Aña 2025 pa Aruba a significa e mesun desorden causa pa cambio di gobierno na Merca cu esaki a causa rond mundo. Pero, por lo pronto e no a afecta nos economia asina tanto. Esey no ta implica cu e efectonan di politica internacional no por yega na nos porta ainda. Remarcable ta e tension creciente entre anterior partnernan strategico, di un banda Canada y Europa (Union Europeo y algun otro manera Reino Uni), y na otro banda Estadonan Uni bao mando di presidente Donald Trump. No ta trata solamente di un conflicto economico/comercial, cu a inicia cu Trump imponiendo impuesto di importacion riba practicamente henter mundo, sino tambe tension den e relacionnan dentro di e pacto di defensa NATO. Esaki a conduci na un reaccion di e paisnan Europeo pa aumenta drasticamente nan inversionnan militar, loke tambe lo tin consecuencia pa e compleho militar-industrial Mericano, cu un reduccion sustancial di inversion Europeo den futuro y simultaneo inversion den industria Europeo mes. Ademas Canada, envolvi den un casi guera cu Merca riba tereno economico, a dicidi di cera alianza mas estrecho cu Europa y varios partner manera H apon, Australia y Sur Corea pa asina reduci nan dependencia economico di Estadonan Uni.

Pa Aruba e cambionan den ambiente internacional no a mustra cambio drastico den nos realidad diario, ainda. Como parti di Reino Hulandes no tin claridad ainda con esaki ta bay desaroya, esey ta keda pa 2026. Nos economia no a sufri tanto daño, mirando cu e fluho di turista for di Merca practicamente no a mengua, posiblemente pasobra e caida economico na Merca, anticipa a base di e medidanan di importacion di Trump, no a cristaliza. Esey pasobra despues di e anuncio di e campaña di ‘tariffs’ pa henter mundo na april a para gran parti di nan y te na augustus varios di nan a bin na vigor. Tambe impuesto imponi riba producto importa cu Merca mes no por produci, a keda elimina recientemente, manera bacoba y coffi. Asina e efecto di inflacion importa na Aruba te awor a keda reduci en general, aunke den e categoria di alimento tabatin un aumento sustancial di prijs.

Riba tereno di seguridad, sin embargo, Aruba ta bibando momento di tension grandi, ya cu e accionnan Mericano, inicialmente dirigi contra supuesto transporte di droga via lama Caribe a converti awor den menaza di accion militar den teritorio Venezolano, cu e obhetivo di deshaci di e regimen di Maduro. Esaki por desemboca den disturbio politico y militar mayor den nos region, cu pa nos ademas tin e peligro di daño directo pa motibo di nos cercania na Venezuela. E incidentenan reciente cu aviacion civil y avion militar Mericano a duna caba un vista preliminar di loke por sucede na escala mayor si di berdad tin un situacion di guera total.

Pero, tumando como punto di salida cu aña 2026 por tuma su curso normal, por anticipa un crecemento economico modesto, e fase cu por a spera despues di e expansion fuerte post-Covid. Como cu e yamadonan pa ‘diversificacion di economia’ semper ta presente, por dedica atencion na e tema aki, aunke cu e realismo necesario. Na 2025 por a mira e promer pasonan di e gabinete nobo pa explora un siguiente uso di e tereno di refineria, pero sin mustra tanto detaye. E empresa Mericano cu ta explorando posible presencia di petroleo y gas den awanan teritorial di Aruba, tin su proyecto ainda den un fase preliminar, loke significa cu, hasta den caso di descubrimento di yacimento explotable, esaki por dura entre 5 pa 10 aña pa yega na beneficio economico palpable. Esaki ta significa cu pa e segundo parti di e decada aki, ta turismo tin y nada mas.

Kico esaki ta implica? Cu gobernacion no por conta cu aumento sustancial di ingreso y lo mester ‘siña biba cu loke tin’. Y hustamente ey te awe tur gobierno a mustra problema pa contene gasto y na mes momento restructura y moderniza e aparato publico. Claro cu ta mustra – obligatoriamente – riba e cooperacion cu Hulanda den e reforma contempla den e Landspakket. Despues di cinco aña di accion ‘morocoy’ nos no ta impresiona cu loke a logra te awor, ademas cu tin un sinfin di asunto cu no ta contempla den e landspakket y cu gobierno mes lo mester ehecuta. Ta trata di asunto manera regulacion di uso di vivienda pa meta comercial (Airbnb, Vacation rentals), especialmente di propietario den exterior. Ademas contesta riba e demanda urgente di vivienda pagable, pa cual no a mira nada ainda. Tambe legislacion ambiental pa contene deterioro di naturaleza, riba tera y den lama, unda ultimo 10 aña a duna nos suficiente ‘lip service’ pero casi nada concreto.

E ehemplo mas cinico di e falta di legislacion ambiental ta e aparicion, presencia y desaparicion di industria petrolero den un lapso di cien aña, sin cu tabatin legislacion adecua aproba, mucho menos aplica.

Cu esaki nos no ta bisa cu aña 2025 a pasa bay sin cambio positivo. Supervision financiero a sigui, incluyendo legislacion di Reino. A tuma e decision di cuminza legaliza presencia di e migrantenan, principalmente di Venezuela, aunke ainda falta claridad con esaki lo tuma lugar y ki consecuencia esaki tin pa entre otro mercado laboral. A introduci, despues di institui e autoridad pa competencia husto (AFTA) tambe legislacion pa proteccion di consumidor, un actualizacion bastante extenso a base di e Codigo Civil reforma. Nos ta conclui un aña di tension fuerte, sin daño grandi ireparable, pero cu e mesun turismo di masa, sin mayor avance den direccion di un desaroyo mas sostenible.