Ayera un publicacion di Luna Foundation a surgi riba plataforma di red social Facebook, unda e fundacion a comparti e storia di Will: un puppy rescata cu a ser diagnostica cu diabetes. Bon Dia Aruba a acerca fundador di Luna Foundation, Sra. Zoey Conijn, pa por conta un tiki mas di Will su storia y con su recuperacion ta bayendo.

Den un entrevista via yamada di telefon, Conijn a conta cu a descubri Will y su cinco otro ruman den un neishi banda di lama na Arashi. Segun e ta splica, esaki tabata e mesun luga unda algun luna atras a descubri un otro neishi identico di puppy bandona, unda tambe tabatin un puppy cu diabetes, aunke a descubri esaki apenas despues cu a mand’e Merca.

A splica cu e cacho aki awor ta birando ciego na Merca. Prome a pensa cu e enfermedad a surgi ey pero awor cu a haya un neishi identico unda un otro cacho tin diabetes, ta sospecha cu esaki ta trata di e mesun doño cu ta bandonando su cachonan, posiblemente debi na loke Conijn a yama ‘overbreeding’:ora un cacho mama ta keda haya yiu cada pasa par luna. A splica cu e cacho cu a descubri prome a cuminsa mustra señal di diabetes rond cinco pa seis luna bieu. Sinembargo, Will a cuminsa mustra señal cu apenas tres luna caba.

Conijn ta splica cu ora un cacho mama ta keda haya yiu, na dado momento e cachonan ta cuminsa nace cu complicacionnan di salud, debi cu e mama mes no ta hayando suficiente tempo pa recupera y por keda desnutri, di e manera aki dunando luz na puppies cu ta nace cu enfermedad of discapacidad.

Despues cu a haya e ultimo neishi di puppies, inmediatamente Luna Foundation a tuma e cachonan pa por cuminsa cuida pa nan. manera Conijn ta conta, nan tabata yena cu carpata y bichi. Cinco di e puppies a recupera rapidamente—menos Will.

A cuminsa ripara cu Will ta bebiendo mucho awa y despues di su prome cuminda pa e dia, su bariga ta hincha demasiado y no ta baha back—a pesar cu e no ta subiendo peso. Mesora a bati alarma y a hiba e puppy na veterinario. Una bes a yega eynan, dokternan a test Will cu mashin, pero e metodo aki no por a registra e nivel di sucu. A tuma pa dokternan check su sanger mes pa asina descubri cu e tin un nivel di sucu sumamente halto—700. Conijn ta splica cu un puppy saludable no por tin un nivel di sucu mas halto cu 110, pues mesora a compronde e peligro cu Will ta enfrentando.

Mesora a cambia dieta—cuminsando cu brocoli, carot y carni, lagando brokkjes afo. Conijn a splica cu ta bay cuminsa regla inyeccionnan di insulina pa purba baha Will su sucu, pero e ta enfatisa cu esaki ta un proceso hopi dificil.

Segun e fundador ta splica, tin cu prik e cacho prome cu e come den su orea, despues tin cu saca sanger pa midi sucu y por ultimo ta inyect’e cu insulina. Esaki tin cu sucede dos biaha pa dia pa resto di e cacho su bida. Normalmente, un puppy cu diabetes no sa biba mas largo cu dos of tres aña.

E mama mes no a haya te ainda, pero ta sospecha cu e no ta hayando e cuido adecua.

Cachonan chikito ta birando malo mas trempan
Aki na Aruba, enfermedadnan den puppy ta algo relativamente nobo. Cancer ta algo cu den pasado sa mira den cachonan bieu, pero Conijn a enfatisa cu ta mirando mas y mas cacho chikito cu ta bira malo mas trempan of ta nace malo.

Esaki ta e di tres biaha cu e fundacion ta haya un puppy cu diabetes. E prome a fayece, pasobra recuperacion no tabata posible mas p’e. E di dos a bay Merca y awor ta birando ciego. Conijn ta splica cu segun veterinarionan, e frecuencia di diabetes (y enfermedad en general) den puppies ta “un stijgende lijn.” Esaki ta mayormente debi na ‘overbreeding’ y mal cuido di cacho.

Conijn ta conta cu a pesar cu Will ta enfrentando un malesa peligroso, e ta un cacho hopi activo y hopi lief. “Pa mi, e mes no sa cu e ta malo,” Conijn ta conta, enfatisando cu Will ta un cacho hopi fuerte y gusta hunga cu sapato, mea y cu e cachonan mas grandi. “E ta bibito bibito.”

Pa Will su recuperacion, Conijn a splica cu actualmente e ta kedando na un ‘foster family’ hunto cu su ruman y eynan nan ta cuidando e y ta dun’e cuminda dos biaha pa dia. Conijn ta cushina p’e y hunto nan ta keda monitoria e salud di Will. Otro siman diaranson lo bay veterinario back pa midi su sucu atrobe y ta spera cu pa e tempo ey por mira un caida pa rond di 400.

Pero pa loke ta e nivel desea di 110, Conijn a splica cu Will probablemente nunca lo yega e nivel ey: “Si e por bahele na 200, ami ta feliz. E ora nos sa cu e por biba cu insulina.” Aunke ta den combersacion cu veterinarionan na Merca, pa manda Will eynan y haya su tratamento ta costa miles di florin, Conijn ta splica. Un inyeccion di insulina pa un siman, segun e fundador, ta costa 800 pa 1.000 dollar na Merca, siendo cu na Aruba e ta mas barata—aunke asina mes caro.

Importancia di sterilisa bo mascota
Manera Conijn ta enfatisa, e mensahe ta keda: Sterilisa bo cachonan. “Si bo no por cuida nan, si bo no kier pa nan haya puppies tras di puppies cu ta zorg pa nos caya yena cu cachonan malo, cachonan desforma, cachonan cu yen problema di salud, contact un di e fundacionnan pa opera bo mascota por nada. Asina so nos ta stop e.”

E problema di cachonan bandona ta keda un epidemia riba e isla, unda Conijn ta splica e ta debi na un mentalidad iresponsable. Asina mes e ta subraya, no ta tur ta asina, djis tin un par cu ta daña cos pa otro. Na Aruba tin hopi hende cu ta stima bestia, Conijn ta bisa. “Pero tin un par memey di nos…they’re monsters, man.”

Luna Foundation a habri donacion pa personanan cu ta desea di yuda Will den su recuperacion. Si ta desea pa contribui na e esfuersonan di e fundacion, por haci un donacion via:

Pay Pal: https://www.paypal.me/LunaFoundation

Venmo: @Ashley-marszalek, ultimo cuatro number di cell ta 9422

Transferencia di banco: Aruba Bank, Stichting Luna Foundation, account: 6004940190 AWG