “Mi a book un crucero pa islanan ABC den aproximadamente 6 siman. Mientras mi lo echt kier ta eynan, mi ta prefera di ta safe.”

Dia 3 di december, gobierno Mericano a actualisa su advertencia di biahe pa Venezuela pa nivel 4, consehando fuertemente pa no biaha pa Venezuela pasobra segun e Departamento di Estado, ta existi un riesgo di “detencion inhusto, tortura den detencion, terorismo, secuestro, aplicacion arbitrario di leynan local, crimen, inkietud civil y infrastructura di salud inadecua.”

Dia 21 di november, gobierno di Merca tambe a emiti un boletin NOTAM pa adverti pilotonan y operadornan aereo cu ta opera den e espacio aereo maneha door di Maiquetía, pa motibo di posibel riesgo. Directie Luchtvaart Aruba tambe a tuma nota di e boletin aki, pero den un comunicado a subraya cu esaki no ta aplica pa espacio aereo di Aruba y cu te awor ningun vuelo pa of for di Aruba a ser afecta. Asina mes, e instancia a subraya cu lo keda monitoria e situacion di cerca.

Aunke Aruba no a mira ningun efecto directo pa e tension den region, ciudadanonan ta keda ansioso tocante e impacto economico cu un escalacion lo por trece pa nos sector Turistico. Y e comentarionan riba red social ta duna un indicacion caba riba ki sorto di consecuencia nos isla por mira si e situacion geopolitico empeora.

Un rapport di Stimson Center, un grupo sin fin di lucro, ya a provee un bista di ki impacto Aruba lo sinti, subrayando cu un escalacion di e situacion por destabilisa e region Caribe, pone rutanan comercial na peliger y pone tension riba balansa fragil di seguridad y migracion.

Pa loke ta turismo—specialmente via crucero—e rapport ta enfatisa cu biaheronan potencial por ser distrai pa percepcionnan di instabilidad den sur di Caribe, specialmente si patruyanan naval di Merca of accionnan di represalia di Venezuela ta bira titular. Tension regional aumenta lo stroba tanto turistanan di Noord America como Europeo, cu ta conta pa mas cu 80% di e yegada di Aruba. E marca “One Happy Island” di e isla por sufri daño duradero si e parti zuid di Caribe ta ser percibi como insigur.

Y no ta barconan di crucero so lo keda afecta, sino tambe barconan di carga. Manera ta conoci, Aruba ta depende hopi riba productonan importa, mayoria di nan biniendo for di paisnan den Latino America. E rapport ta enfatisa cu economistanan local ta adverti cu tension regional por tin efectonan di fluctuacion riba economia di Aruba; cualkier instabilidad den rutanan di barco por traduci lihe den prijsnan mas halto pa cuminda, combustibel y productonan di consumo.

Pues e posible efectonan por trece cambionan significante pa localnan den un ambiente economico cu a keda fragil desde e pandemia di COVID-19, y e ultimo desaroyo di cruceronan pasando den e region ta señala e necesidad pa Aruba tambe keda alerta na e situacion geopolitico cerca di cas.