(AFP) — Lider di Corea di Norte Kim Jong Un a bishita un fabrica cu ta produci lansadornan nobo di varios raket y a elogia capacidad di e sistema di arma ey pa “destrui enemigo”, segun medio estatal a reporta diamars.
E bishita di Kim na e fabrica a ser reporta un dia despues cu Pyongyang a bisa cu el a haci un prueba di disparo di dos misil di crucero strategico di largo alcance como un muestra di “preparacion di combate” contra menasanan for di afo.
Acompaña door di alto oficialnan di programa di misil di Corea di Norte, Kim a bisa cu e sistema di arma nobo lo sirbi como “medio principal di golpi” di su forsa militar, segun Agencia Central di Noticia Coreano (KCNA).
El a bisa cu e sistema di varios raket nobo ta un “sistema di arma super poderoso pasobra e por destrui enemigo pa medio di un golpi repentino y preciso, cu alto exactitud y poder devastador”, KCNA a bisa. E sistema lo ser “usa den gran cantidad pa atake concentra den operacionnan militar”, KCNA a agrega.
Imagennan di medio estatal a mustra Kim para banda di e sistema masivo di misilnan nobo den un fabrica grandi, cu propaganda riba e murayanan. Corea di Norte ainda tecnicamente ta den guera cu Corea di Sur y su arsenal grandi di artileria durante hopi aña a ser considera door di analistanan como central na su strategia den caso cu un conflicto surgi na e peninsula.
Un estudio di 2020 door di think tank RAND a evalua cu sistema di artileria di Corea di Norte por causa 10.000 victima den solamente un ora si ta apunta riba centro di poblacion grandi manera capital di Corea di Sur, Seoul. Pyongyang tambe a aumenta significativamente prueba di misil den añanan reciente.
Analistanan ta bisa cu e impulso aki tin como meta mehora capacidad di golpi preciso, desafia Merca y Corea di Sur, y prueba armamento prome cu potencialmente exporta nan pa Rusia.
