Recientemente, Oficina Central di Estadistica (CBS) a publica su Indice di Prijs di Consumidor (CPI) pa luna di november 2025. Den esaki, a nota e cambio di prijs di cuminda y servicio di catering.
E indice di “Cuminda & servicio di catering” a registra un aumento di 0.4% na November 2025, despues di a registra un aumento di 0.1% na October 2025.
E indice di “Cuminda na cas” (0.4%) a registra un aumento, unda nuebe (9) di e diesun (11) indicenan di e gruponan di cuminda na cas a subi na November 2025. E indice di “Berdura” a conoce e aumento di mas grandi (2.2%) na November 2025. Otro aumentonan significante a wordo registra den e indicenan di “Lechi, keshi y webo” (1.0%), “Fruta” (0.7%), “Bebida no-alcoholico” (0.5%) y “Sucu, jam y otro tipo di cos dushi” (0.5%). E caida mas grandi a wordo registra den e indice di “Batata, yuca y batata dushi” (-1.2%) na November 2025. E indice di “Cuminda pafo di cas” a registra un aumento di 0.3% na November 2025.
Na November 2025, “Cuminda na cas” y “Cuminda pafo di cas” como grupo, tabatin un aumento di prijs di 0.4% compara cu October 2025 y hunto tabatin un influencia 0.07 ppt riba e CPI, mientras cu e restante bienes y servicio hunto a experencia un caida di prijs di 0.2% y tabatin un efecto di -0.15 ppt riba e CPI.
