Eleccion di Reina ta un evento cultural grandi na Aruba, pero pa Andrew Steba specificamente, e tabata un inspiracion pa su futuro. E diseñador, kende recientemente a disfruta di un participacion exitoso na un evento di moda, tabata sa di mucha cu diseño y moda ta su pasion.

E tempo ey, algun miembro di su famia tabata trata di descurasha e mucha di e rumbo aki –‘Moda no ta pa mucha homber’ – Steba a persisti, a pesar di a tene e interes scondi pa otro. E cultura machista sinembargo no a strob’e pa desaroya su interes artistico y semper Steba a keda enfoca riba arte. Pero tabata na 2019 cu realmente el a dicidi pa bay pa moda, y danki na cursonan di Atelier’ 89 entre otro el a siña e tecnicanan di diseño y su mundo a cambia. “E tempo mi a diseña un coleccion di 10 pieza. Pero e ora mi mester a cose nan. Mi mama a yega di regala mi un mashin di cose, pero el a keda warda pa dos aña.” Por fin Andrew Steba a haya motibo pa saca e mashin di su caha y mira con pa traha cune, te pa cose. “E tabata un reto, pero mi a ripara cu mi tabata por.”

Tabata un evento di moda na 2023 cu a lansa Andrew Steba como diseñador. Esey tabata e aña cu el a bin cu su prome coleccion di 12 shimis di gala. Y pa 2025, su decision tabata pa bin cu diseñonan ‘Ready to Wear,’ conoci den e mundo di moda como ‘prêt-à-porter,’ cu ta bistinan mas accesibel. Mondi Mistico di Attelier Andrew Steba a resalta na 2025.

E coleccion di 2023 no tabata pa benta, sino pa demostra su capacidad di diseña. “E aña ey, e telanan a yega laat di Colombia. Mi a haya mi mes ta cose e bistinan den 21 dia. Nan no tabata cos’i na nivel. Mi no a haya tempo pa caba tur detaye.” Steba a bisa cu e mes ta hopi detayista, y como tal, nunca tabata su intencion pa bende e shimisnan. Si e tabata huur nan pa personanan cu kier a bisti pa un of otro ocasion y hasta algun candidata di eleccion di reina a haci uso di e bistinan. Pero, e coleccion cu a sigui pa e show di moda na Baranquilla y awor pa su di dos participacion den e evento di moda, e storia ta diferente. “Mi a bende algun bisti y mi tin otro cu ta riba ordo. Mi ta bayendo bon.”

Otro diferencia ta cu e biaha aki, Andrew Steba a traha cu costureronan di Colombia y Aruba pa su coleccion. E ta nifica un desaroyo den su trabao, unda no solamente el a crece como diseñado, pero tambe a genera trabao pa mas hende. “Mi tabata kier un team pa yuda mi. Mi tabatin e dicho di por tabatin costureronan cu por a yuda mi produci mi coleccionnan.”

Biba di moda

Andrew Steba lo kier pensa cu eventualmente na Aruba diseñadornan por biba di nan arte. Ainda e mes no ta asina leu. Su mayornan tin un compania cu ta duna cursonan di BHV, cu ta Bedrijfshulpverlening, esta cursonan cu ta prepara companianan pa maneha cualkier situacion di emergencia. Steba mes ta duna curso riba con mester desaloha un espacio na momento di candela. Ta e trabao aki ta financia e proceso di diseña y elabora su coleccionnan. Pero e ta convenci cu e por ta posibel cu moda y diseño por bira un industria local cu ta brinda oportunidad di carera pa hende manera e y otronan. “E ta depende riba con Gobierno y otro stakeholders por crea e incentivonan.

Den caso di difunto Percy Irausquin, e diseñador cu mas a inspira Andrew Steba, el a logra su pasonan den un mercado mas grandi. “El a logra su trayectoria pafo di Aruba. Y mi tambe ta purbando esey cu Colombia.” Steba a mustra cu Colombia ta un mercado grandi cu ta consumi moda y asina e ta purba trece un laso entre e pais ey cu Aruba pa mira con uni forsa y tambe trece visibilidad na Aruba y “jumpstart e industria aki.”

Andrew Steba ta considera e eventonan di moda na Aruba di gran balor pa crea oportunidad. No solamente ta trece diseñadornan di Latino America y Europa hunto. Banda di ‘showcase’ e coleccionnan, mas crucial ta un red pa por bende e bistinan, algo cu ta birando un realidad.

Steba a caba di cumpli 30 aña y ta convenci cu e lo logra su soño pa hiba su marca y su coleccionnan pa pasarelanan rond mundo, particularmente New York. Fashion Designers of Latin America, FDLA, cu ta basa na New York tabata presente na e evento y ta bay scoge entre e diseñadornan cu a presenta nan coleccion aki pa participa na e New York Fashion Week na February proximo. Steba ta den e contienda y ta spera di keda scogi pa bay un di e eventonan di moda mas grandi di mundo. “Pero aki 10 aña lo mi kier mira e marca estableci na Merca, Europa. E ta dificil pero posibel si.”

Un logro cu Andrew Steba ta en todo caso cu su famia awor ta sostene totalmente. Despues cu kizas algun tabatin duda di e interes grandi di e mucha homber chikito, awor “nan tur ta ‘on board.’ “Pa mi, famia ta tur cos y cu nan ta para mi tras ta algo hopi importante. E ta hopi special.”