For di diasabra, oficialmente tur negoshi por cuminsa bende klapchi y tur ciudadano por tira esaki. Departamento di Salubridad Publico (DVG) y Centro di Control di Cacho (CCC) ta comparti algun tip pa tene hende y mascota safe durante e temporada aki.

Departamento di Salud Publico (DVG) ta invita tur hende den nos comunidad pa gosa di fin di aña di un manera completamente consciente y sigur.

Por fabor, tuma e siguiente puntonan den consideracion pa garantisa seguridad di tur hende:

Seguridad di Esnan Mayor: Proteha nos grandinan!

– Keda vigilante contra e huma toxico cu ta sali for di klapchi.

– Bisti hende grandi cu ‘earplugs’ pa cuida nan oido.

– No laga nan nan so, ya cu e zonido fuerte por provoca nan ansiedad.

Seguridad di Mucha Chikito: Esaki ta nos prioridad!

– Proteha nan contra e huma toxico.

– Bisti nan cu ‘earplugs’ pa proteha nan oido.

– Nunca laga nan cende klapchi, si no tin supervision serio di un adulto cuidadoso.

Seguridad di Mascota: Nan tambe mester atencion!

– Mantene bo mascota den un area proteha y cera (preferiblemente paden di cas).

– Duna nan trankilisante, solamente, bao guia y instruccion precies di dokter di bestia (veterinario).

Consciencia pa Salud Publico: Sea responsabel!

– Usa klapchi conscientemente.

– Celebra den famia.

– Evita aglomeracion innecesario.

CCC di su banda ta manda un suplica pa no lubida di animal.

Si bo sa cu den bario tin animalnan cu lo spanta di klapchi:

*scoge un orario pa tira klapchi;
*duna e animal un lugar safe pa sconde – un haula di cacho; casita traha cu paña riba dje pa manten’e scur y ‘cozy’; na cas, un baño of camber unda e por sconde bao cama;

*bisti bo mascotanan un banchi no mucho preta ni mucho los;

*pone un ‘tag’ na su banchi cu su nomber y bo number di telefon;

* automobilista, please core extra cauteloso den e dianan aki, pasobra animalnan sa sali core subi caminda di susto, y esaki por ta mortal pa nan si dal nan cu auto;

*tuma contacto cu Lost & Found Pets Aruba riba Facebook si haya un animal perdi, cu ta core desorienta riba caya;

*CCC tin un linea di WhatsApp y directo pa yuda y guia tur persona cu nan guia y pregunta, na 592-9777.

Tambe si bo persona ta wak un persona ta tira klapchi direct riba animal of a expres causa daño na un animal cu klapchi, please tuma contacto di biaha cu Polis, pasobra esaki ta considera como Maltrato di Bestia y ta castigable pa ley.

Bon Dia Aruba ta haci un yamado pa tur ciudadano celebra conscientemente y safe e cambio di aña, pa nos tur habri aña cu bida y salud.