Dowers no a contesta preguntanan te ainda riba proceso di bidding pa cumpra clean fuels pa Aruba

Desde fin di november y durante reunionnan publico 15,16 y 17 di december, Parlamentario Endy Croes (MEP) a haci varios pregunta na minister Arthur Dowers (AVP) riba e tema di un scandal den e tender process – esta e proceso di bidding pa cu compra di gasolin, low sulfur diesel y jetfuel pa Aruba.

Di acuerdo cu informacion y documento cu e Parlamentario ta dispone di dje ta mustra cu tin un scandal grandi cual por costa RDA/FMSA y Aruba hopi placa y no lo impedi casonan den corte.

Pa por evita esaki, Parlamentario Croes a haci Minister di Energia varios pregunta entre otro si e por ta na altura di locual ta tumando luga desde 25 di Juli di e aña aki den FMSA/RDA.

Lamentablemente Dowers no a contesta y tambe gaña Parlamento. Sinembargo despues di e reunion di 17 di december a manda mesora extra pregunta pa Dowers dia 19 di december riba e tema, mirando e situacion Parlamentario Croes ta sinti cu Dowers tambe a cuminsa gaña Parlamento. Segun Parlamentario Croes kisas Gerlien Croes (Futuro) a contagia Dowers cu e virus “gañado,” esta e virus di aña 2025.

Kico a pasa den Parlamento

Parlamentario Croes a puntra Minister Dowers na varios ocasion entre 15 y 17 di december durante reunionnan publico si Dowers ta na altura di un scandal den RDA/FMSA den e proceso pa cu compra di clean fuels esta gasolin, low sulfur diesel y jet fuel. Tambe a puntra Dowers si e ta na altura di e proceso di RFP esta un tender (bidding) cu a cuminsa desde 25 di juli 2025 organisa door di expertonan di FMSA.

A puntra si Dowers ta na altura cu tin un ganado bao di e nomber di “Trafigura,” kende a ser avisa cu el a gana y a pidi pa bin Aruba 13 di October. A puntra Dowers si e ta na altura cu e comision di experto a conseha pa kibra e contract cu Citgo. Dicho contract a wordo kibra di acuerdo cu e conseho di FMSA unda un carta a bay pa Citgo 3 di october 2025. Tambe a puntra Dowers si e ta na altura cu un compania Novum kende “no a participa” den e proceso di Tender cu a inicia desde 25 di Juli a wordo pidi pa “achteraf” ora cu ya tabata tin un ganado pa e tambe duna un oferta. Dicho oferta a drenta dia 17 di october 2025 despues cu e tender a cera y un ganado a wordo anuncia.

Dowers a laba man gañando Parlamento

Minister Dowers NO a contesta ningun pregunta. Dowers constantemente e referi na 32 preguntanan cu Croes a haci schriftelijk cu e lo contesta eseynan schriftelijk y no kier a duna Parlamento informacion. Despues Dowers manera mucha manda ta gaña Parlamento cu Novem solamente ta bende fueloil y no ta bende clean fuels siendo Croes ta splica cu e tin prueba y copia di e oferta di Novum di 17 di october 2025.

Alabes Parlamentario Croes a bisa Dowers si e djis subi website di Novum e mes por constata cu locual el a bisa Parlamento no ta cuadra, pasobra Novum ta bende clean fuels. Ta amigonan di Dowers cu a wordo nombra den RDA posiblemente ta tras di esaki.

Dowers constantemente a opta pa no contesta

Parlamentario Croes ta adverti Dowers, y lo puntra un bes mas si Dowers ta na altura cu Trafigura a gana e tender oficial y a wordo informa di tal. Fraccion di MEP ta adverti Dowers cu si RDA/FMSA inicia un otro proceso paralelo esaki lo por tin consecuencianan grave pa pais Aruba. Riba mercado internacional e transparencia y integridad ta wordo sacudi y credibilidad di Aruba ta ser cuestiona fuertemente. Nos stabilidad pa nos!

siguridad energetico lo core peliger unda PUEBLO di Aruba ta bay end up pagando un prijs hopi caro pa gasolin y demas producto pa e astucia di amigonan di Dowers. Na final minister Dowers lo mester carga su responsabel. Nos ta keda pendiente pa e contestanan di Dowers lo mas antes posibel. No ta exclui un peticion na OM pa un investigacion orientativo den prome siman di Januari den algo asina grave como cu Dowers ta sconde y no ta contestando. E bala ta lorando!

Nota di redaccion: E articulo aki ta opinion di e autor y no ta representa opinion di Bon Dia Aruba.